Siasino ti Mabalin nga Agpayadal iti Biblia?
1 Impakaammo ni mammadto nga Amos nga addanto nakaro a bisin iti daga ti Israel, “saan a bisin iti tinapay, wenno waw iti danum, no saan ket a panagdengngeg kadagiti sao ni Jehova.” (Amos 8:11) Para iti pagimbagan dagidiay mabisin ken mawaw iti naespirituan, mangipapaay ti organisasion ni Jehova iti naruay a literatura ti Biblia iti sangalubongan.
2 Agingga kadagitoy, nakayimprentatayon iti 70 milion a libro a Pannakaammo ken 91 milion a broshur a Kalikaguman. Iti panangisurotayo iti kinapudno, apresiarentayo ti kinasimple ken kinaepektibo dagitoy a publikasion. Nupay kasta, literal nga umariwekwek a tattao ti nakagun-oden kadagiti literaturatayo ngem dida pay nakipagadal iti Biblia kadatayo. Ania ti maaramidantayo iti daytoy?
3 Kada Mapaimaan Kaipapananna ti Potensial a Mayadalan! Panunotenyo ti kapadasan ti agibumbunannag a nangyopreser nga iyadalanna ti maysa a babai iti damo a pannakisaritana kenkuana iti panagbalaybalay. Dagus nga immanamong. Idi agangay kinunana kenkuana, “Sika pay laeng ti immuna a nangyopreser nga iyadalannak iti Biblia.” Iti teritoriayo, mano a tattao nga addaanen kadagiti literaturatayo ti mabalin a mangibaga met iti kasta? Tunggal adda maipaima, mangipaay dayta iti gundaway para iti panagsarungkar ken panangyadal iti Biblia iti pagtaengan.
4 Yantangay masansan a makasaraktayo iti tattao a nakagun-oden kadagiti publikasiontayo, kasanotayo a matukay ti interesda a mangadal iti linaon dagiti literaturatayo? Direkta a dinamag ti maysa a Saksi iti bumalay no adda aniaman a saludsodna a mainaig iti Biblia, ngem simmungbat laeng ti bumalay iti, “Awan.” Intuloy ti sister, “Masiguradok nga adda.” Nagsaludsod nga agpayso ti babai, ket naipasdek ti panagadal. Apay a diyo damagen iti bumalay no kayatna a maammuan ti panangmatmat ti Biblia iti maysa a saludsod wenno banag a pakaseknanna? Nakasaganakayo koma a mangpataud iti saludsod a makapainteres no awan mapanunotna. Dagita a saritaan ti mabalin a mangilukat iti regular a panangadal kadagiti pamunganayan a kinapudno iti Biblia.
5 Ti panangyadal iti Biblia ket isu ti sentro ti ministeriotayo. Yantangay ditay ammo no siasino ti mayat nga agpayadal, dikay agalikaka a mangyopreser iti dayta iti asinoman a makasaritayo. Ikararagyo dayta ken Jehova, ket agtignaykayo a maitunos kadagiti kararagyo. Di agbayag, mabalin nga addanton agpayadal kadakayo!—1 Juan 5:14, 15.