Taginayonen ti Talna ken Kinadalus ti Kongregasion

KADA tawen, rinibu a tattao ti sumsumrek iti balay ni Jehova maipaay iti pudno a panagdayaw, kas kaitungpalan ti padto ti Biblia. (Mik. 4:1, 2) Maragsakantayo a mangawat kadakuada iti “kongregasion ti Dios”! (Ara. 20:28) Apresiarenda ti gundaway a kaduadatayo nga agserbi ken Jehova ken mangtagiragsak iti nadalus ken natalna a kasasaad iti naespirituan a paraiso. Ti nasantuan nga espiritu ti Dios ken ti nainsiriban a balakad iti Saona ti tumulong kadatayo a mangtaginayon iti talna ken kinadalus ti kongregasion.​—Sal. 119:105; Zac. 4:6.

² No iyaplikartayo dagiti prinsipio ti Biblia, maikawestayo ti “baro a personalidad.” (Col. 3:10) Palabsentayo dagiti babassit a di panagkikinnaawatan. No tuladentayo ti panangmatmat ni Jehova, maliklikantayo ti impluensia ti lubong a mangpataud iti pannakabingaybingay ken makapagkaykaysatayo kas agkakabsat iti intero a lubong.​—Ara. 10:34, 35.

³ Ngem pasaray tumaud dagiti parikut a mangapektar iti talna ken panagkaykaysa ti kongregasion. Ania ti makagapu? Kaaduanna, gapu iti saan a panangyaplikar iti balakad ti Biblia. Kasapulantayo pay laeng a labanan ti tarigagay ti imperpekto a lasagtayo. Amintayo ket managbasol. (1 Juan 1:10) Mabalin a makaaramid iti basol ti maysa a kabsat a mangyeg iti moral ken naespirituan a kinarugit iti kongregasion. Mabalin nga adda nasaktantayo gapu iti saan a naannad a panagsasao ken tigtignaytayo, wenno mabalin a maitibkoltayo gapu iti imbaga wenno inaramid ti maysa a kabsat. (Roma 3:23) No mapasamak ti kasta, ania ti aramidentayo tapno masolbar ti problema?

⁴ Siaayat nga inkabilangan amin dagitoy ni Jehova. Babaen ti Saona, nangted iti balakad no ania ti aramidentayo no tumaud dagiti di panagkikinnaawatan. Sidadaan a tumulong dagiti naayat a naespirituan a papastor, dagiti panglakayen. No iyaplikartayo ti Nainkasuratan a balakadda, maaddaantayo iti nasayaat a relasion iti sabsabali ken mataginayontayo ti nasayaat a takder iti imatang ni Jehova. No kasapulan a madisiplina wenno matubngartayo gapu ta nakabasoltayo, masiguradotayo a ti kasta a panangilinteg ket ebkas ti ayat kadatayo ti nailangitan nga Amatayo.​—Prov. 3:11, 12; Heb. 12:6.

PANANGRISUT KADAGITI BABASSIT A DI PANAGKIKINNAAWATAN

⁵ No dadduma mabalin nga adda dagiti tumaud a di panagkikinnaawatan iti kongregasion. Masapul a marisut a dagus dagitoy gapu iti panagayattayo kadagiti kakabsat. (Efe. 4:26; Fil. 2:2-4; Col. 3:12-14) Nalabit mapaneknekam a kaaduan kadagiti personal a problemam iti padam a Kristiano ket mabalin a masolbar no iyaplikarmo ti balakad ni apostol Pedro a “nauneg koma ti ayatyo iti maysa ken maysa, ta ti ayat abbonganna ti adu a basol.” (1 Ped. 4:8) Kuna ti Biblia: “Mamin-adu a maitibkoltayo amin.” (Sant. 3:2) No iyaplikartayo ti Nabalitokan a Bilin, nga aramidentayo iti sabsabali ti kayattayo nga aramidenda kadatayo, palabsen ken lipatentayo ti di panagkikinnaawatan.​—Mat. 6:14, 15; 7:12.

