“Ayabanna Koma Dagiti Panglakayen”

1. Kasano nga impakita ni Jehova nga ipatpategna dagiti karnerona?

AY-AYATEN ni Jehova ti amin nga agserserbi kenkuana. Ipatpategna ida a kas iti panangipateg ti maysa a nasayaat a pastor kadagiti karnerona. Ginatangna ida iti dara ni Jesus ken dinutokanna dagiti panglakayen a mangaywan iti arbanna. (Ara. 20:28) Kayat ti Dios a matrato a nasayaat ti arbanna. Sursuroten dagiti panglakayen ti panangidaulo ni Kristo. Iti ania a pamay-an? Pabpabilgen ken tultulonganda dagiti kakabsat nga agtalinaed a matalek ken Jehova.—Isa. 32:​1, 2.

2. Siasino dagiti ad-adda a pakaseknan ni Jehova? (Ezekiel 34:​15, 16)

² Maseknan ni Jehova iti amin a karnerona. Ngem ad-adda a maseknan kadagiti agkakapuy iti naespirituan. Us-usarenna dagiti panglakayen a tumulong kadakuada. (Basaen ti Ezekiel 34:​15, 16.) Nupay kasta, kayatna nga umasidegtayo kenkuana no kasapulantayo ti tulong. Kasano? Sipapasnek nga agkararagtayo iti Dios. Ngem saan la a dayta. Kayatna met nga agpatulongtayo kadagiti “papastor ken mannursuro” iti kongregasion.—Efe. 4:​11, 12.

3. Ania ti maitulongna kadatayo no ammotayo ti responsabilidad dagiti panglakayen?

³ Iti daytoy nga artikulo, pagsasaritaantayo ti inyurnos ti Dios tapno magun-odantayo ti naespirituan a tulong babaen kadagiti panglakayen. Sungbatantayo dagitoy a saludsod: Kaanotayo nga agpatulong kadagiti panglakayen? Apay a masapul nga aramidentayo dayta? Ken kasanodatayo a matulongan? Uray no awan pay laeng ti problematayo ita iti naespirituan, makatulong dagiti sungbat kadagita a saludsod tapno lallalo pay a maipategtayo dayta nga urnos ti Dios. Posible nga addanto tiempo a dayta ti mangsalbar iti biagtayo.

KAANOTAYO NGA ‘AYABAN DAGITI PANGLAKAYEN’?

4. Apay a maibagatayo a ti tuktukoyen ti Santiago 5:​14-16, 19, 20 ket ti panagsakit iti naespirituan? (Kitaen met dagiti ladawan.)

⁴ Inlawlawag ti adalan a ni Santiago ti urnos ti Dios maipapan iti panagpatulong kadagiti panglakayen. Insuratna: “Adda kadi masakit kadakayo? Ayabanna koma dagiti panglakayen iti kongregasion.” (Basaen ti Santiago 5:​14-16, 19, 20.) Ipakita ti konteksto a ti tuktukoyen ni Santiago ket panagsakit iti naespirituan. Kas pagarigan, imbagana a dagiti panglakayen, saan ketdi a doktor, ti ayaban ti masakit. Kasta met, imbagana nga umimbag ti masakit no mapakawan dagiti basolna. Adda pagpadaan dagiti masapul nga aramiden ti maysa a masakit iti naespirituan ken ti masakit iti pisikal. No agsakittayo, natural laeng nga agpadoktortayo. Ibagatayo kenkuana ti amin a sintoma a marikriknatayo ken surotentayo dagiti instruksionna. Kasta met laeng no agsakittayo iti naespirituan. Masapul nga umasidegtayo iti panglakayen. Ilawlawagtayo ti situasiontayo ken surotentayo ti maawattayo a pammagbaga manipud iti Biblia.

