Dagiti Pamay-an Tapno Mapalawa ti Ministerioyo
1 Nasuroken nga uppat a pulo a tawen ti napalabas, nagparang ti artikulo a napauluan “Ar-aramidenyo Aya ti Amin a Kabaelanyo?” iti Enero 15, 1955, a Watchtower. Siaayat nga impakitana no kasano a posible a maparang-ay ti ili ni Jehova ti indibidual a panagreggetda iti ministerio tapno maparang-ayda ti trabahoda iti Pagarian. Agaplikar met itatta dayta a nagsayaat a balakad, bayat nga itultuloytay ti rumang-ay.
2 Amin a serbisiotayo ket maigapu koma iti kadaklan a bilin: “Masapul nga ayatem ni Jehova a Diosmo iti amin a pusom ken iti amin a kararuam ken iti amin a panunotmo ken iti amin a pigsam.” (Mar. 12:30) Maipakitatay ti naan-anay nga ayattayo ken Jehova babaen ti panangusar iti amin a gundawaytayo a mangyadelantar iti trabaho ti Pagarianna. Usigenyo dagiti sumaganad a pamay-an tapno mapalawayo ti ministerioyo.
3 Ibaklayyo ti Responsabilidadyo: Maikagumaan dagiti dedikado a kakabsat a lallaki ti makualipikar a kas ministerial nga adipen sadanto rumang-ay agingga a makapagserbida a kas panglakayen. Dagiti artikulo a “Gumawgaw-atkay Aya?” ken “Kualipikadokay Aya nga Agserbi?,” iti Setiembre 1, 1990, a ruar Ti Pagwanawanan, tinignayna ti adu a kakabsat a lallaki a mangibaklay kadagiti responsabilidad iti kongregasion. Makiumankay kadagiti lokal a panglakayenyo para kadagiti espesipiko a singasing no kasano a maragpat ken no kasanokayo a makakualipikar iti dayta.
4 Maiyawis kadagiti babbaro a panglakayen ken ministerial nga adipen a panunotenda a naimbag ti panagaplikar iti Ministerial Training School. Adu ti maammuanyo maipapan iti daytoy nga eskuelaan no basaenyo dagiti reperensia iti sidong ti “Ministerial Training School” iti Watch Tower Publications Indexes para iti 1986-1995, 1996, ken 1997. Makitayo kadi dayta ‘dakkel a ruangan iti panagaramid’ a silulukat iti sanguananyo? (1 Cor. 16:9a) Dagiti adu a kakabsat a lallaki a simrek iti dayta dida pulos inar-arapaap dagiti amin a pribilehio iti serbisio kalpasan ti panagturpos. Ita, tagtagiragsakenda ti agserbi idiay Bethel wenno iti tay-ak kas special pioneer, misionero, wenno agdaldaliasat a manangaywan.
5 Ragpatenyo ti Amin-Tiempo a Serbisio: Dagiti agtutubo nga agturposen iti haiskul, dagiti agtagtagibalay nga assawa, ken dagiti adu a nagretiron iti trabaho, pagreggetanda koma a panunoten ti agpayunir. Repasuenyo ti suplemento ti Hulio 1998 a Ministeriotayo iti Pagarian, kalpasanna makisaritakayo kadagiti payunir a kas kadakayo ti kasasaad ti biagda. Nalabit matignaykayto a mangpalawa iti ministerioyo babaen ti panagpayunir, kas ti ar-aramidenda. (1 Cor. 11:1) Mabalinyo kadi a parang-ayen ti trabahoyo agingga iti 70 nga oras iti makabulan ket iti kasta makapagserbikayo a kas regular pioneer?
6 Agserbi iti Lugar nga Ad-adda nga Agkasapulan: Agnanaedkayo kadi iti teritoria a masansan a matartrabaho wenno adu dagiti kakabsat a makapagtitinnulong? Pinampanunotyo kadin a palawaen ti ministerioyo babaen ti iyaakar iti lugar nga ad-adda nga agkasapulan? Nalabit umakarkayo iti aw-away nga agkasapulan iti ad-adu a trabahador. (Mat. 9:37, 38) Dikay koma agap-apura. Kasapulan nga usigenyo a buyogen ti kararag. (Luc. 14:28-30) Makisaritakayo kadagiti panglakayen ken iti manangaywan iti sirkito maipapan iti kasasaadyo. Ilawlawagda kadakayo no nainsiriban ti kasta nga iyaakar itan wenno agsaganakayo para iti masanguanan. Kasta met, mabalin nga ammo ti manangaywan iti sirkito no ania a lugar iti sirkitona ti agkasapulan iti tulong ken no sadino ti praktikal kadakayo. No kayatyo ti agsurat iti Sosiedad a dumawat iti singasing no sadino ti umakaranyo, masapul a mairagpin iti suratyo ti maysa a surat a pinirmaan ti Komite ti Serbisio ti Kongregasionyo.
7 Parang-ayenyo ti Kalidad ti Serbisioyo: Nalabit mabalintay amin ti makiraman a naan-anay iti ministerio babaen ti panangparang-ay iti kalidad ti serbisiotayo iti tay-ak. Makiramramankay kadi iti amin a benneg ti trabaho, a pakairamanan ti panagbalaybalay ken di pormal a panangasaba kasta met ti panagsarungkar ken panangyadal iti Biblia? No mangyad-adalkayo, maparang-ayyo kadi ti arte ti panangisuroyo? Nasayaat no repasuenyo ti suplemento ti Hunio 1996 a Ministeriotayo iti Pagarian para kadagiti singasing a mausaryo a panggutugot kadagiti iyad-adalanyo tapno agdedikar ken agpabautisarda.
8 Ad-adu pay ti isalaysay ti kapitulo 9 iti Organisado a Mangitungpal ti Ministeriotayo maipapan kadagiti pamay-an tapno mapalawa ken maparang-ay ti ministeriotayo. Sigurado a tarigagayantay amin ti agserbi iti Dios iti amin a kabaelantayo. Apay a diyo ipasnek nga utoben dagiti naespirituan a kalatyo? Surotenyo ti singasing ti 1 Timoteo 4:15: “Utobem dagitoy a bambanag; maipamaysaka kadakuada, tapno ti panagrang-aymo maiparangarang iti isuamin a tattao.”