Ti Panangasaba Pagbalinennatayo a Naiduma
1 Iyimtuod ti adu a tattao, “Aniat’ pakaigidiatan dagiti Saksi ni Jehova kadagiti sabsabali a relihion?” Kasanoyo a sungbatan dayta? Mabalinyo nga ilawlawag ti sumagmamano kadagiti naibatay iti Biblia a patpatientayo. Ngem pinampanunotyo met kadin nga ilawlawag no kasano a ti ministeriotayo iti publiko ti mamagbalin kadatayo a naiduma kadagiti sabsabali a relihion?—Mat. 24:14; 28:19, 20.
2 Itatta, manmano ti relihioso a tattao a matignay a mangiranud iti pammatida kadagiti sabsabali. Mabalin a panunotenda nga umdasen ti panagtulnog kadagiti linteg ni Cesar, agbiag a desente, wenno agaramid iti naimbag kadagiti sabsabali. Nupay kasta, awan pampanunotenda nga obligasion a tumulong kadagiti sabsabali a mangammo iti kuna ti Biblia maipapan iti pananggun-od iti pannakaisalakan. Aniat’ nakaidumaantayo?
3 Naiduma unay ti kinaregtatayo iti ministerio no idilig kadagiti aktibidad ti sabsabali a relihion. Iti nasuroken a 100 a tawen, sigaganetget dagiti moderno-aldaw a Saksi a mangikaskasaba iti naimbag a damag agingga kadagiti pungto ti daga, kas panangtulad kadagidi nagkauna a Kristiano. Ti panggeptayo iti dayta ket tapno ad-adu pay ti matulongantayo a tattao a mangitunos iti biagda iti pagayatan ti Dios.—1 Tim. 2:4; 2 Ped. 3:9.
4 Komusta ti Reputasionyo? Pagaammodakayo aya kas naregta a mangikaskasaba iti Sao ti Dios? (Ara. 17:2, 3; 18:25) Gapu iti panangaskasabayo, nalaka kadi a makita dagiti kaarrubayo ti nagdumaan ti relihionda ken ti relihionyo? Pagaammodakayo kadi kas maysa a nagagar a mangiburburay iti namnamana kadagiti sabsabali? Adda kadi regular nga eskediulyo a makiraman iti ministerio? Laglagipenyo a maipakitatay a naidumatayo saan laeng a babaen iti nagantayo no di pay ket babaen ti panangaramidtayo iti desdeskribiren dayta a nagan—ti panangsaksi ken Jehova.—Isa. 43:10.
5 Ti ayat iti Dios ken iti kaarruba ti mangtignay kadatayo a makiraman iti trabaho a panangasaba. (Mat. 22:37-39) Dayta ti gapuna a, kas ken Jesus ken kadagiti apostol, kayattayo nga aprobetsaren ti kada oportunidad a mangiranud iti mensahe ti Pagarian kadagiti sabsabali. Sapay koma ta itultuloytayo nga ikasaba a sireregta ti naimbag a damag kadagidiay mayat a dumngeg. No aramidentay dayta matulongantayo dagiti nasingpet ti panagpuspusona a tattao a ‘mangkita iti nagdumaan . . . daydiay agserserbi iti Dios ken daydiay saan a nagserbi kenkuana.’—Mal. 3:18, NW.