Personal a Panagadal—Maysa a Banag a Pakaseknan
1 Ania a bambanag iti serioso a pakaseknan? Masapul a maseknantayo a mangpatanor ken mangsalimetmet ti nadekket a relasion ken Jehova. Ti personal a panagadal alaenna ti nasken a papel a mangpataud iti dayta a kinasinged. Kadagitoy nga aldaw, saan nga adu kadatayo ti makaipaay iti napaut a tiempo iti personal a panagadal. Kaskasdi, no ditay basaen a kanayon iti Sao ti Dios, agkapoytayo a mangsaranget iti espiritu ti lubong ken iti nainlasagan a tarigagayna.
2 Patanoren ti Panagtarigagay iti Sao: Idi damotayo a naadal iti panggep ti Dios, nalabit a nagagartayo a mangadal pay iti ad-adu a pannakaammo. Iti panaglabas ti tiempo, nupay kasta, ti panagbisin iti espiritual a taraon ket nalabit a kimmapoy. Mabalin a kasapulan a “patanorenyo ti panagtarigagay” iti espiritual a taraon. (1 Ped. 2:2) Kasano a mapataud ti kasta a panagtarigagay?
3 Ti sayamusom iti paborito a taraon isut’ manggutugot iti ganastayo. Ti ababa a kapaut iti panagadal apektarannatayo ti kaasping a wagas iti espiritual. Ti panangsagrap iti sumagmamano nga espiritual a puntos ti mangpaganas iti panagramantayo iti naun-uneg a kinapudno.
4 Patanoren ti Rutina a Kasayaatan Kadakayo: Ipuera dagiti dadduma ti intero a rumabii iti personal a panagadal, bayat a kaykayat dagiti sabsabali iti ababa ngem masansan a periodo ti panagadal. No masarakanyo a mas maisentroyo iti agsapa unay, mabalinyo nga ikeddeng ti panagadal iti sakbay ti pamigat. No mas nasalagisagkayo iti rumabii, mabalinyo ti agadal sakbay a maturogkayo. Ti nasken a banag isu ti kinaregular ken panagintekyo iti rutina a kasayaatan idiay kasapulanyo.
5 No maiparegta ti lalo pay a panagadal, nalabit a kunaentayo a napunnon ti iskedioltayo. Nupay kasta, masapul a napudnotayo maipapan ti panangbaluar no kasano a mausar ti tiempotayo. Adu kadi nga oras ti mabusbos iti kada aldaw a panagbuya ti telebision? Ti napudno a panangusig iti iskedioltayo ti nalabit a mangibuksil iti tiempo ti kada aldaw a mabalin koma a mausar iti personal a panagadal.—Efe. 5:15, 16.
6 Ti panagadal iti Sao ti Dios ket maiparbeng iti saan a mabingay nga asikasotayo. No agannayastayo nga agadal bayat ti pannangan, panagdengngeg ti radio, wenno panagbuya ti telebision, saantayo a maagsep dagiti padasentayo nga adalen. (1 Tim. 4:15) Gapuna a kasapulan ti panangidian kadagiti pakasingaan.—Kitaenyo ti Giya ti Eskuelaan, pinanid 33-4.
7 Ti inaldaw a panagadal iti pammagbaga ti Biblia ket nasken agsipud ta isut’ pangawatantayo iti panangiwanwan ni Jehova. Gundawayanyo ti kada oportunidad, uray kasano ti kabiitna, ti panagbasa, panagrepaso, wenno panagmennamenna kadagiti espiritual a bambanag.—Deut. 6:6-8; Col. 1:9, 10.