Agsarungkarkayo Tapno Maispal ti Dadduma
1 Pagayatan ti Dios a “maisalakan koma dagiti amin a kita ti tattao ken dumtengda iti umiso a pannakaammo iti kinapudno.” (1 Tim. 2:4) Aniat’ maitulongtayo? Agsarungkar a ti panggep ket isuro ti kinapudno. Ania ti sawenyo? Mabalin a matulongannakay dagiti sumaruno a singasing.
2 No naibatiyo ti libro a “Ti Panangbiruk ti Sangatauan iti Dios,” mabalinyo nga ituloy ti saritaan babaen ti panagkuna:
◼ “Idi naudi nga ibibisitak nagsaritaantayo dagiti lima a saludsod a timmulong iti panangusigtayo no naibasar iti Biblia ti relihiontayo. Nagundawayanyo kadi a kinita daytoy? [Palubosan a sumungbat.] Idinto ta medio kupadokayo idi, mabalin nga alaenyo ti libroyo ket intay kitaen ti umuna a saludsod idiay panid 17.” Kalpasanna ilawlawag no ania ti kuna ti Biblia maipapan iti kararua, nga usaren ti Genesis 2:7 ken Ezequiel 18:4. No adda interes ti bumalay, iyurnos ti panagsubli iti sumaruno a lawas sa ituloyyo ti agsarita.
3 Adtoy ti sabali a singasing a mabalinyo a padasen:
◼ “Idi napalabas napagsaritaantayo ti maysa kadagiti pakabigbigan ti pudno a relihion. Malagipyo pay no ania daydi? [Palubosan ti bumalay a sumungbat.] Ita adtoy ti sabali pay a pakabigbigan, a nadakamat iti Juan 13:34, 35. [Basaen.] Ti kunayo ipakpakita ngata dagiti amin a relihion daytoy a kita ti ayat iti maysa ken maysa? Ilawlawag ti libro a naibatik kadakayo daytoy a suheto iti kaptitulo 15, ditoy panid 344. Kayatko nga ipakita kadakayo dagiti dadduma a punto a nagustuak iti dayta a kapitulo.” Pagsaritaan ti sumagmamano a parapo sa iyurnos ti sumaganad a panagsarita.
4 No sarungkaranyo ti maysa nga immawat iti libro a “True Peace and Security—How Can You Find It?” mabalinyo nga iturong manen iti ilustrasion idiay panid 4 sa saludsoden iti bumalay:
◼ “Kalpasan ti kanayonan a panangsukimat iti libro a naibatik kadakayo ken panangpanunot iti kari ti Dios a paraiso a daga, ania ti riknayo maipapan kadagiti nakaskasdaaw a kari ti Dios maipaay iti sangatauan?” Kalpasan ti panangawat iti sungbat ti bumalay ken ababa a panangkomento iti dayta, mabalin nga iyawisyo ti atensionna iti kapitulo 2 ken 3 sa isingasing nga usigenna no apay a dagiti pamuspusan ti tao a maipaay iti talna ken talged, agraman dagidiay narelihiosuan a panagregget, ket napaayda.
5 Laglagipenyo a ti kalat iti panagsubli isut’ panangirugi kadagiti panagadal iti Biblia. Mabalin nga irugi ti panagadal iti uray ania a kapitulo ti libro a Panangbiruk iti Dios, ngem gagangay a kayattayo a maiturongda kadagiti Panangbiruk iti Dios kapitulo 15 ken 16. Sa, kalpasan ti sumagmamano a panagadal, mabalin a kayattayo nga iturong iti libro a maadal a mangilawlawag kadagiti pamunganayan a doktrina. Maragsakantayto unay bayat a masursuro dagidiay agad-adal ti umawag ken Jehova a maipaay ti pannakaisalakan.—Ara. 2:21.