Makitada a Naidumatayo
1 Itay napan a tawen, nasurok a 300,000 a kabbaro ti timmipon kadatayo babaen ti panagpabautisarda. Ania ti nakita dagitoy a tattao kadagiti Saksi ni Jehova a nanggapuanda a nagtarigagay nga agbalin a paset ti organisasion ti Dios? Apay a naidumatayo kadagiti amin a sabsabali a relihion? Adtoy ti sumagmamano a nabatad a sungbat:
—An-annurotentayo ti Biblia imbes a dagiti personal a kapanunotan: Daydayawentayo ni Jehova a Dios a “buyogen ti espiritu ken kinapudno,” kas imbilin ni Jesu-Kristo nga aramidentayo. Kaipapanan daytoy ti panangiwaksi kadagiti narelihiosuan a kinaulbod ken panangannurot iti naisurat a Sao ti Dios.—Juan 4:23, 24; 2 Tim. 3:15-17.
—Danonentayo dagiti tattao imbes nga urayentayo ida nga umay kadatayo: Inawattayo ti impaannong ni Kristo a panangasaba ken panangisuro, ket kas panangtulad iti ulidanna agbirbiroktayo kadagiti nasingpet ti panagpuspusoda a tattao. Birokentay ida kadagiti pagtaenganda, iti lansangan, wenno iti sadinoman a pakasarakan kadakuada.—Mat. 9:35; 10:11; 28:19, 20; Ara. 10:42.
—Ditay agpabpabayad a mangisuro iti Biblia kadagiti isuamin: Ditay pabpabayadan dagiti mausar a sanikua ken pigsatayo, a mangbusbusbostayo iti nasurok a maysa a bilion nga oras iti kada tawen iti panagserbi iti Dios. Ditay mangidumduma a mangyadal iti Biblia iti amin a kita ti tattao.—Mat. 10:8; Ara. 10:34, 35; Apoc. 22:17.
—Nasanaytayo a naimbag a tumulong kadagiti tattao iti naespirituan: Babaen ti personal a panagadaltayo iti Biblia ken ti pannursuro a maipapaay kadagiti gimong ti kongregasion, asamblea, ken kombension, umaw-awattayo iti di magatadan, agtultuloy a teokratiko nga edukasion, a tumulong kadatayo a manglawlawag kadagiti sabsabali iti naespirituan.—Isa. 54:13; 2 Tim. 2:15; 1 Ped. 3:15.
—Ipappapusotayo ti kinapudno, nga iyap-aplikartay dayta iti inaldaw a panagbiagtayo: Gapu iti ayattayo iti Dios, agbalbaliwtayo, nga ituntunostay ti biagtayo iti pagayatanna. Ti kas ken Kristo a baro a personalidadtayo guyugoyenna dagiti sabsabali iti kinapudno.—Col. 3:9, 10; Sant. 1:22, 25; 1 Juan 5:3.
—Ikagkagumaantayo ti agbiag ken makipagtrabaho a sitatalna kadagiti sabsabali: Ti panangpatanor kadagiti nadiosan a galad tulongannatayo a mangannad iti tigtignay ken panagsasaotayo. ‘Sapulentay ti talna ket surotentay dayta’ iti pannakilangentayo kadagiti amin a tattao.—1 Ped. 3:10, 11; Efe. 4:1-3.
2 Dagiti ehemplo ti Nakristianuan a panagbiag a makitkita dagiti tattao iti organisasion ni Jehova tignayenna dagiti adu a mangawat iti kinapudno. Sapay koma ta adda met kasta nga epekto ti personal nga ehemplotayo kadagidiay makaam-ammo ken makapaliiw kadatayo.