Panangmarka a Mangyeg iti Pannakaisalakan
1 Idi kaaldawan ni Ezequiel, pinamarkaan ni Jehova dagidiay agsasainnek ken agas-asug gapu kadagiti makarimon a bambanag a maar-aramid, a mangipanamnama iti pannakaisalakanda. (Ezeq. 9:4-6) Ti trabahotayo a panangasaba ita ti mangibanag iti isu met laeng a panggep. Mabalintay ti maaddaan iti napateg nga akem iti daytoy panangmarka a trabaho.
2 Ti panangsarak kadagiti napasnek a tattao isu ti umuna laeng nga addang. Yurnostayo ti panagsarungkar. Agpannuray ti balligitayo iti insaganatay a sawen no agsublitayo.
3 Ti panangsaruno iti naipaima a “Ti Pagwanawanan,” mabalinyo nga iturong iti kangrunaan a tema:
◼ “Paliiwenyo ta iti parupa Ti Pagwanawanan agparang ti sasao a ‘Mangibumbunannag ti Pagarian ni Jehova.’ Nagpaiduma dayta agsipud ta itandudona ti Pagarian ti Dios kas kakaisuna a solusion dagiti problema ti lubong. Isu daytoy ti naimbag a damag a nakuna ni Jesus a masapul a maideklara iti amin a daga.” Basaenyo ti Mateo 24:14, sayo ilawlawag no kasano a Ti Pagwanawanan ket magun-odan a regular ken mausar iti personal a panagadal iti Biblia.
4 Nalabit a kaykayatyo nga iturong laeng iti mismo a Biblia ken igunamgunam ti kinapateg ti panangbasa a kanayon iti dayta. Mabalinyo a kunaen:
◼ “Agminar a gistay tunggal maysa ket kayatna ti maaddaan iti sumagmamano a praktikal a pammagbaga no kasano a masaranget dagiti problema iti inaldaw a panagbiag. Sadino ti pagarupyo a pakasarakan iti pammagbaga a mapagtalkantayo? [Palubosan a sumungbat.] Adu dagiti nagtalek iti balakad dagiti gagayyem wenno nagbayad a maipaay iti propesional a pammalakad ti napaay. Iti sabali a bangir, minilion a tattao ti nakasarak a ti Biblia itedna ti pammalakad a mabalinda a pagtalkan. Ipakitana no kasanotay a masaranget ti aniaman a problema a maipasango kadatayo. [Basaen ti 2 Timoteo 3:16, 17.] Ipakitak kadakayo no kasano a mausaryo dayta a manglukat iti kamalig ti gameng dagiti masirib a pammagbaga.” Itultuloy babaen ti panangiturong iti “Ayat” iti benneg a “Bible Words Indexed” iti likud ti New World Translation, ken itudo dagiti sumagmamano a teksto a mangipakita no kasano a ti ayat tumulong kadatayo a mangsolbar kadagiti di pagkikinnaawatan iti sabsabali.
5 Buyogen ti kalat a mangirugi ti panagadal iti Biblia iti libro a “Mabalinyo ti Agbiag nga Agnanayon iti Paraiso a Daga,” apay a dikay ipadas daytoy nga introduksion?:
◼ “Kasano a magunggonaan ti pamiliayo iti panagbiag iti maysa a lubong a kas itoy?” Ipakita dagiti ilustrasion iti pinanid 156-7, kalpasanna basaen ti maysa wenno dua a kasuratan a naadaw kadagidiay a pinanid, ken ilawlawag a dagitoy ti inkari ni Jehova a Dios, a di agulbod. Iturong iti listaan dagiti kapitulo idiay pinanid 5-6, ket saludsoden iti bumalay no ania a suheto ti paginteresanna unay; iturong iti kapitulo a pilienna, a pagsaritaan ti maysa wenno dua a parapo.
6 Kayatyo kadi a tulongan ti sabali a tao a mamarkaan a maipaay iti pannakaisalakan? No kasta, ‘an-anayenyo nga itungpal ti ministerioyo’ babaen ti panagsagana a naimbag ken nasapa a panagsubli kadagiti amin nga interesado a masarakanyo.—2 Tim. 4:5.