Saludsod
◼ No makiddaw ti kongregasion a tumulong a mangyurnos iti pumpon, mabalin a tumaud dagiti sumaganad a saludsod:
Siasino ti rumbeng a mangipaay iti pamumpon a diskurso? Dagiti miembro ti pamilia ti mangikeddeng iti daytoy. Mabalinda a pilien ti siasinoman a bautisado a kabsat a lalaki a naimbag ti pakasaritaanna. No makiddaw ti bagi dagiti panglakayen a mangibaon iti ispiker, kadawyanna a pumilida iti maysa a makabael a panglakayen a mangipaay iti palawag a naibatay iti balabala ti Sosiedad.
Mabalin kadi nga usaren ti Kingdom Hall? Wen, no ipalubos ti bagi dagiti panglakayen ken no saanna a singaen ti regular nga eskediul dagiti gimong. Mabalin nga usaren ti Kingdom Hall no nasayaat ti pakasaritaan ti pimmusay ken maysa a miembro ti kongregasion wenno minor de edad nga anak ti maysa a miembro. No adda di nakristianuan nga aramidna a nagdindinamagan dagiti tao, mabalin a di ipalubos dagiti panglakayen a mausar ti Kingdom Hall.—Kitaenyo ti libro a Ministeriotayo, panid 62-3.
Kadawyanna, saan a mausar dagiti Kingdom Hall iti pumpon dagiti di manamati. Ngem mabalin nga usaren no aktibo a naikameng kas bautisado nga agibumbunannag dagiti nagminatay a miembro ti pamilia, ammo ti adu nga agibumbunannag iti kongregasion a mangipangag ti pimmusay iti kinapudno ken nasayaat ti pakasaritaanna iti komunidad, ken saan a malaokan ti programa kadagiti nailubongan a kustombre. Awan koma ti maaramid a pakaibabainan wenno pakababalawan ti kongregasion.
No ipalubosda a mausar ti Kingdom Hall, utoben dagiti panglakayen no kannawidan iti lugarda a maiparang ti lungon iti pumpon. No kannawidan, mabalin nga ipalubosda a maiserrek dayta iti Kingdom Hall.
Ti ngay panamumpon kadagiti tattao ti lubong? No naimbag ti pakasaritaan ti pimmusay iti komunidad, mabalin a mangipaay ti maysa a kabsat a lalaki iti makaliwliwa a palawag iti Biblia iti puneraria wenno iti pagitaneman. Saan a mamumpon ti kongregasion para iti maysa a tao nga agdindinamag gapu iti imoral, kinakaniwas nga aramid wenno maisalungasing kadagiti prinsipio ti Biblia ti kabibiagna. Sigurado a saan a mamumpon ti maysa a kabsat a kadua ti maysa a klero wenno no maangay ti pumpon iti simbaan ti Babilonia a Dakkel.
No ngay nailaksid ti pimmusay? Kaaduanna, saan a makiraman ti kongregasion, ken saan met a mabalin nga usaren ti Kingdom Hall. No ipakpakita idi ti tao a pimmusay nga agbabbabawin ken tarigagayanna ti maisubli, mabalin nga ipalubos ti konsiensia ti maysa a kabsat a mangipaay iti palawag iti Biblia iti puneraria wenno iti pagitaneman, tapno makasabaan dagiti di manamati ken maliwliwa dagiti kabagian. Nupay kasta, sakbay a desisionanna daytoy, nainsiriban a makiuman dayta a kabsat iti bagi dagiti panglakayen ken utobenna ti singasingda. No saan a nainsiriban a makiraman dayta a kabsat, mabalin a maikanatad a ti kabsat a lalaki a miembro ti pamilia ti pimmusay ti mangipaay iti palawag tapno maliwliwa dagiti kabagianna.—Kitaenyo Ti Pagwanawanan nga Oktubre 15, 1990, panid 30-1; Marso 15, 1982, panid 26; ken Disiembre 1, 1977, panid 720-1.