Agpatulongkayo

¹ Ti naipaltiing a sasao a “narigat a pakilangenan” ket maikanatad unay a mangdeskribir iti napeggad a tiempotayo. (2 Tim. 3:1) Gapuna, ania ti maaramidanyo no maipasangokayo kadagiti narikut a naespirituan a karit a pagarupenyo a diyo kabaelan a daeran?

² Situtulokkayo kadi a makisarita iti miembro ti kongregasion a nataengan iti naespirituan? Mabalin a bumdeng dagiti dadduma ta mabainda a mangaramid iti dayta, dida kayat ti madiktaran, wenno pagarupenda nga awan pudpudno a makatulong. Agpayso, ikagumaantay koma nga asikasuen dagiti personal a responsabilidadtayo iti amin a kabaelantayo, ngem kanayon koma a ditay bumdeng nga agpatulong no maipapan kadagiti banag nga adda pakainaiganna iti naespirituan a salun-attayo.—Gal. 6:2, 5.

³ No Sadino ti Pangrugian: Mabalin a kayatyo nga asitgan ti konduktor ti panagadal iti libro iti grupoyo ket damagenyo no mabalinyo ti makipagtrabaho kenkuana iti tay-ak ti serbisio. Ikkannakay daytoy iti gundaway a mangibaga kenkuana maipapan iti tarigagayyo a rumang-ay iti naespirituan. No maysa a ministerial nga adipen, ibagayo kenkuana a kasapulanyo ti naespirituan a tulong ket kiddawennanto kadagiti panglakayen a tulongandakayo. Wenno mabalinyo nga ibaga iti asinoman kadagiti panglakayen ti maipapan kadagiti banag a pakaseknanyo.

⁴ Ania a kita ti tulong ti kasapulanyo? Adda kadi nangpakapuy iti regtayo? Agsolsolokayo kadi a nagannak a mangikagkagumaan a mangyasideg kadagiti annakyo iti kongregasion? Nataengankay kadi nga agkasapulan iti tulong? Wenno adda kadi parikut a mangup-upay kadakayo? Mabalin a narigat a pakilangenan ti napeggad a tiempotayo​—ngem saan nga imposible. Adda makatulong.

⁵ No Kasano a Makatulong Dagiti Panglakayen: Pudno a maseknan dagiti panglakayen. Denggenda dagiti pakaseknanyo. No addaan dagiti dadduma nga agibumbunannag kadagiti agkakaasping a parikut, usigen daytoy dagiti panglakayen bayat nga ipastoran ken isuroda ti kongregasion. Kas “pagulidanan ti arban,” masindadaanda a makipagtrabaho kadakayo a buyogen ti rag-o. (1 Ped. 5:3) Ti panagimdeng kadagitoy nga aduan kapadasan a kakabsat bayat nga ilawlawagda dagiti prinsipio ti Biblia ket maparang-ayna ti ministerioyo ken matulongannakayo a personal.—2 Tim. 3:16, 17.

⁶ Impaayannatayo ni Jesus iti adu a “sagut a buklen dagiti lallaki.” (Efe. 4:8, ftn. ti New World Translation of the Holy Scriptures​—With References) Kayat a sawen daytoy a sisasagana nga agserbi kadakayo dagiti panglakayen. Masindadaanda a tumulong kadakayo. No ar-arigen, “kukuayo” ida. (1 Cor. 3:21-23) Isu nga imbes nga agsarimadeng, agsaokayo. Agpatulongkayo.