Apay nga Ar-aramidenda?
1 Naipadto maipapan ken Kristo nga ‘isu ket ibusen ti anep iti balay ti Dios.’ (Sal. 69:9) Ti anep ni Jesus iti pudno a panagdayaw ken Jehova ti nangtignay kenkuana a mangyun-una iti ministerio. (Luc. 4:43; Juan 18:37) Maanninaw met ita daytoy nga anep iti ministerio dagiti Saksi ni Jehova. Iti napalabas a tawen serbisio, agpromedio iti 645,509 ti nagserbi kas payunir kada bulan iti sangalubongan. Gapu iti dedikasiontayo iti Dios, nainkararagan nga usigen koma ti tunggal maysa kadatayo no makapagserbitayo kas auxiliary wenno regular pioneer.—Sal. 110:3; Ecl. 12:1; Roma 12:1.
2 Adu iti daytoy materialistiko a lubong ti marigatan a mangtarus no apay adda dagidiay nakasasaet iti ministerio idinto ta saanda nga umaw-awat iti kuarta wenno kinalatak. Apay nga ar-aramidenda dayta? Ammo dagiti payunir a makiramramanda iti trabaho a panangispal iti biag. Gapu iti ayatda ken Jehova ken iti padada a tao, mariknada ti personal nga obligasion a tumulong a mangispal iti biag. (Roma 1:14-16; 1 Tim. 2:4; 4:16) Kinuna ti agassawa a payunir: “Apay nga agpaypayunirkami? Maikalinteganmi aya ken Jehova no saankami a nagpayunir?”
3 Kastoy ti insurat ti sabali pay a kabsat a babai maipapan iti desisionna a mangrugi nga agpayunir: “Implanomi ken lakayko nga iyan-anaymi a pagbiag ti adda a masapulanmi, a kaipapananna ti panangiwaksi iti amin a saan a napateg. Kaskasdi, sibabaknang a binendisionannakami ni Jehova, pulos a dinakam binaybay-an. . . . Nakasarakak iti napaypayso a panggapuan nga agbiag—ti panangtulong kadagiti agkasapulan a mangammo a saan nga adayo ni Jehova kadagidiay agsapsapul kenkuana.” Kontento dagiti payunir kadagiti kangrunaan a masapsapul iti biag bayat a sipapasnek nga ikagkagumaanda a gun-oden dagiti naespirituan a gameng nga agtalinaed iti agnanayon.—1 Tim. 6:8, 18, 19.
4 No ipalubos ti kasasaadyo, apay a dikay danggayan dagiti ginasut a ribu a payunir iti sangalubongan ket tagiragsakenyo met ti rag-o a sagsagrapenda?