⁶ No nadlawmo nga adda nasaktam iti imbaga wenno inaramidmo, makikappiaka a dagus. Laglagipem nga adda epekto dayta iti relasionmo ken Jehova. Binalakadan ni Jesus dagiti adalanna: “Gapuna, no mangipaayka iti daton iti altar ket malagipmo nga adda gura kenka ti kabsatmo, panawam ti datonmo iti sango ti altar. Mapanka makikappiaka nga umuna ken kabsatmo ket inton makasublika, ipaaymo ti datonmo.” (Mat. 5:23, 24) No adda tumaud a di panagkinnaawatan, nasayaat a pagsaritaanyo dayta. Makatulong ti nasayaat a komunikasion ti amin a miembro ti kongregasion tapno maliklikan dagiti di panagkikinnaawatan ken masolbar dagiti tumaud a problema gapu iti kinaimperpekto.

PANANGIPAAY ITI NAINKASURATAN A BALAKAD

⁷ No dadduma, mabalin a kasapulan a balakadan dagiti manangaywan ti maysa a kabsat ken ikagumaanda nga ilinteg ti panagpampanunotna. Saan a kanayon a nalaka nga aramiden daytoy. Kinuna ni apostol Pablo iti suratna kadagiti Kristiano idiay Galacia: “Kakabsat, uray no makaaramid ti maysa a tao iti di umiso sakbay a maamirisna dayta, dakayo nga addaan kadagiti naespirituan a kualipikasion padasenyo nga aturen a siaalumamay.”​—Gal. 6:1.

⁸ No ipastoranda ti arban, dagiti manangaywan masalaknibanda ti kongregasion iti adu a naespirituan a peggad ken malapdanda a tumaud dagiti nadagsen a parikut. Ikagumaan dagiti panglakayen ti agserbi iti kongregasion maitunos iti kari ni Jehova babaen ken Isaias: “Agbalinto ti tunggal maysa kas paglemmengan no agangin maysa a pagkamangan no agbagyo, kas ayus ti danum iti namaga a daga, kas anniniwan ti dakkel a bato iti natikag a daga.”​—Isa. 32:2.

PANANGMARKA KADAGITI NAGULO

⁹ Pinakdaaran ni apostol Pablo dagidiay dakes ti impluensiana iti kongregasion. Kinuna ni Pablo: “Mangtedkami kadagiti instruksion nga adaywanyo ti tunggal kabsat nga agbibiag a nagulo ken saan a mangsursurot iti tradision nga inawatyo kadakami.” Inlawlawagna dayta iti suratna: “No adda asinoman a saan nga agtulnog iti imbagami iti daytoy a surat, pagtalinaedenyo a namarkaan daytoy a tao ken isardengyo ti makilangen kenkuana, tapno agbain. Ngem diyo ibilang kas kabusor, no di ket itultuloyyo a bagbagaan a kas kabsat.”​—2 Tes. 3:6, 14, 15.

¹⁰ No dadduma, saan met nga agar-aramid iti nadagsen a basol ti maysa a mabalin a pakailaksidanna, ngem nabatad a dina ikabkabilangan ti pagalagadan ti Dios a masapul nga aramiden dagiti Kristiano. Mabalin nga isu ket nakasadsadut, manangkritikar, dugyot wenno saan a managdaldalus. Nalabit “makibibiangda iti dida rumbeng a pakibiangan.” (2 Tes. 3:11) Mabalin met a ti maysa gundawayanna ti sabsabali para iti material a pagimbaganna, wenno makiraman iti dakes a paglinglingayan. Ti nagulo a kababalin ket nakaro unayen ta mangyeg iti dakes a pakasarsaritaan ti kongregasion ken mabalin a tuladen ti dadduma a kakabsat.

¹¹ Ikagumaan dagiti panglakayen a tulongan ti nagulo a kabsat babaen ti balakad a naibatay iti Biblia. Ngem no saanna nga ipangag dagiti maulit-ulit a balakad, mabalin nga ikeddeng dagiti panglakayen ti mangipaay iti palawag iti kongregasion a mangpakdaar kadagiti kakabsat. Dagiti panglakayen ti mangtingiting no ti maysa a situasion ket nakaron ken maapektaranen ti dadduma isu a kasapulanen ti mangipaay iti mangpakdaar a palawag. Mangipaay ti ispiker iti maitutop a balakad iti nagulo, ngem saanna nga ibaga ti naganna. Dagidiay makaammo iti situasion a nadakamat iti palawag, liklikanda ti makikadua iti dayta a kabsat, nupay itultuloyda ti makilangen kadagiti naespirituan a panagtataripnong, ken ‘bagbagaanda a kas kabsat.’

