Agpipinnabilegkayo Babaen ti Panagkomento Kadagiti Gimong
1 Balakadannatayo ti Hebreo 10:24 nga ‘agpipinnaregtatayo iti ayat ken nasayaat nga ar-aramid.’ Ramanen daytoy ti panagpipinnabileg babaen kadagiti nabagas a komento kadagiti gimong ti kongregasion. Apay a masapul nga agkomentotayo? Kasanotay a maaramid daytoy? Siasino ti magunggonaan?
2 Panunotenyo a namin-adun a nagunggonaankayo gapu iti pannakangngegyo kadagiti simple, nabatad a sasao dagiti sabsabali a mangparayray iti pannakaawatyo ken mangpabileg kadakayo iti naespirituan. Addaankay iti pribilehio a mangaramid met iti kasta kadakuada. No makiramankayo, ipakpakitayo ti tarigagayyo a ‘mangiburay iti sumagmamano a naespirituan a sagut’ a pakaparegtaan amin a tumabuno.—Roma 1:11, 12.
3 No Kasano ti Nasayaat a Panagkomento: Dikay unay kaatiddogen dagiti komentoyo, a mangsaklaw iti amin nga ideya iti parapo. Dagiti atiddog a komento masansan a dida mapagminar ti espesipiko a sungbat ken mangupay dayta iti pannakiraman dagiti sabsabali. Ti umuna a komento iti parapo ket masapul nga ababa, direkta a sungbat iti nayimprenta a saludsod. Iti kasta, dagidiay mangipaay iti kanayonan a komento mabalinda ti mangaramid iti praktikal nga aplikasion ti material wenno ipakitada no kasanot’ pannakayaplikar dagiti kasuratan. Kitaenyo ti Giya ti Eskuelaan, panid 90-2.
4 No pagdanagennakayo ti panagkomento, mangisaganakayo a nasakbay iti ababa a komento, ket kiddawenyo iti konduktor a dakayo ti pasungbatenna iti dayta a parapo. Kalpasan ti sumagmamano a gimong a panangaramidyo iti kastoy, nalaklakakayton a makiraman. Laglagipenyo nga inyebkas da Moises ken Jeremias a dida kabaelan ti agsao iti publiko. (Ex. 4:10; Jer. 1:6, ftn.) Ngem tinulongan ida ni Jehova nga agsao maigapu kenkuana, ket tulongannakayo met.
5 Siasino ti Magunggonaan Kadagiti Komentoyo? Magunggonaankayo a mismo gapu ta dagiti komentoyo ti ad-adda a mangipaagsep iti kinapudno iti panunot ken pusoyo, ket inton agangay nalaklakayonton a malagip dayta nga impormasion. Kasta met, magunggonaan dagiti sabsabali no mangngegda dagiti makapabileg a sasaoyo. Maparegtatayo no pagreggetantay amin nga iyebkas ti pammatitayo kadagiti gimong ti kongregasion, aduantay man iti kapadasan, agtutubo, managbabain, wenno kabbaro.
6 Sigurado a makitatayo a ti ‘sasao iti maitutop a tiempo, anian a nagsayaat’ no mausar dagita iti panagpipinnabileg kadagiti gimong!—Prov. 15:23.