“Dikam Mabalin ti Agsardeng nga Agsao”
1 Kitkitaen a naimbag ni Jesu-Kristo ti pagdurdur-asan ti trabaho a panangasaba. (Mat. 28:20; Mar. 13:10) Nupay gistay innem a milion ti aktibo nga agibumbunannag a mangaskasaba iti 234 a pagilian, ditay koma ipapan a nalpasen ti panangasabatayo. Agingga nga ibaga ti Dios a nalpasen ti trabaho, ‘ditay mabalin ti agsardeng nga agsao’ maipapan kadagiti naadaltayo.—Ara. 4:20.
2 Agpannuray iti Espiritu ti Dios: Napalalo ti panangikagumaan ni Satanas a mangupay kadatayo. (Apoc. 12:17) Adu a parikut ti iyeg met kadatayo ti mismo nga imperpekto a lasagtayo. Dagita ti mangisiasi iti atensiontayo iti nagpateg a trabaho a panangasaba. Ngem no agtalektayo ken Jehova, tulongannatayo ti espirituna a mangsango iti aniaman a tubeng.
3 Idi naipasango iti nakaro a pannakaidadanes ti kongregasion Kristiano idi umuna a siglo, dagiti kakabsat nagkararagda iti Dios tapno tulonganna ida nga agtultuloy a mangisarita iti saona a buyogen ti naan-anay a kinatured. Sinungbatan ni Jehova ti kararagda, nga imbukbokna kadakuada ti espirituna ken impaayanna ida iti regta ken determinasion a kasapulan tapno makapagtultuloyda a mangasaba. Kas resultana, nagtultuloyda nga awan sardayna a situtured a nangipakaammo iti naimbag a damag.—Ara. 4:29, 31; 5:42.
4 Diyo Pagbutngan ti Makapaupay a Sasao: Mabalin a mamagbuteng kadatayo ti opinion ti adu a tattao wenno ti pammarpardaya a publisidad. Nupay kasta, laglagipenyo ti natured a sasao ni Pedro ken ti dadduma pay nga apostol iti saklang ti Sanhedrin, a nailanad iti Aramid 5:29-32. Kas inadmitir ti mannursuro iti Linteg a ni Gamaliel, saan a mabalin a dupraken ti trabaho ti Dios. Saan a ti pigsatayo ti mangitungpal iti dayta. Supsuportaran ti Dios daytoy naindaklan a trabaho, ket isu ti kakaisuna a makaitungpal iti dayta!—Zac. 4:6.
5 Inaldaw koma nga agkiddawtayo iti espiritu ni Jehova a tumulong kadatayo a sireregta a mangiwaragawag iti naimbag a damag. Kas ken Jeremias, sapay koma ta kunaentayo a ti mensahe ti Pagarian ket kas iti sumsumged nga apuy iti tultulangtayo. (Jer. 20:9) Saantayo a makapagulimek!