5. Kasanotayo a maammuan no kumapkapuyen ti espiritualidadtayo?

⁵ Iparparegta kadatayo ti Santiago kapitulo 5 nga umasidegtayo kadagiti panglakayen no mariknatayo a kumapkapuyen ti espiritualidadtayo. Ket nainsiriban nga aramidentayo dayta sakbay pay nga interamente a madadael ti relasiontayo iti Dios! Masapul nga agbalintayo a napudno iti bagitayo. Ngamin, ipakpakdaar ti Kasuratan a no ditay agannad, posible a panunotentayo a maparparagsaktayo latta ti Dios idinto ta ti agpayso ket saan gayamen. (Sant. 1:22) Kasta idi ti napasamak iti dadduma a Kristiano idiay Sardis. Isu nga imbaga kadakuada ni Jesus a saandan a maparparagsak ni Jehova. (Apoc. 3:​1, 2) Kasanotayo ngarud nga arigna matsek-ap ti espiritualidadtayo wenno masukimat dayta? Ti maysa a pamay-an ket ikomparatayo ti kinaregtatayo ita iti kinaregtatayo idi kababautisartayo. (Apoc. 2:​4, 5) Isaludsodtayo iti bagitayo: ‘Naksayan kadin ti gagarko nga agbasa iti Biblia ken agutob? Diak kadin a maat-atenderan ti amin a gimong? No mapanak met makigimong, saanak kadi a nakasagana? Bimmaaw kadin ti regtak iti ministerio? Mas sangkapanunotko kadi itan ti panagragragsak ken material a bambanag?’ No wen ti sungbattayo iti uray maysa laeng kadagita a saludsod, posible a sintomas dayta a kumapkapuyen ti espiritualidadtayo. Ket no saan a masigud, baka lallalo pay a kumaro dayta. No ditay maisubli ti nasayaat a relasiontayo iti Dios a bukbukodtayo, wenno no adda pay ketdin nalabsingtayo a pagalagadan ti Dios, masapul nga agpatulongtayon kadagiti panglakayen.

6. Ania ti masapul nga aramiden ti maysa no nakaaramid iti nadagsen a basol?

⁶ Siempre, no nakaaramid ti maysa iti nadagsen a basol a mabalin pay ketdi a pakaikkatanna iti kongregasion, masapul nga agpatulong iti panglakayen. (1 Cor. 5:​11-13) Kasapulanna ti tulong tapno maisublina ti relasionna ken Jehova. Ngamin, saanna a kaya dayta a bukbukodna. Tapno pakawanennatayo ni Jehova babaen ti subbot, masapul nga ipakitatayo iti ‘aramidtayo nga agbabbabawitayo.’ (Ara. 26:20) Ti maysa a pamay-an a maaramidtayo dayta ket umasidegtayo kadagiti panglakayen no nakaaramidtayo iti nadagsen a basol.

7. Siasino pay ti agkasapulan iti tulong dagiti panglakayen?

⁷ Malaksid kadagiti nakaaramid iti nadagsen a basol, tultulongan met dagiti panglakayen dagiti kumapkapuyen ti espiritualidadda. (Ara. 20:35) Kas pagarigan, baka marigrigatanka a manglaban iti pagkapuyam wenno dakes a tarigagaymo. Ket posible a lallalo pay a marigatanka no agdrogdrogaka idi, agbuybuyaka iti pornograpia, wenno immoral ti panagbiagmo sakbay pay a naammuam ti kinapudno. Saanka koma a mabain nga agpatulong. Mabalinmo ti umasideg iti maysa a panglakayen nga ammom a dumngeg kenka, makaipaay iti praktikal a balakad, ken mangipasigurado a maparagsakmo unay ni Jehova no itultuloymo a labanan dagiti dakes a tarigagaymo. (Ecl. 4:12) Ngem no ngay maup-upayka gapu ta saanmo latta a malablabanan dagiti dakes a tarigagay? Mabalin nga ipalagip kenka dagiti panglakayen a maparparagsakmo latta ni Jehova gapu ta nagpatulongka. Ipakpakita ngamin dayta a napakumbabaka, saanka nga agtaltalek iti bagim, ken ipatpategmo unay ti relasionmo ken Jehova.—1 Cor. 10:12.

