Salsaludsod
◼ Mayanatup kadi ti agpalakpak no mayanunsio ti pannakaisubli ti nailaksid?
Iti naayat a kinamanangngaasina, nangipaay ni Jehova a Dios iti Nainkasuratan a pamay-an tapno magun-od manen dagiti agbabbabawi a nakabasol ti anamongna ket makasublida iti kongregasion Kristiano. (Sal. 51:12, 17) No mapasamak daytoy, maparegtatayo a mangpasingked iti ayattayo iti kakasta a napasnek nga agbabbabawi.—2 Cor. 2:6-8.
Ngem nupay pagragsakantayo ti pannakaisubli ti maysa a kabagian wenno gayyem, maipakita koma ti nadayaw a panagulimek apaman a mayanunsio iti kongregasion ti pannakaisubli dayta a tao. Kastoy ti panangilawlawag ti Pagwanawanan nga Oktubre 1, 1998, panid 17: “Nupay kasta, masapul a laglagipentayo a saan nga ammo ti kaaduan iti kongregasion dagiti kasasaad a nangiturong iti pannakailaksid ti maysa a tao wenno iti pannakaisublina. Maysa pay, mabalin nga adda dagiti personal a naapektaran wenno nasaktan—nalabit iti napaut—gapu iti basol a naaramidan ti tao nga agbabbabawi. Ngarud, tangay sipapanunottayo kadagiti kasta a banag, no mayanunsio ti pannakaisubli ti maysa, maiparbeng a pengdantayo pay la dagiti ebkas ti panangabrasa agingga a maaramidtay dayta a personal.”
Nupay maragsakantayo unay a makakita no adda asinoman nga agsubli iti kinapudno, saan a mayanatup ti panagpalakpak iti tiempo a pannakaisublina.
◼ Gapu iti napasimple nga urnos ti panagipaima kadagiti literaturatayo, aniada a panagbalbaliw ti mabalin nga aramidentayo no agitukontayo kadagiti literatura no mangaskasabatayo iti lansangan?
No mangaskasabatayo iti lansangan, mayanatup nga asitgantayo dagiti tattao nga iggemtayo dagiti magasin wenno publikasion. Nupay kasta, saantay a basta ipadawat dagiti literatura iti uray siasino lattan a mangala. Ti koma kalattayo ket ikagumaantay a makasarita dagiti tattao. Iti kasta, matingitingtayo no interesado dayta a tao ken kayatna a basaen dagiti literaturatayo. Mabalin met nga ilawlawag a maar-aramid ti trabahotayo babaen kadagiti boluntario ken saan a negosio dayta, no di ket masupsuportaran babaen kadagiti boluntario a kontribusion iti sangalubongan.
Nupay kasta, adu ti agap-apura kadagidiay makasabaantayo iti lansangan isu a marigatantayo a mangammo no interesadoda. Iti kakasta a kasasaad, mabalin a nasaysayaat nga ipaayan laengen ida iti tract a mangtukay kadakuada nga agbasa iti ad-adu pay a literaturatayo iti masanguanan.
No regular a mangaskasabatayo iti masnup a lansangan, maam-ammodatayo dagiti tattao ket mabalin a daytoy ti mangilukat iti panagsasarita, a mangipaay kadatayo iti umdas a tiempo a mangammo no interesadoda.