Ikasabayo ti Pagarian
1 Iti Hebreo 10:23, maidagadag a “petpetantayo koma a siiirut ti publiko a panangideklara iti namnamatayo.” Ket ti namnamatayo adda iti Pagarian ti Dios. Imbilin ni Jesus a masapul a maikasaba ti naimbag a damag ti Pagarian iti amin a nasion. (Mar. 13:10) Nasken a laglagipentayo daytoy iti ministeriotayo.
2 No madanontayo dagiti tattao, ikagumaantayo nga irugi ti saritaan maipapan iti banag a pakaseknanda. Masansan a dakamatentayo dagiti bambanag a pagaammoda, kas iti krimen iti sangakaarrubaan, ti parparikut dagiti agtutubo, pakaringgoran maipapan iti panagsapul iti pagbiag, wenno dakes a kasasaad ti lubong. Tangay dagitoy a “pakaringgoran iti biag” ti pampanunoten ti kaaduan a tao, no madakamattayo ida, masansan nga iyebkas dagiti tattao ti adda iti panunotda. (Luc. 21:34) Mabalin nga ikkannatay daytoy iti gundaway a mangiranud iti namnamatayo.
3 Nupay kasta, no saantayo a naannad, mabalin a maipamaysa ti saritaan kadagiti negatibo a bambanag agingga iti punto a mapaaytayo a mangitungpal iti panggep ti isasarungkartayo—nga ikasaba ti mensahe ti Pagarian. Nupay mabalintay a pagsaritaan dagiti dakes a kasasaad, ti panggeptayo isu ti panangiturong ti atension iti Pagarian, a mangsolbarto iti amin a problema ti sangatauan. Addaantayo iti nakaskasdaaw a namnama a masapul a mangngegan dagiti tattao. Isu a nupay mabalintay a pagsaritaan nga umuna dagitoy “napeggad a tiempo a narigat a pakilangenan,” iturongtay koma a dagus ti saritaan iti kangrunaan a mensahetayo, ti “agnanayon a naimbag a damag.” Iti kastoy a wagas, maitungpaltayo a naan-anay ti ministeriotayo.—2 Tim. 3:1; 4:5; Apoc. 14:6.