8. Masapul kadi nga ibagatayo kadagiti panglakayen ti tunggal kamali a maaramidtayo?

⁸ Masapul kadi nga ibagatayo kadagiti panglakayen ti tunggal kamali a maaramidtayo? Saan. Kas pagarigan, ipapantayon a saanka a nakapagteppel isu a nakapagsaoka iti nakasaktan ti maysa a kabsat. Imbes nga umasidegka a dagus iti maysa a panglakayen, iyaplikarmo pay ti balakad ni Jesus. Makisaritaka nga umuna iti nasaktan a kabsat ken agpakawanka. (Mat. 5:​23, 24) Mabalinmo met nga i-research ti maipapan iti kinaalumamay, kinaanus, ken panagteppel tapno ad-adda a maipakitam dagita a nagsayaat a kualidad iti masanguanan. Siempre, no saanmo latta a masolbar ti problemam, mabalinmon ti agpatulong iti maysa a panglakayen. Iti surat ni apostol Pablo kadagiti taga-Filipos, nagpakaasi iti maysa a saan a nainaganan a kabsat a tulonganna da Euodia ken Sintique a mangurnos iti dida pagkinnaawatan. Mabalin met nga aramiden dayta ti maysa a panglakayen iti kongregasionyo.—Fil. 4:​2, 3.

APAY A MASAPUL NGA AGPATULONGTAYO KADAGITI PANGLAKAYEN?

9. Apay a masapul nga agpatulongtayo kadagiti panglakayen uray no mabaintayo gapu ta nakaaramidtayo iti basol? (Proverbio 28:13)

⁹ Kasapulantayo ti pammati ken tured tapno saantayo a mabain nga agpatulong kadagiti panglakayen no nakaaramidtayo iti nadagsen a basol wenno no mariknatayo a saantayo a kaya a labanan dagiti pagkapuyantayo. Saantayo koma a mabain nga umasideg kadagiti panglakayen. Apay? Ngamin, no sursurotentayo dayta nga urnos ni Jehova, ipakpakitatayo nga agtaltalektayo kenkuana ken kadagiti instruksionna. Iti kasta, agtalinaed a nasalun-at ti espiritualidadtayo ken nabileg ti pammatitayo. Akseptarentayo a kasapulantayo ti tulongna tapno agtultuloy a maaramidtayo ti umiso. (Sal. 94:18) Ket no nakaaramidtayo iti basol, kaasiannatayo ti Dios no ipudno ken isardengtayo nga aramiden dayta.—Basaen ti Proverbio 28:13.

10. Ania ti mapasamak no ilimedtayo ti basoltayo?

¹⁰ No ipudnotayo kadagiti panglakayen ti naaramidtayo a nadagsen a basol, pakawanennatayo ni Jehova ken maisublitayo ti nasayaat a relasiontayo kenkuana. Ngem no ilimedtayo dayta, kumaro laeng ti situasiontayo. Kasta idi ti napasamak ken Ari David. Idi pinadasna nga abbongan dagiti basolna, nagsagaba ti espiritualidadna, ti emosionna, ken uray ti salun-atna. (Sal. 32:​3-5) Kumaro ti literal a sakit wenno sugat no saan a maagasan a naimbag. Kasta met laeng ti naespirituan a sakit. No saantayo nga agpatulong kadagiti panglakayen, mabalin a madadael ti relasiontayo ken Jehova. Saan a kayat ni Jehova a mapasamak dayta. Isu nga aw-awisennatayo a ‘makilinnawag’ kenkuana babaen ti inyurnosna a pamay-an a panangtulong dagiti panglakayen tapno umimbagtayo iti naespirituan.—Isa. 1:​5, 6, 18.

