Makirinnasonkayo Kadi Manipud iti Kasuratan?
1 Ti maysa a nasanay a soldado a mapan iti gubatan isut’ naan-anay a nakabalan. Ti nalaing a managputar nga agsagsagana iti trabaho a mangibangon ti proyekto isut’ mangitugot kadagiti remienta a kasapulanna tapno mairingpasna dayta. Ti adipen ni Jehova a makiraman iti tay-ak ti ministerio masapul nga adda iti imana ti “kampilan” ket aramatenna dayta a silalaing. (Efe. 6:17) Pudno kadi daytoy kadakayo a mismo? Palubosanyo aya ti Sao iti Dios nga agsao tapno ti nasantuan nga espiritu iti mangsagid ti puso dagiti dumdumngeg?—Prov. 8:1, 6.
2 Saan a kanayon a nalaka ti mangasaba. Masansan a kupado dagiti madanontayo, a mangitukon ti bassit a gundaway a maipaay iti diskusion ti Biblia. Idinto ta ti Biblia isut’ kangrunaan a librotayo, kasanotayo a lalo pay a mausar iti serbisio?
3 Iti Kada Gundaway: Iti kada ruangan, kayattayo nga usaren ti Biblia a mangtignay iti bumalay. Masapul a nakasaganatayo a mangaramid iti daytoy uray no ania a publikasion ti maitukon. No ti tao ket kupado ket awan iti gundaway a mangukag ti Biblia, mabalinyo kadi ti mangkotar iti kasuratan sakbay nga itukonyo ti literatura? Mabalin a dayta laeng ti mamagsarimadeng iti tao a dumngeg.—Heb. 4:12.
4 Kas ehemplo, no dakamatenyo ti Disiembre 8, 1993, nga Agriingkayo! iti “Lubong nga Awanan Sakit,” kalpasan a maitudo ti ilustrasion iti abbong, isaludsodyo, “Patienyo kadi nga agngudonto ti saksakit, inton tunggal maysa ket agsagrap ti naimbag a salun-at?” Aniaman iti sungbat, mabalinyo a basaen wenno ipaawat ti kasuratan, kas iti Isaias 33:24 wenno Apocalipsis 21:4. Iti kastoy a wagas palubosanyo ti Sao iti Dios a makisao.
5 Kadagiti Panagsarungkar: Masapul nga agsaganatayo sakbay nga agsarungkartayo. Masansan, nupay kasta, tumaud dagiti suheto a saantayo a naisagana. Daytoy iti kanito a ti Panakirinnason Manipud Kadagiti Kasuratan ket nausar a kagawaan. Ti panangkotar wenno panangbasa iti kasuratan manipud Panakirinnason a libro ti tumulong iti tattao a kumita a ministronatayo ti Dios ken saan a managlako iti Sao.—2 Cor. 2:17.
6 No sumarungkarkayo iti daydiay awan ti masinunuo a suheto a napagsaritaan, mabalinyo a luktan ti Panakirinnason a libro iti maysa a maitutop a suheto, kas iti “Jesu-Kristo,” “Maudi nga Al-aldaw,” wenno “Panagungar,” ket usaren ti maysa a subtema a mangirubbuat ti diskusion. Mabalin a maawis ti bumalay a bumasa iti dadduma a kasuratan manipud ti mismo a Bibliana. Iti kasta a pamay-an ti Biblia ket mabiag kadakuada, ket ti nasantuan nga espiritu ni Jehova iti agayus no nalinteg ti kananakemda.
7 Ti rebbengentayo a mangikasaba iti naimbag a damag ken mamakdaar ket serioso a banag. Mensahe ni Jehova daytoy, saan a datayo. Bay-anyo iti Saona, ti kampilan iti espiritu, a tumulong kadakayo.