Patauden ti Interes iti Natalna a Pagarian ti Dios
1 Bayat ti bulan iti Pebrero, dakamatentayo ti libro a Mabalinyo ti Agbiag nga Agnanayon iti Paraiso a Daga. Masapul a ti rantatayo isut’ panangtulong kadagiti nasingpet iti pusoda a tattao a mamataud ti panangipateg iti Pagarian ti Dios ken no ania iti maibanagna. Dagiti panangmatmat a saludsod ti tumulong kadatayo iti daytoy a panggep.
2 Kalpasan ti naingayyeman a kablaaw, mabalintayo a kunaen a kas iti daytoy:
◼ “Mapaspasamak ita iti sangalubongan ti bigla a panagbalbaliw ti gobierno, ket ti kalat a talna isut’ masansan a madakamat. Mariknayo kadi a ti pudno a talna ket maragpat? [Palubosan nga agkomento.] Nupay adu ti kumita iti natauan nga agtuturay a mangyeg ti talna, siputanyo iti kari ti Dios a mangyeg iti talna ditoy Salmo 46:9. [Mabasa.] Ania a panangbaliw ti pagarupenyo nga iyeg iti tignay ti Dios? [Imdengan ti sungbat iti bumalay, sa ipakita ti tract a Biag iti Maysa a Natalna a Baro a Lubong.] Mailadawanyo kadi no ania iti nairetrato ditoy?” Mausig ti salaysay iti baba ti subtema a “Biag iti Baro a Lubong ti Dios.” Mabalintayon a maisaludsod: “Patienyo kadi a ti gobierno ti Dios ket maiyegna dayta a panagbalbaliw?” Iturong iti Kapitulo 13 ti Agbiag nga Agnanayon a libro ken malawagan dagiti umuna a dua a parapo. Maitukon ti libro ken maiyurnos iti sarungkar.
3 Wenno mabalintayo a kunaen:
◼ “Adu ti maseknan maipapan iti problematayo ti kada aldaw. Mariknayo kadi nga adda namnama a gumin-awatayo kadagitoy a problema? [Palubosan nga agkomento.] Marikna dagiti dadduma a di ikaskaso ti Dios ti rigattayo. Timudenyo, nupay kasta, no ania ti karina iti Apocalipsis 21:3, 4.” Basaen dagiti bersikulo. Iti daytoy a punto ti Agbiag nga Agnanayon a libro, ti agdama a magasina, wenno tract a Daytoy Kadi a Lubong Makalasatto? ket mabalin a madakamat. No maitukon iti tract, maipaay ti panangusig iti material idiay pinanid 2 ken 3 idiay baba ti tema a “Ti Masanguanan Daytoy Lubong.” No maipakita ti interes, mabalinyo nga itukon ti Agbiag nga Agnanayon a libro. No itukonyo ti broshur a Pudno Aya a Maseknan ti Dios Kadatayo?, daytoy ti mapataud a saludsod: “Apay a pinalubosan ti Dios iti panagsagaba?” Itudo dayta iti panid 6 ti broshur, ket maiyurnos a malawagan dayta iti sumaruno a bisita.
4 Mabalinyo a pilien nga iparang ti maysa nga artikulo manipud iti agdama a magasina babaen ti panagkomento iti masinunuo a punto manipud napili nga artikulo.
No iyebkas ti bumalay iti interes, maiyammo ti magasina, nalabit babaen iti panagkuna:
◼ “Daytoy nga artikulo ti mangted pay iti ad-adu a detalye maipapan dayta a suheto. [Basaen ti siguden a napili a maysa wenno dua a sentensia.] Ilawlawag daytoy nga artikulo ti kanayonan a punto a mangparegta kadakayo ken iti pamiliayo. Idinto ta interesadokayo iti daytoy a suheto, maragsakankami a mangibati kadakayo iti daytoy a ruar ken ti kaduana a magasina.
5 Dagiti tattao ita ket masansan a maulawda no sadino ti pagturongan a maipaay iti sungbat dagiti problema a naipasango iti sangatauan. Addaantayo ti pribilehio a mangiranud kadakuada iti nabatad a namnama a maipaay ti masakbayan. (Ara. 17:27) Sapay koma ta datayo, ngarud, ti siaalibtak a mangiturong iti asikaso dagiti tattao iti Pagarian ti Dios, ti pudno a gubuayan iti talna.