11. Ania ti epektona iti sabsabali no ilimedtayo ti nadagsen a basoltayo?

¹¹ No ilimedtayo ti nadagsen a basoltayo, mabalin a maapektaran ti dadduma. Baka malapdantayo ti panagayus ti espiritu ti Dios ken mapukaw ti talna ti kongregasion. (Efe. 4:30) Iti sabali a bangir, no naammuantayo met a nakaaramid ti maysa a kabsat iti nadagsen a basol, masapul a paregtaentayo nga ipudnona dayta kadagiti panglakayen.a No saantayo ngamin nga aramiden dayta, agbasbasoltayo met ken Jehova. (Lev. 5:1) Ay-ayatentayo ni Jehova isu nga ibagatayo kadagiti panglakayen ti kinapudno. Iti kasta, makatulongtayo tapno agtalinaed a nadalus ti kongregasion ken maisubli ti nakabasol ti nasayaat a relasionna ken Jehova.

KASANODATAYO A MATULONGAN DAGITI PANGLAKAYEN?

12. Kasano a matulongan dagiti panglakayen dagiti nakapuy iti naespirituan?

¹² Naibilin kadagiti panglakayen a tulonganda dagiti nakapuy iti naespirituan. (1 Tes. 5:14) No nakaaramidka iti basol, mabalin a mangusarda kadagiti saludsod tapno ‘maaon’ wenno maawatanda ti adda iti panunot ken pusom. (Prov. 20:5) Matulongam ida no iyebkasmo ti amin kadakuada, uray no narigat dayta para kenka gapu iti kulturam, personalidad, wenno iti bain a marikriknam gapu iti naaramidmo. Saanka a madanagan no bilang ta ‘ti la adda a maibagbagam.’ (Job 6:3) Saandaka a husgaran dagiti panglakayen. Imbes ketdi, denggendaka a naimbag tapno maammuanda ti amin nga impormasion sakbay a balakadandaka. (Prov. 18:13) Ammoda a tiempo ti kasapulan iti panangipastor, isu a saanda nga ekspektaren a masolbar a dagus dagiti problema iti maysa laeng a tungtongan.

13. Kasano a makatulong kadatayo dagiti kararag ken balakad dagiti panglakayen manipud iti Biblia? (Kitaen met dagiti ladawan.)

¹³ No agpatulongka kadagiti panglakayen, saandan a lallalo pay a padagsenen ti riknam. Imbes ketdi, ikararagandaka. Denggen ni Jehova dagiti kararagda. ‘Nabileg ti epekto’ dayta ta mapatibker ken maliwliwaka iti pamay-an a saanmo nga ekspektaren. ‘Sapsapuandaka met iti lana iti nagan ni Jehova.’ (Sant. 5:​14-16) Ti “lana” ditoy ket tumukoy iti kinapudno ti Sao ti Dios. Usaren a naimbag dagiti panglakayen ti Biblia tapno mabang-aran ken maliwliwaka. Iti kasta, matulongandaka a mangisubli iti nasayaat a relasionmo ken Jehova. (Isa. 57:18) Makatulong dagiti balakadda manipud iti Biblia tapno tumibker ti determinasionmo nga agtultuloy a mangaramid iti umiso. Babaen kadakuada, kas man la mangmangngegmo ti timek ni Jehova a mangibagbaga kenka: ‘Daytoy ti dalan. Magnaka iti dayta.’—Isa. 30:21.

14. Sigun iti Galacia 6:​1, kasano a matulongan dagiti panglakayen ti asinoman a makaaramid “iti di umiso”? (Kitaen met dagiti ladawan.)

¹⁴ Basaen ti Galacia 6:1. No makaaramid ti maysa a Kristiano “iti di umiso,” saanen a magmagna iti nalinteg a pagalagadan ti Dios. Ti di umiso nga aramid ket mabalin a tumukoy iti saan a nainsiriban a desision wenno nadagsen a basol. Gapu iti ayat, ‘padasen dagiti panglakayen nga aturen a siaalumamay’ dayta a tao. Ti Griego a sao a naipatarus kas “aturen” ket mabalin met a tumukoy iti panangisimpa iti nablo wenno nagligasi a tulang tapno saan a kumaro. Ti nalaing a doktor ikagumaanna nga in-inayaden nga aramiden dayta a saan unay a masaktan ti pasiente. Kasta met laeng ti aramiden dagiti panglakayen. Ikagkagumaanda a saanda a lallalo a padagsenen ti riknatayo bayat a tultulongandatayo nga umimbag iti naespirituan. Naibilin met kadakuada nga ‘agannadda.’ Bayat a tultulongandatayo a mangilinteg iti danatayo, bigbigenda nga imperpekto met ken agkamalida. Imbes nga agpannakkel, aginlilinteg, wenno manghusgarda, ikagumaanda ti agbalin a napakumbaba ken naasi.—1 Ped. 3:8.

