Situtured nga Iwaragawag ti Naimbag a Damag
1 Iti historia, agdindinamag iti kinatured dagiti pudno a Kristiano. Da apostol Pedro ken Juan ti kangrunaan nga ehemplo iti daytoy. Dagitoy nga apostol ti awanan buteng ken situtured a nagtultuloy a nagsao iti kinapudno. (Ara. 4:18-20, 23, 31b) Uray met ni Pablo situtured a nangitultuloy iti ministeriona nupay nagsagaba iti nagpaiduma a pannakaidadanes.—Ara. 20:20; 2 Cor. 11:23, 28.
2 Apay a dagiti apostol ken kasta met dagiti dadduma a Kristiano iti intero nga historia ket nabaelanda ti nagtultuloy a nangiwaragawag iti naimbag a damag a situtured? Sungbatan dayta ti Umuna a Tesalonica 2:2, “Timmuredkami babaen iti Diostayo tapno maisaomi kadakayo ti naimbag a damag iti Dios.” Iti kasta met laeng a wagas, da Pedro ken Juan ken agraman dagiti dadduma a disipulo ti nakabael a nangiwaragawag iti naimbag a damag a situtured.—Ara. 4:29, 31.
PANANGIPARANGARANG TI TALEK KEN JEHOVA
3 Sitatalek dagiti apostol a ni Jehova ti bumadang kadakuada. Pimmudno amin dagiti kari ni Jehova a naisawang babaen iti Saona. Ket dagidiay a kaitungpalan isut’ nagaranteyan babaen ni Kristo Jesus. Adda kadi kadatayo iti kasta a panagtalek a mangideklara a situtured iti naimbag a damag? No makitatayo iti kaitungpalan dagiti padto ti Biblia, matignaytayo kadi a mangisao iti naimbag a damag iti Pagarian ti Dios a situtured?
4 Manamnama, nupay kasta, a ti kasta a kinatured ket mapasanguantayo iti ibubusor. (Juan 15:20) Kasta idi ti kaso ni Jesus ken dagiti immuna a siglo a Kristiano. Ngem saan a daytoy ti nangatipa kadakuada wenno nangpakapoy iti kinabara ti panangasabada. (Ara. 4:3, 8-13a) Maigapu iti Kristiano a panangalagadtayo iti Sao ti Dios kadagiti nasken nga isyu, masansan a maayabantayo a mangibaga iti rason ti takdertayo. Matmatantayo dagita nga okasion a kas oportunidad a mangideklara a situtured iti naimbag a damag. No aramiden dayta, tultuladentayo ni Jesu-Kristo ken dagiti apostolna.
5 Ti panagserbi nga auxiliary payunir ti mangaramid kadatayo a maipaay iti dakdakkel nga gundaway a mangiwaragawag iti naimbag a damag. Adu dagiti nagserbi nga auxiliary payunir iti Abril ti agmayat nga agtultuloy a mangaramid iti dayta bayat ti bulan iti Mayo. Palubosan aya ti kasasaadyo iti agaplikar? Babaen ti panangikagumaan a makiraman iti auxiliary payunir a trabaho, mapaneknekantayo iti bagbagitayo a kas kada Pablo ken Bernabe. Iti Aramid 14:3 kunaenna a “nangusarda iti kalalainganna a kawadwad ti tiempo a nagsao a situtured babaen iti autoridad ni Jehova.” No mabaelantayo a gatangen iti tiempo manipud iti sabsabali nga ar-aramid a mausar iti uray 60 nga oras iti tay-ak ti ministerio bayat iti maysa a bulan, ti bendisiontayo isut’ awan duadua a mapawadwad.
6 Ti kinatured iti ministerio isut’ nasken unay a makatulong no itukon iti suskripsion. Naglaon dagiti magasina iti makasalbar ti biag a mensahe a naibasar iti Sao ti Dios. Gapuna a ditay agkedked a mangasaba a situtured a kas pangtulad iti Ehemplotayo, ni Jesus, ken dagiti apostolna.