Saludsod
◼ No agipasiartayo idiay Bethel, ania ti rumbeng a laglagipen no maipapan iti panagkawkawes ken panaglanglanga?
Iti panangisalaysayna iti pateg ti umiso a panagkawkawes ken panaglanglanga, dinakamat ti Organisado a Mangitungpal ti Ministeriotayo ti kinapateg ti pisikal a kinadalus, natakneng a panagkawkawes, ken nasayaat a panaglanglanga no mangaskasaba ken tumabtabunotayo kadagiti Nakristianuan a gimong. Kalpasanna, iti panid 131, parapo 2, kunana: “Kasta met laeng ti agaplikar no bumisbisitatayo iti pagtaengan a Bethel idiay Brooklyn wenno iti aniaman kadagiti sanga nga opisina ti Sosiedad. Laglagipenyo, ti kayat a sawen ti nagan a Bethel ket ‘Balay ti Dios,’ gapuna ti kawestayo, ti panaglanglanga ken kababalintayo ti umasping koma iti manamnama kadatayo no tumabtabunotayo kadagiti gimgimong a maipaay iti panagdaydayaw idiay Kingdom Hall.”
Nupay nasayaat ti panagkawkawes ti kaaduan a kakabsat a bumisbisita idiay Bethel, napaliiw nga addada latta kakabsat a kasual unay ti panagkawkawesda no mapanda idiay Bethel. Iti daytoy a banag, a kas met iti amin a sabsabali pay nga aspeto ti Nakristianuan a biagtayo, kayattay a taginayonen dagiti isu met laeng a nangato nga estandarte a mangiduma kadatayo iti daan a lubong. Gapuna, no agpasiarkayo idiay Bethel, saludsodanyo ti bagiyo: ‘Natakneng kadi ti panagkawkawes ken panaglanglangak? Pakaidayawan kadi ti Dios a pagdaydayawak? Saan ngata a dillawen dagiti sabsabali ti itsurak? Mangipakpakitaak kadi iti maitutop nga ehemplo kadagiti sabsabali a kakaduami, a nalabit damoda ti agpasiar idiay Bethel?’
Napaliiw a kaaduan a di nasayaat ti panagkawkawesda nga agpaspasiar idiay Bethel ket dagidiay mayad-adalan iti Biblia wenno interesado. Gapuna, sakbay nga awisentay dagitoy idiay Bethel, nasken nga ilawlawagtayo a nasakbay kadakuada dagiti estandarte ti Bethel iti panagkawkawes ken panaglanglanga tapno makapagsaganada ken agkawesda iti maitutop. Nupay mabalin a bumdengtayo a mangaramid iti kastoy, sigurado nga ad-adda a naayat dayta ngem ti panangituloktayo a mabainandanto gapu ta immayda iti Bethel a di maitutop ti kawesda.
Datayo, agraman dagidiay iyad-adalantayo, sapay koma ta kanayon nga ‘arkosantay ti sursuro ti Manangisalakantayo, ti Dios, iti isuamin a bambanag’ babaen ti panagkawkawes ken panaglanglangatayo.—Tito 2:10.