Tulonganyo Dagiti Di Manamati nga Assawa

¹ Paggubuayan ti dakkel a rag-o no agkaykaysa dagiti agassawa iti pudno a panagdayaw. Nupay kasta, iti adu a pamilia ti laeng maysa nga asawa ti immawat iti kinapudno. Kasanotayo a matulongan dagitoy di manamati nga assawa ket maparegtatay ida nga agdayaw ken Jehova a kaduatayo?—1 Tim. 2:1-4.

² Tarusanyo ti Panangmatmatda: Nupay nalabit bumusor ti dadduma a di manamati nga assawa, kaaduanna a parikut ket kinaawan interes wenno di umiso a pannakatarus. Mabalin nga ipapan ti maysa a tao a maipupuera wenno pagimonanna ti naespirituan a paginteresan a nabiit pay a nabirokan ti asawana. “No maymaysaak idiay balay, kaslaak la nabaybay-an,” malaglagip ti maysa nga asawa a lalaki. “Kasla ketdin binaybay-andakon ni baketko ken dagiti annakko,” kuna pay ti sabali. Dadduma a lallaki mabalin nga ipagarupda a mapukawda ti pamiliada gapu iti relihion. (Kitaenyo ti Agosto 15, 1990, a Pagwanawanan, panid 20-3.) Dayta ti gapuna a, no mabalin, manipud iti panangirugi kasayaatan no mairaman ti asawa a lalaki a kadua ni baketna iti urnos ti panagadal iti Biblia iti pagtaengan.

³ Agtinnulong: Epektibo ti panagtinnulong ti pagassawaan a Saksi iti panangisuroda iti kinapudno kadagiti adda assawada. Kalpasan a maipasdek ti sister ti panangyadalna iti asawa a babai, ti brother sarungkaranna ti asawa a lalaki ket masansan a makairugi iti panagadal.

⁴ Nainggayyeman ken Naayatkayo Koma: Dagiti pamilia iti kongregasion makatulongda babaen ti panangipakita iti interes kadagiti pamilia a saan pay nga agkaykaysa iti pudno a panagdayaw. Ti sagpaminsan a nainggayyeman nga isasarungkar mabalin a matulonganna ti di manamati nga asawa tapno makitana a dagiti Saksi ni Jehova ket naayat, nadungngo a Kristiano a maseknan iti pagimbagan ti tunggal maysa.

⁵ Sagpaminsan, mabalin a repasuen dagiti panglakayen no ania dagiti nabiit pay a naaramidan a panagregget tapno matulongan dagiti di manamati nga assawa ken no ania pay ti maaramidan tapno maawisda nga agdayaw ken Jehova.—1 Ped. 3:1.