Addaantayo iti Komision
1 Binilin ni Jesus dagiti pasurotna a ‘mangaramid kadagiti adalan a tattao iti isuamin a nasnasion.’ (Mat. 28:19) Iti 232 a pagilian ken isla iti aglawlaw ti daga, nasurok a lima a milion a managdaydayaw ken Jehova a Dios ti mangipapaay iti nabiag a pammaneknek iti kaitungpalan ti bilin ni Jesus. Ngem komusta ti tunggal maysa kadatayo? Ipaspasnektay met laeng kadi ti komisiontayo a mangasaba?
2 Moral nga Obligasion: Ti komision ket “maysa a bilin a mangitungpal iti naituding nga aramid.” Binilinnatayo ni Kristo a mangasaba. (Ara. 10:42) Nabigbig ni apostol Pablo a mangipabaklay daytoy kenkuana iti panagkasapulan, wenno moral nga obligasion. (1 Cor. 9:16) Kas panangiladawan: Ibagatayon a maysaka a tripolante ti lumlumned a bapor. Imbilin ti kapitan a pakdaaram dagiti pasahero ken iturongmo ida kadagiti pangsalbar a baluto. Dimo kadi ikaskaso dayta a bilin ket ti laeng bagim ti salbarem? Sigurado a saan! Agpegpeggad ti biag dagiti dadduma! Adda moral nga obligasionmo a mangitungpal iti komisionmo a tumulong kadakuada.
3 Binilinnatayo ti Dios a mamakdaar. Iti mabiit gibusanto ni Jehova daytoy intero a dakes a sistema dagiti bambanag. Minilion a biag ti agpegpeggad! Umiso aya kadatayo a di ikankano ti panagpeligro dagiti sabsabali ket ti laeng pannakaisalakantayo ti panunotentayo? Siempre, saan! Adda moral nga obligasiontayo a tumulong a mangsalbar iti biag dagiti dadduma.—1 Tim. 4:16.
4 Dagiti Matalek a Pagulidanan a Tuladen: Narikna ni mammadto Ezequiel a pagrebbenganna a pakdaaran dagiti di matalek nga Israelita. Pinakdaaran ni Jehova maipapan iti mapasamak no dina aramiden ti annongenna: “Inton kunak iti managdakdakes, Pudno a mataykanto; ket isu dika pakdaaran . . . , daytoy met laeng a managdakdakes matayto iti kinadakesna; ngem ti darana sapulekto iti imam.” (Ezeq. 3:18) Sisusungdo ni Ezequiel a nangitungpal iti annongenna uray pay iti sango ti nakaro nga ibubusor. Iti kasta, mabalinna ti agrag-o idi inwayat ni Jehova ti panangukomna.
5 Sinigsiglo kalpasanna, nagsurat ni apostol Pablo maipapan iti responsabilidadna a mangasaba. Kinunana: “Nadalusak iti dara dagiti amin a tattao, ta diak minedmedan ti panangibaga kadakayo iti isuamin a pammatigmaan ti Dios.” Nangasaba ni Pablo iti publiko ken kadagiti balbalay agsipud ta nabigbigna a no dina aramiden dayta makabasol iti dara iti imatang ti Dios.—Ara. 20:20, 26, 27.
6 Addaantayo kadi iti regta ni Ezequiel? Mariknatayo kadi a masapul a mangasabatayo a kas ken Pablo? Rinibribu pay ti mabalin a mangipangag iti mensahe ti Pagarian ken mangikuna: “Kumuyogkaminto kenka, ta nangngegmi a ti Dios adda kenka.” (Zac. 8:23) Sapay koma ta ti ayattayo iti Dios ken iti padatayo a tao ti mangtignay kadatayo a di sumuko. Addaantayo iti komision a mangasaba!