Apay a Mairekord Dagidiay Di Madanon iti Pagtaenganda?
1 Maysa a pagassawaan a Saksi ti rimmuar iti tay-ak ti serbisio a nasapa iti dayta nga aldaw. Kalpasanna iti dayta met laeng nga aldaw, nagsublida a sumarungkar kadagiti dida nadanon iti pagtaenganda iti dayta a teritoria. Maysa a lalaki ti nangpastrek kadakuada ken dimngeg a sipapasnek. Nangala iti Agbiag nga Agnanayon a libro ken sinaludsodna no dagiti Saksi ket agsublida. Awan pay ti nakasarsaritana a Saksi ni Jehova idi ket adu dagiti saludsodna a kayatna a masungbatan; maysa a panagadal iti Biblia ti nairugi. Naragsakan unay dagitoy nga agassawa a nakasarak iti kasta a marakarnero a tao. Kayatyo kadi ti maaddaan iti kasta a kapadasan? Ti panangirekord kadagiti saan a madanon iti pagtaenganda ken panangsarungkar a dagus ti mamagbalin a posible dayta.
2 Kanayon a maigunamgunam ti panangaramid iti umiso a rekord dagiti di madanon iti pagtaenganda ken panangsarungkar kadakuada a dagus. Kas ipakita ti kapadasan iti ngato, ti panagsubli iti isu met laeng nga aldaw mabalin a mangyeg kadagiti nasayaat a resulta. Nupay rantaentayo a wanasen ti naituding a teritoria, nalabit a saantayo a nainget a mangsalimetmet iti rekord kadagidiay awan idiay taengda. Kuna ti dadduma: ‘Trabahuenmi ti teritoriami iti kada dua wenno tallo a lawas; saanen a kasapulan ti mangaramid iti kasta a rekord agsipud ta agsublikami met laeng iti saan a mabayag.’ Ngem dayta ti ad-adda a panggapuantayo a mangidulin iti rekord. Kadagidiay teritoria a masansan a mawanas, ti panagsubli kadagiti di nadanon iti pagtaengan ti tumulong kadatayo a mas naan-anay iti panangsarak kadagidiay a maikari. Kasano a kasta?
3 Iti dadduma a lugar, adu kadagiti residente ti awan iti balayda bayat ti aldaw. Gapuna, iti aktual, umadu ti teritoriatayo no lalo a maipamaysa kadagidiay di madandanon iti taengda. Uray pay no saan a masansan a matrabaho ti teritoria, mapasayaat ti resulta no ikagumaantay a danonen ti tunggal maysa sakbay a markaan ti teritoria a natrabahon.
4 Ti panagsarungkar kadagiti di nadanon iti pagtaenganda ti masansan a mayurnos iti sabali nga aldaw, no mabalbalin iti uneg ti makalawas. Adu ti nakasarak a nasaysayaat ti agsubli iti aldaw a naiduma ti oras manipud iti immuna nga isasarungkar. Mabalinyo a pilien ti dadduma nga oras iti Sabado wenno Domingo a pangsurnad kadagidiay awan iti balayda a nailista bayat ti ngalay ti lawas. Kas sabali a posibilidad, adu a kongregasion ti makasarak a ti kasta a panagsarungkar iti sardam ket nabunga. Mabalin a nasurok a kagudua kadagiti residente ti madanonda iti pagtaenganda.
5 Masapul nga ilistayo dagiti panagsarungkar iti naisina a rekord. No saanyo a masublian dagidiay saan a nadanon iti taengda, ti rekordyo kadagiti di nadanon iti pagtaenganda ket masapul a maited iti kabsat a mangimaton iti grupo, a mausar ti sumaruno a grupo a mapan iti dayta a teritoria.
6 Ti panangipaay iti nainget nga atension iti daytoy a benneg ti ministeriotayo ti mangparang-ay iti kinabungatayo agraman rag-otayo. Mangted dayta kadatayo iti pannakapnek nga agtaud iti pannakaammo a naan-anay ti panangbirok ken panangtaripatotayo kadagidiay marakarnero a tattao.—Ezeq. 34:11-14.