¹² Nalabit a ti saan a pannakikadua kenkuana dagiti matalek a Kristiano ket makatulong iti kabsat a nagulo a makarikna iti bain ket agbalbaliw. No talaga a nagbalbaliwen dayta nga indibidual, saanen a maibilang kas namarkaan.

PANANGRISUT KADAGITI NADAGSEN A BASOL

¹³ No sidadaan a palabsen ken pakawanen ti nakabasol, dina kayat a sawen a tagtagilag-anen wenno pampanuynoyantayo dayta. Saan nga amin a kamali ket maigapu iti natawid a kinaimperpekto ngem saan met nga umiso a palabsen dagiti nadagsen a basol. (Lev. 19:17; Sal. 141:5) Bigbigen ti Linteg ti tulag nga adda dagiti maibilang a nadagdagsen a basol ngem iti dadduma ket pudno met dayta iti kongregasion Kristiano.​—1 Juan 5:16, 17.

¹⁴ Imbinsabinsa ni Jesus dagiti espesipiko nga aramiden tapno masolbar dagiti dadakkel a problema a mabalin a tumaud iti nagbaetan dagiti Kristiano. Paliiwem ti agsasaruno nga aramidenna: “No makabasol kenka ti kabsatmo, [1] kasaritam a dakdakayo ket ibagam ti basolna. No dumngeg kenka, natulongam ti kabsatmo nga agbabawi. Ngem no saan a dumngeg, [2] mangikuyogka iti maysa wenno dua, tapno mapatalgedan ti tunggal banag iti testimonia ti dua wenno tallo a testigo. No di dumngeg kadakuada, [3] ibagam iti kongregasion. No saanna latta a denggen ti kongregasion, ibilangmo a kas iti tao kadagiti nasion ken kas agsingsingir iti buis.”​—Mat. 18:15-17.

¹⁵ Iti simmaruno nga ilustrasion ni Jesus a nairekord iti Mateo 18:23-35, agparang a ti maysa kadagiti basol a nadakamat iti Mateo 18:15-17 ket nainaig iti kuarta wenno sanikua, kas ti saan a pannakabayad ti utang wenno panagkusit. Mabalin met a mainaig iti panangpadpadakes a pakadadaelan ti reputasion ti maysa a tao.

¹⁶ No adda pammaneknekmo a ti maysa a miembro ti kongregasion ket nakaaramid iti nadagsen a basol kenka, dika mapan a dagus kadagiti panglakayen a kiddawem a tumulongda. Kas imbalakad ni Jesus, makisaritaka pay nga umuna iti nakabasol kenka. Ikagumaanyo a risuten ti problema a dakdakayo ken dikay mangiramanen iti sabali. Laglagipem a saan nga imbaga ni Jesus a ‘mapanka iti maminsan laeng, ket idatagmo ti basolna.’ Gapuna, no ti maysa ket dina bigbigen ti basolna ken saan a dumawat iti pammakawan, nasaysayaat no kasaritamto manen. No masolbar ti problema iti kastoy a pamay-an, sigurado nga apresiaren ti nakabasol a saanmo nga imbaga iti dadduma ti basolna wenno saanmo a dinadael ti nasayaat a pakasarsaritaanna iti kongregasion. Kas resultana, “natulongam ti kabsatmo nga agbabawi.”

¹⁷ No bigbigen ti nakabasol ti kamalina, dumawat iti pammakawan, ken ilintegna ti di umiso nga inaramidna, saanen a kasapulan ti sumaruno nga addang. Nupay nadagsen ti basolna, daytoy a kita ti basol ket mabalin a risuten iti nagbaetan dagiti indibidual a nairaman.

¹⁸ No saanmo a magun-od ti kabsatmo babaen ti ‘pannakisaritam a dakdakayo,’ mabalinmo nga aramiden ti kinuna ni Jesus, “mangikuyogka iti maysa wenno dua” ket makisaritaka manen iti kabsatmo. Ti panggep met daydiay ikuyogmo ket tapno magun-od ti kabsatmo. Nasaysayaat no ti piliem ket daydiay nakakita iti naaramidanna a basol. Ngem no awan ti aktual a nakakita, mabalinmo ti mangikuyog iti maysa wenno dua a mangsaksi iti saritaanyo. Mabalin nga adda kapadasanda maipapan iti dayta a banag ket maibagada no talaga nga adda nakabasolanna. Dagiti panglakayen a mapili kas saksi saanda nga irepresentar ti kongregasion, ta saan met a ti bagi dagiti panglakayen ti nangpili kadakuada.

