Saludsod

◼ Ania ti rumbeng a tandaanan maipapan iti panagbasa kadagiti parapo iti gimong?

Nawadwad ti tiempo a mausar iti panagbasa kadagiti parapo iti Panagadal iti Pagwanawanan ken Panagadal ti Kongregasion iti Libro. Kaipapanan daytoy nga addaan ti kabsat a natudingan a para-basa iti nadagsen a responsabilidad kas mannursuro. Masapul nga agbasa iti wagas a ‘maikkan iti kaipapanan’ ti material tapno saan laeng a maawatan dagiti agdengdengngeg no di ket magutugotda pay nga agtignay. (Neh. 8:8) Masapul ngarud nga agsagana a naimbag ti para-basa. (1 Tim. 4:13; kitaenyo ti adalen 6 iti Giya ti Eskuelaan.) Adtoy ti dadduma a nasken iti nabagas a panagbasa iti publiko.

Tumutop a Panangipaganetget: Antemano nga ikeddengyo no ania a sasao ti kasapulan a maipaganetget tapno mayallatiw ti husto a pannakaawat.

Baliksenyo a Siuumiso Dagiti Sao: Nasken ti umiso ken nalawag a panagibalikas tapno maawatan dagiti agdengdengngeg dagiti ebkas iti publikasion. Kitaenyo iti diksionario dagiti sao a saanyo a maawatan.

Agsaokayo iti Napigsa ken Narayray: Ti narayray a panagsao ket makapainteres, riingenna ti rikna, ken tignayenna ti agdengdengngeg.

Napasnek ken Kasla Makisasaokayo: Nasayud no natural ti panagbasa. No agsagana ken agensayo, kalmado ti para-basa, ken makaay-ayo [ti panagbasana] imbes a makauma ken makapasikor.—Heb. 2:2.

Basaenyo No Ania ti Naisurat: Dagiti footnote agraman impormasion iti parentheses wenno bracket ket kadawyan a maibasa iti napigsa no lawlawaganda ti naisurat. Dagiti laeng reperensia a mangipakita iti gubuayan ti material ti saan a maibasa. Masapul a maibasa ti footnote a natukoy iti parapo, a mairugi iti kastoy: “Kuna ti footnote . . . ” Kalpasan a maibasa, basta ituloyyo a basaen ti natda iti parapo.

No nasayaat ti panagbasa iti publiko, maysa dayta a pamay-an a ‘maisurotayo dagiti sabsabali a mangalagad kadagiti amin a bambanag nga imbilin’ ti Naindaklan a Mannursurotayo.—Mat. 28:20.