Panangiparang ti Naimbag a Damag—Panangusar iti House-to-House Record
1 “Naan-anay nga inkasabak ti naimbag a damag.” (Roma 15:19) Dagitoy a sasao ni Pablo isut’ mangipakita iti gagetna a mangasaba, mangisuro, ken agaramid iti disipulo.
2 Kayattayo met iti kasta a panangiringpas idiay naituding a teritoriatayo. Agngangabit iti biag kadagitoy napeggad a tiempo. Ti saan a panamakdaar kadagiti tattao ket agbanag iti panagbasol ti dara. (Ezek. 3:18, 19) Kas ken Pablo, kayattayo met a kunaen a “nadalusak manipud iti dara dagiti amin a tattao.” (Ara. 20:26) Kasanotayo a mas naan-anay a matrabaho iti teritoriatayo? Ti umiso a panangusar iti House-to-House Record a porma isut’ makatulong.
NO AWAN TI BUMALAY
3 Ti kompleto a rekord dagiti saan a madanon iti pagtaengan isut’ kasapulan tapno mawanas ti teritoriatayo nga sieepektibo. Masapul a ganetgetantayo a danonen iti kada bumalay. No awan ti bumalay, masapul nga inotartayo iti house-to-house record. Kalpasanna masapul nga agsublitayo tapno mangtedtayo iti pammaneknek kadagiti bumalay.
4 Tapno madanon dagidiay awan iti balayda iti umuna a dupag, usaren dagiti dadduma iti house-to-house record, nga agsublida iti malem dayta met laeng nga aldaw. Wenno padasenda ti sumarungkar iti sabali nga aldaw wenno iti sabali nga oras. Masarakan dagiti dadduma a ti panagsarungkar iti rumabii ket mangyeg iti naimbag a resulta. Aramiden met dagiti sabsabali iti panagtelepono wenno panagsurat no ti mauli-ulit a panagbisita kadagita a pagtaengan ket saan nga agballigi.
NO ADDA INTERES A MASARAKAN
5 No makasarakkayo iti interes, irekordyo dayta. Isuratyo ti nagan daydiay tao, ti direksionna, ken aniaman a makatulong nga impormasion. No saanyo a maranaan daytoy interesado a tao iti kalpasan ti adu a sarungkar, nalabit a makatulong no baliwanyo iti aldaw wenno oras ti ipapanyo. Saankayo koma a nadaras a maupay kadagidiay a nangipakita iti interes.
6 Nangituyang ni apostol Pablo iti naimbag nga ehemplo kadatayo. Isut’ “naan-anay a nangpaneknek” idiay naituding a teritoriana. Ti panangusar iti house-to-house record iti umiso isut’ tumulong kadatayo a mangaramid met iti kasta. Ket anian a rag-o ti maadda kadatayo no adu pay dagiti agbalin a disipulo ni Jesu-Kristo! Iti kasta, mabalintayo a kunaen, kas ken Pablo: “Nadalusak manipud iti dara dagiti amin a tattao.”—Ara. 20:21, 26.