¹⁹ No saan latta a narisut ti problema kalpasan ti maulit-ulit a pannakisaritam​—dakdakayo man wenno nangikuyogka iti maysa wenno dua pay a kabsat​—ket saanmo a mapalabas dayta, masapul ngarud nga ibagam ti problema kadagiti manangaywan iti kongregasion. Laglagipem a ti panggepda ket mataginayon ti talna ken kinadalus ti kongregasion. No naibagamon kadagiti panglakayen, ipabiangmon kadakuada ti problema ken agtalekka ken Jehova. Dimo koma ipalubos a maitibkolka wenno mapukaw ti rag-om nga agserbi ken Jehova gapu iti kababalin ti maysa a kabsat.​—Sal. 119:165.

²⁰ Agimbestigar dagiti pastor ti arban maipapan iti napasamak. No nalawag a nadagsen ti basol ti maysa a kabsat kenka ket saan nga agbabawi ken saanna a kayat nga ilinteg ti di umiso a naaramidanna, ti komite dagiti manangaywan masapul nga ilaksidda ti nakabasol iti kongregasion. Iti kasta, masalaknibanda ti arban ken mataginayonda ti kinadalus ti kongregasion.​—Mat. 18:17.

PANANGTAMING KADAGITI NADAGSEN A BASOL

²¹ Saan laeng a ti panangpakawan ti nakaaramidan iti basol ti kasapulan dagiti nakaaramid iti seksual nga immoralidad, pannakikamalala, homoseksualidad, panagtabbaaw, apostasia, idolatria ken dadduma pay a nadagsen a basol. (1 Cor. 6:9, 10; Gal. 5:19-21) Gapu ta agpeggad ti naespirituan ken moral a kinadalus ti kongregasion, dagita a basol ket masapul a maipakaammo kadagiti panglakayen tapno tamingenda. (1 Cor. 5:6; Sant. 5:14, 15) Mabalin nga umasideg dagiti indibidual kadagiti panglakayen tapno ipudnoda ti mismo a basolda wenno ipakaammoda ti dakes nga inaramid ti dadduma. (Lev. 5:1; Sant. 5:16) Aniaman ti pamay-an a naammuan dagiti panglakayen ti maipapan iti nadagsen a basol ti maysa a bautisado a Saksi, masapul nga agimbestigar nga umuna ti dua a panglakayen. No adda nakaibatayan ti damag ken adda pammaneknek a talaga a nakaaramid iti nadagsen a basol, mangtuding ti bagi dagiti panglakayen iti hudisial a komite a buklen ti saan a nababbaba ngem tallo a panglakayen a mangtaming iti kaso.

²² Dagiti panglakayen bambantayanda a naimbag ti arban ken salsalaknibanda iti aniaman a mangdadael iti espiritualidadda. Ikagumaanda met nga usaren a naimbag ti Sao ti Dios a mangtubngar iti siasinoman a nakabasol ken maisubli ti naespirituan a kasasaadna. (Jud. 21-23) Maitunos daytoy kadagiti instruksion nga inted ni apostol Pablo ken ni Timoteo. Insurat ni Pablo: “Sipapasnek a bilinenka iti sanguanan ti Dios ken ni Kristo Jesus, a mangukomto kadagiti sibibiag ken kadagiti natay, . . . mangtubngarka, mangpakdaarka, mangparegtaka, buyogen ti kinaanus ken kinalaing a mangisuro.” (2 Tim. 4:1, 2) Mabalin nga agkasapulan daytoy iti adu a panawen ngem paset daytoy iti panangikagumaan dagiti panglakayen. Apresiaren ti kongregasion dagiti panagreggetda ken maikarida iti “doble a dayaw.”​—1 Tim. 5:17.

²³ Iti tunggal situasion a mapaneknekan a nakabasol ti maysa, ti kangrunaan a pakaseknan dagiti manangaywan ket maisubli ti naespirituan a kasasaadna. No talaga nga agbabbabawi ket matulonganda, ti panangtubngarda kenkuana, iti man pribado wenno iti imatang dagiti nangsaksi iti basolna bayat ti pannakataming ti kaso, ket pakadisiplinaanna ken maaddaan iti umiso a panagbuteng kadagiti makaimatang. (2 Sam. 12:13; 1 Tim. 5:20) Iti amin a kaso ti hudisial a pannubngar, maikkan iti restriksion ti nakabasol. Iti kasta, mabalin a matulongan ti nakabasol a ‘mangilinteg iti pagnaanna.’ (Heb. 12:13) Inton agangay, maikkat dagiti restriksion no naisublin ti kabsat ti nasayaat a kasasaadna iti naespirituan.

