Kanayon nga Adu ti Aramiden
1 Kadagiti tattao ni Jehova, kanayon nga ‘adu ti aramidenda iti trabaho ti Apo.’ (1 Cor. 15:58) Addada linawas a gimong a masapul nga isagana ken tabunuan. Maparegtatayo a makiraman iti tay-ak ti ministerio ti kada lawas. Maitaning ti tiempo iti personal a panagadal ti pamilia. Adu ti naituding nga akmen dagiti panglakayen ken ministerial nga adipen iti kongregasion. No dadduma makiddaw kadatayo a tumulong kadagidiay agkasapulan. Mainayon pay, adda obligasiontayo a mainaig iti pamilia, iti panggedan, ken iti pagadalan.
2 Sagpaminsan, dadduma kadatayo ti makarikna iti pannakakumikom iti adu a sanguen. Kaskasdi, dagiti kakupaduan a tattao isuda ti karagsakan no masalimetmetan ti kinatimbeng ken umiso a panangimaton.—Ecl. 3:12, 13.
3 Maysa ni apostol Pablo kadagiti aduan ti trabaho. Nagbannog iti nakaro ngem kadagiti dadduma nga apostol. Napinget ti panagtrabahona kas managibanghelio, bayat a saanna a liniwayan dagiti rebbengenna kas pastor iti arban. Malaksid kadagita, tinamingna dagiti bukodna a kasapulan babaen ti panagtrabahona kas managaramid iti tolda. (Ara. 20:20, 21, 31, 34, 35) Malaksid iti kakupado ti iskediolna, kanayon a sigagagar ni Pablo a mangaramid pay ti ad-adu iti serbisio ni Jehova.—Maidilig iti Roma 1:13-15.
4 Sinalimetmetan ni Pablo ti kinatimbeng ken naragsak a puso babaen ti panagtalekna ken Jehova a maipaay iti pigsa. (Fil. 4:13) Ammona a ti Dios ket saanna a malipatan dagiti bannogna. (Heb. 6:10) Ti rag-o a tumulong iti dadduma a mangammo ken Jehova isut’ namapigsa kenkuana. (1 Tes. 2:19, 20) Ti pammatalged iti naibatay ti Biblia a namnamana isut’ nangtarabay kenkuana a nagtalinaed a nagaget.—Heb. 6:11.
5 Usigentayo met ti naimbag a resulta iti panagbannogtayo. Ti pannakipaset kadagiti gimong isut’ agserbi a pammabileg iti sabsabali. (Heb. 10:24, 25) Ti reggettayo a mangidanon ti naimbag a damag iti amin isut’ taudan ti panagrang-ay ti kongregasion bayat a dagiti agdadamo ket makitimpuyogda kadatayo. (Juan 15:8) Ti panangbadang iti dadduma nga agkasapulan isut’ mangparnuay iti nadekket, napamiliaan nga espiritu ti kongregasion. (Sant. 1:27) Kanayonanna pay, ditay koma lipatan nga ti kinakupado iti naimbag nga ar-aramid ket makaay-ayo ken Jehova a Dios. Matmatantayo a dakkel a pribilehio iti agserbi kenkuana. Kadatayo awanen ti nasaysayaat pay a biag.
6 Adda pay mainayon a gunggona iti kinaadu ti trabaho. No kupadotayo iti espiritual a bambanag, naparpartak ti panaglabas ti tiempo. No mailasintayo a ti kada aldaw nga aglabas ket iyasidegnatayo iti baro a lubong, siraragsaktayo a mangawat iti nakupado a biag a sagsagrapentayo itan. Mabigbigtayo met ti kinasirib iti panagtalinaed a kupado, idinto ta basbassit ti tiempo a mairaman kadagiti awan kaeskanna a nailubongan a gakgakat.—Efe. 5:15, 16.
7 Pudno, aduantayo ti trabaho a mainaig iti Apo. Ngem makapagtalinaedtayo a naragsak no agsammakedtayo ken Jehova a Dios ken ni Kristo Jesus, isuda a mangaramid iti serbisiotayo a makabang-ar ken makagunggona.—Mat. 11:28-30; 1 Juan 5:3.