15. Ania ti mabalintayo nga aramiden no adda problematayo?

¹⁵ Makapagtalektayo kadagiti panglakayen. Sinanay ida ni Jehova tapno saanda nga ibaga dagiti kompidensial a bambanag. Ibatayda iti Biblia dagiti balakadda, imbes a kadagiti bukodda nga opinion. Nasursuruanda met a saan a mauma a tumulong kadatayo no adda problematayo. Makipagbagkatda kadagiti pakadagsenantayo. (Prov. 11:13; Gal. 6:2) Agduduma ti personalidad ken kapadasanda. Ngem mabalintay nga asitgan ti uray asino kadakuada no adda problema. Siempre, saantayo nga agpatulong iti maysa a panglakayen satayto manen mapan iti sabali gapu ta ditay naala ti kayattayo a mangngeg. No ngamin aramidentayo dayta, kaslatayon kadagiti tattao a ti laeng kayatda a kasarita ket dagidiay “mangibaga iti kayatda a mangngeg,” imbes a dumngegda iti “nasayaat a sursuro” ti Sao ti Dios. (2 Tim. 4:3) No agpatulongtayo iti maysa a panglakayen maipapan iti problematayo, mabalin a saludsodenna no addan nakasaritatayo a sabali pay a panglakayen ken no ania ti imbalakadna. Ken gapu ta napakumbaba, mabalin nga agkonsulta iti sabali pay a padana a panglakayen.—Prov. 13:10.

TI RESPONSABILIDAD TI TUNGGAL MAYSA KADATAYO

16. Ania ti responsabilidad ti tunggal maysa kadatayo?

¹⁶ Dagiti panglakayen ti us-usaren ti Dios a mangaywan iti arbanna. Ngem saandatayo nga idesisionan iti masapul nga aramidentayo. Responsabilidad ti tunggal maysa kadatayo ti agbiag maitunos kadagiti pagalagadan ti Dios. Datayo a mismo ti manungsungbat iti Dios iti ibagbaga ken ar-aramidentayo. Iti tulongna, makapagtalinaedtayo a matalek kenkuana. (Roma 14:12) Isu nga imbes nga idiktar dagiti panglakayen ti masapul nga aramidentayo, us-usarenda ketdi ti Biblia a tumulong kadatayo a mangtarus iti panagpampanunot ti Dios. Ket no surotentayo dagiti balakadda manipud iti Biblia, masanaytayo ti ‘abilidadtayo nga agpanunot.’ Iti kasta, makaaramidtayo kadagiti nainsiriban a desision.—Heb. 5:14.

17. Ania koma ti determinasiontayo?

¹⁷ Nagdakkel a pribilehio ti agbalin a karnero ni Jehova! Imbaonna “ti nasayaat a pastor” a ni Jesus a mangsubbot kadatayo tapno maaddaantayo iti namnama nga agbiag iti agnanayon. (Juan 10:11) Babaen ti tulong dagiti panglakayen iti kongregasion Kristiano, tinungpal ni Jehova daytoy a karina: “Ikkankayo kadagiti pastor a mangaramid iti pagayatak, ket ipaayandakayto iti pannakaammo ken pannakatarus.” (Jer. 3:15) No nakapuy wenno masakittayo iti naespirituan, saantayo koma nga agpangadua nga agpatulong kadagiti panglakayen. Urnos dayta ni Jehova. Ket sapay koma ta determinadotayo a naan-anay a magunggonaan iti dayta.