PANANGIPAKAAMMO ITI PANANGTUBNGAR

²⁴ No napaneknekanen ti hudisial a komite nga agbabbabawi ti indibidual ngem adda posibilidadna a maammuanto ti kongregasion wenno dagiti tattao ti basolna wenno masapul nga agannad dagiti kakabsat iti pannakilangenda iti agbabbabawi a nakabasol, adda maaramid nga ababa a pakaammo iti Gimong a Panagbiag ken Ministerio. Kastoy ti maibasa: “Ni [nagan ti indibidual] ket natubngar.”

NO TI DESISION KET PANANGILAKSID

²⁵ Iti dadduma a kaso, mabalin a nayugalin ti maysa ti agaramid iti dakes ken dina awaten dagiti panangikagumaan a tumulong kenkuana. Bayat ti panangdengngegda iti kasona mabalin nga awan ti makita kenkuana nga ‘aramid ti panagbabawi.’ (Ara. 26:20) Ania ngarud ti aramidenen? Kadagita a kaso, masapul a mailaksid iti kongregasion ti di agbabbabawi a nakabasol, ket saanen a mabalin a makilangen iti nadalus nga ili ni Jehova. Maikkat iti kongregasion ti dakes nga impluensia ti nakabasol, iti kasta masalakniban ti moral ken naespirituan a kinadalus ti kongregasion ken ti nasayaat a reputasionna. (Deut. 21:20, 21; 22:23, 24) Idi naammuan ni apostol Pablo ti nakababain nga aramid ti maysa iti kongregasion ti Corinto, binalakadanna dagiti panglakayen nga ‘iyawatda ken Satanas ti kasta a lalaki tapno mataginayon ti espiritualidad ti kongregasion.’ (1 Cor. 5:5, 11-13) Imbaga met ni Pablo ti pannakailaksid ti dadduma a bimmusor iti kinapudno idi umuna a siglo.​—1 Tim. 1:20.

²⁶ No ti desision ket mailaksid ti di agbabbabawi a nakabasol, masapul nga ibaga ti hudisial a komite iti nakabasol ti desisionda, ken nalawag nga ibagada ti/dagiti Nainkasuratan a makagapu iti pannakailaksidna. No naibagan iti nakabasol ti desisionda, ibaga kenkuana ti hudisial a komite a no patienna a di umiso ti naaramid a desision ket kayatna ti agapelar, mabalinna ti agsurat ken nalawag nga ibagana dagiti makagapu nga agapelar. Manipud iti aldaw a naipakaammo kenkuana ti desision ti komite, maikkan iti pito nga aldaw a mangaramid iti dayta. No adda maawat a panagapelar, masapul a makisarita ti bagi dagiti panglakayen iti manangaywan iti sirkito, nga isu met ti mangpili kadagiti panglakayen nga agserbi iti komite a pagapelaran a mangdengngeg manen iti kaso. Ikagumaanda a denggen ti apela iti uneg ti makalawas kalpasan a naawat ti apela. No adda apela, saan pay laeng a maipakaammo ti pannakailaksid. Kabayatanna, saan a mapalubosan ti akusado nga agkomento ken mangidaulo iti kararag kadagiti gimong ken saan a maikkan iti espesial a pribilehio iti panagserbi.

²⁷ Panangipakita ti asi iti akusado ti panangipalubos kenkuana nga agapela ken mangted daytoy kenkuana iti gundaway tapno maammuan dagiti rikriknana. Ngem no igagara ti nakabasol ti saan nga agpakita iti pannakadengngeg ti kasona, maipakaammo ti pannakailaksidna kalpasan dagiti panangikagumaan a makisarita kenkuana.

²⁸ No saan nga agapela ti nakabasol, ilawlawag kenkuana ti hudisial a komite a masapul nga agbabawi ken ibagada no ania dagiti mabalinna nga aramiden tapno makasublinto met laeng. Makatulong ken naayat daytoy a pamay-an ta mangnamnamada nga agbalbaliw. Inton agangay, mabalinnanto ti agsubli iti organisasion ni Jehova.​—2 Cor. 2:6, 7.

