‘Ania ti Maaramidak?’
1 ‘Ania ti maaramidak?’ Sigurado a dayta ti pampanunoten dagiti kameng ti bassit a grupo dagiti agad-adal iti Biblia nga inorganisar ni Charles Taze Russell idi dekada ti 1870. Bayat a rimmang-ay ti pannakatarusda iti pagayatan ti Dios, mabalin a pinampanunot dagidiay a nagkauna nga estudiante ti Biblia no ania ti maaramidanda tapno matulongan dagiti sabsabali a mangammo iti panggep ti Dios. Ti panangisaknap iti intero a lubong kadagiti maad-adalda a pannakaammo iti Biblia ket pudno a dakkel unay a trabaho.
2 Maragsakantayo ta napagballigianda dayta a karit. Kasano? Inaramid ti tunggal maysa ti kasla nagbassitan a pasetna, isu a nalatak ita dagiti Saksi ni Jehova iti sangalubongan—maysa nga organisasion a buklen ti gistay innem a milion a manangiwaragawag iti Pagarian, nga agserserbi iti agarup 90,000 a kongregasion iti 234 a dagdaga ken isla ti baybay!—Isa. 60:22.
3 Ipaayyo ti Naan-anay a Suporta: Nasken a makiraman ti tunggal maysa kadatayo iti naindaklan a trabaho nga impadto ni Jesus a maaramid kadagitoy maudi nga al-aldaw. (Mar. 13:10) Sigurado a saan a mabalin nga ipabiang lattan daytoy a trabaho kadagiti sumagmamano a panglakayen; ket saan met a mabalin nga ipabaklay lattan kadagiti payunir daytoy trabaho a panangasaba. Kinapudnona, adda napateg a maaramidan ti tunggal dedikado a Kristiano. Mabalintay amin ti makiraman iti nagduduma a kita ti trabaho a panangasaba. (1 Tim. 1:12) Kasanoman ti panangaramidtay iti daytoy, magunggonaantayo a mismo ken dagiti sabsabali.—1 Tim. 4:16.
4 Makaipaay met ti tunggal maysa iti naan-anay a suporta iti Nakristianuan a panagkakabsattayo iti dadduma pay a napapateg a pamay-an. Masuportarantayo dagiti gimong ti kongregasion babaen ti regular nga itatabuno ken narayray a pannakipaset. (Sal. 122:1, 8, 9) Adda maaramidantayo tapno masalimetmetan ti moral a kinadalus ti kongregasion. Makaipaaytayo iti pinansial a suporta iti sangalubongan a trabaho, sigun iti kabaelantayo. Makatulongtayo iti pannakadalus ti Kingdom Hall. Makatulong ti tunggal maysa a mangparang-ay iti nabara nga espiritu ti ayat ken panagkaykaysa iti kongregasion babaen ti panangtulong kadagiti kabbaro, agtutubo, lallakay ken babbaket.—Col. 3:12, 14.
5 Gapuna, mabalinyo nga isaludsod, ‘Ania ti maaramidak?’ Nupay kasla bassit ti maaramidanyo nga indibidual, babaen ti panangaramidyo iti pasetyo, makatulongkayo iti panagbalin ti kongregasion a nabileg, aktibo, ken nasalun-at. Gapuna, adda napateg a maaramidan ti tunggal maysa kadatayo iti pannakaidaydayaw ti nagan ni Jehova!