Pabaludboden ti Panagdakkel Babaen iti Nabagas a Panagsarungkar
1 Tapno matulongan dagidiay mangipakita ti interes, nasken nga ipaay kadakuada iti agayus a naespirituan a taraon babaen ti regular a sarungkar. Ti panagsarungkar isut’ progresibo a tulong a mangpabaludbod iti espiritual a panagdakkelda. (1 Cor. 3:6-9) Tapno nabagas iti sarungkartayo, nupay kasta, nasken nga agsaganatayo a nasakbay, nga adda iti panunottayo dayta a tao.
2 Panagsarungkar Kadagidiay Nabatian iti Tract: Nalabit a ti Natalna a Baro a Lubong a tract iti naipaima idi damo a dupag.
Kalpasan iti ababa a repaso no ania idi ti nalawagan, mabalintayo nga isaludsod:
◼ “Ania a gobierno ti makaiyeg kadagitoy a panagbalbaliw? [Palubosan nga agkomento.] Awan duadua a tagiragsakenyo ti agbiag iti kastoy a kasasaad. Kasano a posible daytoy?” Kalpasanna mausig ti material iti baba ti subtema a “No Kasano a Posible Daytoy Kadakayo.” No maipakita ti interes, maiturong ti asikaso iti Agbiag nga Agnanayon a libro, Kapitulo 15, “Panagbalin nga Iturayan ti Gobierno ti Dios.” Malawlawagan ti umuna a dua a parapo sa maisaludsod: “Kasanotayo nga apektado iti panangadal maipapan ti Dios?” Masungbatan ti saludsod ken maiyurnos a maitultuloy iti diskusion inton sumaruno a bisita.
3 No sarungkaran dagidiay nabatian ti broshur a “Pudno Aya a Maseknan ti Dios Kadatayo?” mabalintayo a kunaen:
◼ “Iti daydi napalabas a sarungkarko napagsaritaantayo dagiti adu a problema a naipasango iti sangatauan ken no ania ti inkari ti Dios nga aramidenna kadakuada. Apay, nupay kasta, a pinalubosan ti Dios iti napaut a panagsagaba? Ti sungbat isut’ masarakan iti paset 6 iti broshur a naibatik kadakayo.” Kalpasan a mausig dagiti sumagmamano a parapo, maisaludsodtayo: “Ania ti kasapulan tapno magunggonaantayo iti karkari ti Dios?” Ti material iti baba ti Seksion 11, “Mabukbukelen ti Pamuon ti Baro a Lubong,” iti pinanid 28-31, ti mabalin a mailawlawag iti diskusion inton sumaruno a sarungkar.
4 Panagsarungkar Kadagidiay Nabatiantayo iti Magasina: No nakapilikayo iti masinunuo nga artikulo a makainteres iti bumalay, patanoren dagiti kanayonan a puntos manipud ti artikulo no agsarungkarkayo, a maipamaysa iti maysa a panulbek a kasuratan ken ti material a mangilawlawag iti dayta. Kasta met a maawis ti asikaso iti sumaruno a ruar ti magasina a naglaon iti artikulo ti isu met laeng a suheto. Ta no saan a kasta, mabalintayo a maiturong iti material idiay Agbiag nga Agnanayon a libro iti dayta a suheto ken maiyurnos dayta ti sumaruno a bisita.
5 Ti panangipakita iti personal nga interes babaen ti regular a panagsarungkar idemostrana iti ayattayo kadakuada ken ni Jehova. (Juan 13:34, 35) Itultuloytayo koma a pabaludboden iti espiritual a panagdakkel dagidiay adda iti teritoriatayo babaen ti regular a nabagas a panagsarungkartayo.