PANANGIPAKAAMMO ITI PANNAKAILAKSID

²⁹ No masapul a mailaksid iti kongregasion ti di agbabbabawi a nakabasol, maaramid ti ababa a pakaammo a kunana: “Ni [nagan ti indibidual] ket saanen a maysa kadagiti Saksi ni Jehova.” Agserbi daytoy a pakdaar kadagiti matalek nga indibidual iti kongregasion a saandan a makilangen iti dayta a tao.​—1 Cor. 5:11.

ISISINA

³⁰ Ti sao nga “isisina” (disassociation) ket agaplikar iti tignay nga inaramid ti maysa a bautisado a Saksi, nga inggagarana a tinallikudan ti takderna kas Kristiano ken imbagana a saannan a kayat ti maibilang kas maysa kadagiti Saksi ni Jehova. Mabalin a tallikudan ti maysa ti takderna iti kongregasion Kristiano babaen kadagiti aramidna, kas iti pannakimiembro iti sekular nga organisasion nga addaan kadagiti panggep a maikontra iti sursuro ti Biblia, isu a kondenaren ni Jehova a Dios.​—Isa. 2:4; Apoc. 19:17-21.

³¹ Kastoy ti insurat ni apostol Juan maipapan kadagiti timmallikud iti pammatida kas Kristiano idi kaaldawanna: “Pinanawandatayo, ngem saantayo ida a kakadua; ta no kakaduatayo koma ida, didatay koma pinanawan.”​—1 Juan 2:19.

³² No simmina ti indibidual, ti kasasaadna iti imatang ni Jehova ket naiduma unay iti kasasaad ti di aktibo a Kristiano a saanen a makiramraman iti ministerio. Ti indibidual ket nagbalin a di aktibo gapu ta saanen a regular nga agad-adal iti Sao ti Dios, wenno mabalin nga adda problemana wenno maidaddadanes isu a napukawen ti regtana nga agserbi ken Jehova. Dagiti panglakayen ken ti dadduma pay a miembro ti kongregasion itultuloyda a tulongan iti naespirituan ti di aktibo a Kristiano.​—Roma 15:1; 1 Tes. 5:14; Heb. 12:12.

³³ Ngem no pinili ti maysa a Kristiano nga isina ti bagina, adda ababa a pakaammo iti kongregasion a kunana: “Ni [nagan ti indibidual] ket saanen a maysa kadagiti Saksi ni Jehova.” Maibilang ti kasta nga indibidual a kas met laeng iti nailaksid.

PANNAKAISUBLI

³⁴ Mabalin a maisubli ti maysa a nailaksid wenno nangisina iti bagina iti kongregasion no nalawag nga ipakpakitana nga agbabbabawin ken iti rasonable a kapaut ti panawen, tinallikudannan ti dakes nga aramidna. Ipakpakitana a kayatna ti maaddaan iti nasayaat a relasion ken Jehova. Naannad dagiti panglakayen a mangipaay iti umdas a tiempo​—nalabit adu a bulan, maysa a tawen, wenno napapaut pay, depende iti kasasaad​—tapno mapaneknekanna a talaga nga agbabbabawi. No nakaawat ti bagi dagiti panglakayen iti surat nga agkidkiddaw a maisubli ti maysa a nailaksid, ti komite ti panangisubli ti makisarita iti dayta nga indibidual. Usigen ti komite no talaga a mangipakpakita iti ‘aramid ti panagbabawi’ ken ikeddengda no mabalinen a maisubli wenno saan pay.​—Ara. 26:20.

³⁵ No ti indibidual nga agkidkiddaw a maisubli ket nailaksid iti sabali a kongregasion, ti komite ti panangisubli ti makisarita iti indibidual ken usigenda ti kiddawna. No kombinsido dagiti miembro ti komite ti panangisubli nga isu ket rumbeng a maisubli, ipatulodda ti rekomendasionda iti bagi dagiti panglakayen iti kongregasion a nangilaksid iti indibidual. Agtinnulong ti dua a komite tapno masigurado a maammuanda ti amin nga impormasion ken makaaramidda iti umiso a desision. Ngem ti desision a maisubli ti indibidual ket aramiden ti komite ti panangisubli iti kongregasion a nakailaksidan ti indibidual.

