Itatabuno ti Gimong—Maysa a Serioso a Rebbengen
1 Kasano kaserioso ti panangmatmatyo iti itatabuno ti gimong? Palubosan aya dagiti dadduma kadatayo ti panggedan, bannog, trabaho iti balay, sangkabassit a pisikal a sagubanit, wenno bassit a dakes a panawen a manglapped iti obligasiontayo a tumabuno a kanayon kadagiti gimong?—Deut. 31:12.
2 Dadduma kadagiti kakabsattayo ti magna ken bumallasiw kadagiti napeggad a karayan iti adu nga oras tapno makatabunoda laeng iti gimong. Iti kongregasionyo, nalabit nga adda matalek a kakabsat a “saan a pulos limmanglangan” nupay nakaro ti problemada iti salun-at, pisikal a kinabaldado, wenno kadagsen iti sanguen idiay trabaho wenno pagadalan. (Luc. 2:37) Ngem apay nga ikagumaanda ti tumabuno? Agsipud ta ammoda a saanda a masaranget dagiti pakasikoran ditoy lubong iti bukodda a bileg. Kasapulanda ti bileg nga ipaay ti Dios.—2 Cor. 12:9, 10.
3 Kasano kaserioso ti panangmamat ti pamiliayo iti itatabuno ti gimong? Nasken kadi kadakayo a kas iti pannangan ti taraon wenno iti panggedan a trabaho? Kadagiti rabii ti gimong, makisubangkayo aya iti bagbagiyo no tumabunokayo wenno saan, wenno ti kadi regular a pannakikadua iti kakabsatyo ket banag a saan a maipapilit iti sangakabbalayanyo?
4 Kas maysa a pamilia, apay a dikay ipaayan iti nainkararagan a panangusig iti itatabunoyo ti gimong? Kalpasanna aramidenyo ti nasken a panangator iti iskediolyo. Ti regular nga itatabuno iti gimong ket nasken a paset iti teokratiko nga edukasion ket masapul nga ibilangyo a serioso unay a banag.