Saludsod
◼ Ania dagiti rumbeng a pagannadan dagiti nagannak no makiraman dagiti minor de edad nga annakda iti tay-ak ti serbisio?
Umiso nga ikuyog dagiti Kristiano a nagannak dagiti annakda iti tay-ak ti ministerio, a sanayenda ida a mangiburay iti naimbag a damag ti Pagarian kadagiti sabsabali. No aramidenda dayta, nasken a siputanda a naimbag dagiti ubbingda gapu kadagiti posible a peggad iti teritoria, uray kadagiti “nataltalged” a lugar. Lumanlanlan ti pannakabiktima dagiti ubbing iti kinaranggas ken pannakaabuso gapu iti kumarkaro a kinaagum ken seksual a kinalulok kadagitoy “napeggad a tiempo” a pagbibiagantayo. (2 Tim. 3:1-5) Nasken ti nainkalintegan a panagannad dagiti nagannak tapno masaluadanda dagiti ubbingda kadagidiay mangbiktima kadakuada. Aniat’ mabalin nga aramiden?
Nainsiriban ti balakad ti Biblia nga agannadtayo ken panunotentay a nasakbay ti peggad. (Prov. 22:3; Mat. 10:16) Ti panggep ditoy ket saan a tapno mangaramid kadagiti pagannurotan, ngem ketdi nainsiriban a kaduaen ti nagannak wenno sabali pay a nataengan ti maysa nga ubing no makiraman iti tay-ak ti serbisio. No agkuyog ti dua a responsable ngem ubbing pay nga agibumbunannag, maibalakad a kanayon koma a siputan ida ti naganak wenno sabali pay a nataengan. Siempre, bayat nga agmataengan ti ubing ken agmanakemen, maikeddeng dagiti nagannak no saanna unayen a kasapulan ti direkta a panangaywan dagiti nagannak.—Kitaenyo met ti “Saludsod” iti Nobiembre 1992 a Ministeriotayo iti Pagarian.
Nainsiriban met a pampanunotentay a kanayon ti kinatalged no agbibiahe ken no magmagnatayo. Ti umiso a panagannad masansan nga ilikliknatayo kadagiti aksidente ken nakalkaldaang a panagtuok, gastos iti panagpaagas, ken posible a pannakaidarum iti daytoy lubong nga uso ti panagdidinnarum.
Mayanatup kadagiti agtutubo nga “idaydayawda koma ti nagan ni Jehova.” (Sal. 148:12, 13) Ti makaay-ayo a pannakisaoda ken nasayaat a kababalinda bayat nga addada iti tay-ak ti ministerio ket magustuan unay dagiti sabsabali ken mangyeg iti pakaidayawan ni Jehova. Dakayo a nagannak, iti amin a pamay-an, tulonganyo dagiti annakyo a makiraman a regular iti panangiwaragawag iti naimbag a damag bayat a kanayon met koma a naridamkayo a mangsaluad kadakuada manipud kadagiti aniaman a tumaud a peggad!