MAIPAKAAMMO TI PANNAKAISUBLI

³⁶ No kombinsido ti komite ti panangisubli a ti nailaksid wenno ti simmina nga indibidual ket talaga nga agbabbabawi ken masapul a maisubli, maipakaammo ti pannakaisublina iti kongregasion a nakailaksidanna. No addan iti sabali a kongregasion, maipakaammo met sadiay ti pannakaisublina. Kastoy laeng ti maibaga: “Ni [nagan ti indibidual] ket naisublin kas maysa kadagiti Saksi ni Jehova.”

DAGITI KASO A PAKAIRAMANAN DAGITI BAUTISADO A MENOR DE EDAD

³⁷ Masapul a maipakaammo kadagiti panglakayen no nakaaramid iti nadagsen a basol dagiti bautisado a menor de edad. No tamingen dagiti panglakayen dagiti kaso ti nadagsen a basol a pakairamanan ti menor de edad, nasaysayaat no adda dagiti bautisado a nagannak ti agtutubo. Makitinnulongda iti hudisial a komite a dida kaluban ti basol ti anakda manipud iti pannakadisiplinana. Kas iti panangtamingda kadagiti nataengan a nakabasol, ikagumaan ti hudisial a komite a tubngaren ken ilinteg ti nakabasol. Ngem no saan nga agbabawi ti agtutubo, masapul a mailaksid.

NO NAKABASOL DAGITI DI BAUTISADO NGA AGIBUMBUNANNAG

³⁸ Ania ti aramiden no nakaaramid iti nadagsen a basol dagiti di bautisado nga agibumbunannag? Yantangay saanda a bautisado a Saksi, saanda a mailaksid. Nupay kasta, mabalin a saanda a matarusan a naimbag dagiti pagalagadan ti Biblia, ket mabalin a makatulong kadakuada ti naayat a balakad tapno ‘nalinteg ti pagnaanda.’​—Heb. 12:13.

³⁹ No saan nga agbabawi ti di bautisado a nakabasol kalpasan ti pannakisarita ken panangtulong kenkuana ti dua a panglakayen, masapul a maipakaammo dayta iti kongregasion. Maaramid ti ababa a pakaammo a kunana: “Ni [nagan ti indibidual] ket saanen a maibilang a kas di bautisado nga agibumbunannag.” Iti kasta, ti kongregasion ibilangdan ti nakabasol a taga-lubong. Nupay saan a nailaksid ti nakabasol, agannad dagiti Kristiano iti pannakilangenda kenkuana. (1 Cor. 15:33) Saanen a maawat ti reportna iti ministerio.

⁴⁰ Inton agangay, mabalin a kayat manen ti di bautisado a naikkat kas agibumbunannag ti agbalin nga agibumbunannag. Iti kasta a kasasaad, dua a panglakayen ti makisarita kenkuana ken ammuenda ti naespirituan a panagrang-ayna. No kualipikadon, maaramid ti ababa a pakaammo a kunana: “Ni [nagan ti indibidual] ket maibilang manen kas di bautisado nga agibumbunannag.”

BENDISIONAN NI JEHOVA TI NATALNA KEN NADALUS A PANAGDAYAW

⁴¹ Sigurado a maragsakan ti amin a naitimpuyog iti kongregasion ti Dios ita gapu iti nasayaat a naespirituan a kasasaad nga impaay ni Jehova iti ilina. Pudno a nalangto dagiti naespirituan a pagarabantayo, ken impaayannatayo iti aglaplapusanan ken makapabang-ar a danum ti kinapudno. Salsalaknibannatayo met ni Jehova babaen ti teokratiko nga urnosna iti panangidaulo ni Kristo. (Sal. 23; Isa. 32:1, 2) Natalged ti riknatayo gapu ta addatayo iti naespirituan a paraiso kadagitoy nariribuk a maudi nga al-aldaw.

⁴² No taginayonentayo ti talna ken kinadalus ti kongregasion, maitultuloytayo nga isilnag ti lawag ti kinapudno maipapan iti Pagarian. (Mat. 5:16; Sant. 3:18) Babaen ti pamendision ti Dios, mapasarantayo ti ragsak a makakita nga ad-adu pay a tattao ti mangam-ammo ken Jehova ken kaduatayo nga agserbi a mangaramid iti pagayatanna.