Dagiti Gimong Gunggonaanna Dagiti Agtutubo
1 Kinuna ti maysa a tin-edyer a babai: “No dadduma, pagarupek a ti situasion dagiti agtutubo ti karirigatan. Napalikmutankami kadagiti tattao a mannakiabig, managdroga, ken mammartek.” Kasta kadi ti panagriknayo? No kasta, ania ti ammoyo a makatulong kadakayo a mangsaranget kadagitoy a dakes nga impluensia? Kasapulanyo ti pammati, nabileg a pammati iti kinaumiso dagiti dalan ni Jehova, ta no awan dayta “di mabalin nga ay-aywen unay” ti Dios. (Heb. 11:6) Ti itatabuno kadagiti gimong ti kongregasion tulongannakayo a mangpabileg iti Nakristianuan a kombiksion ken determinasionyo a mangliklik iti dakes.
2 Naruay ti Maipaay Kadakayo Dagiti Gimong: Aniat’ mamagbalin a naragsak iti pannangan iti naimas a taraon a kadua dagiti nasinged a gagayyem? Saan aya a ti kombinasion ti naimas a taraon ken ti makaay-ayo a panaglalangen iti natalinaay nga aglawlaw? Bueno, kasta met ti kasayaatna ti masagrap kadagiti gimongtayo, ngem iti naespirituan a wagas.
3 Makapabileg dagiti mapagsasaritaan kadagiti gimong, manipud kadagiti banag a mainaig kadagiti inaldaw a parikut iti biag agingga iti panagadal kadagiti makapainteres unay a padto ti Biblia. Addada maisango a praktikal nga instruksion a mangisuro kadakayo no kasano ti kasayaatan a wagas ti panagbiag ken panangsango kadagiti karit a sumangbay kadakayo. Dagidiay makalangen kadagiti gimong isuda ti kasasayaatan a kakadua, ket makaay-ayo ken natalged ti naespirituan nga aglawlaw. (Sal. 133:1) Di pakasdaawan a naikuna ti maysa nga agtutubo: “Agmalmalemak idiay eskuelaan, ket pakapsutennak unay dayta. Ngem dagiti gimong ket kas ubbog iti desierto, a mangpabang-ar kaniak tapno napigsaak manen iti sumaganad nga aldaw a panageskuela.” Kinuna ti sabali pay: “Napaneknekak a ti nadekket a pannakitimpuyog kadagiti sabsabali pay a mangay-ayat ken Jehova ti nakatulong kaniak nga agtalinaed a nadekket kenkuana.”
4 Babaen ti panagpasalista iti Teokratiko nga Eskuelaan ti Panagministro, masursuroyo ti agurnong iti Biblikal nga impormasion, a buklenyo dayta a palawag, sa isangoyo iti wagas a kasla kasarsaritayo dagiti agdengdengngeg idiay Kingdom Hall. Panunotenyo ti pagimbaganna no masanaytayo a mangisuro a silalaing kadagiti makaispal-biag a kinapudno iti Sao ti Dios! Sadino ti sabali pay a pakagun-odan dagiti agtutubo iti kasta a nagpateg a pannakasanay?
5 No Kasanokayo a Magunggonaan a Naimbag Kadagiti Gimong: Tapno magunggonaankayo a naimbag kadagiti gimong, adda tallo a napapateg a banag a nainaig iti dayta, nga isu dagitoy: panagsagana, pannakipaset, ken panangyaplikar.
6 Agsaganakayo: Mangyeskediul iti tiempo a para iti regular a panagsagana kadagiti gimong. Diyo itulok a dagiti aramid iti eskuelaan, paset-tiempo a trabaho, wenno panaglinglingay ti mangtakaw iti kasapulanyo a tiempo a panangrepaso a nasakbay iti material nga adalen iti kada gimong. Makatulong ti kaadda ti nasayaat a rutina. Umuna ken kangrunaan iti amin, surotenyo ti linawas nga eskediul ti panagbasa iti Biblia para iti Teokratiko nga Eskuelaan ti Panagministro. Kasapulan laeng ti sumagmamano a minuto iti kada aldaw a mangbasa ken mangmennamenna kadagiti naituding a kapitulo. Mangilasinkayo iti tiempo a panagsagana para iti Panagadal iti Libro ti Kongregasion ken Panagadal iti Pagwanawanan. Dagiti dadduma ar-aramidenda daytoy iti uray maysa wenno dua laeng nga aldaw sakbay dagita a gimong. No mabalbalin, kasta met laeng ti aramidenyo kadagiti paset a nayeskediul iti Gimong ti Serbisio iti tunggal lawas.
7 Makipasetkayo: Kuna ti Biblia nga idi agtawen ni Jesus iti 12, nasarakanda idiay templo, nga agim-imdeng, agsalsaludsod, ken agsungsungbat. (Luc. 2:46, 47) Iti sabali a pannao, naan-anay a nakipaset. Ad-adu ti magunggonayo kadagiti gimong no ikagumaanyo ti makipaset kadagita.—Prov. 15:23.
8 Nasken nga ipamaysayo a panunoten ti maisursuro kadagiti gimong. No dadduma, narigrigat ti agdengngeg iti palawag ngem ti agpalawag. Apay? Mabalin nga agtawataw ti panunotyo no adda agpalpalawag. Kasanoyo a malapdan daytoy? Babaen ti panaginotar. Isuratyo dagiti napateg a punto a kayatyonto a repasuen. Ti panaginotar tulongannakayo a mangipamaysa ti panunotyo iti programa. Kasta met, kitaenyo dagiti teksto, ket pasurotanyo bayat a basaen dagitoy ti agpalpalawag.
9 Kanayonanna, pagbalinenyo a kalat ti agkomento no adda paset a saludsod ken sungbat kadagiti gimong. Ad-adda a magunggonaankayo no utobenyo a naimbag no ania ti kayatyo nga ibaga. Kuna ti Proverbio 15:28: “Ti puso ti nalinteg panunotenna ti isusungbatna.”
10 Iyaplikar ti Maadalyo: Ti maudi nga addang ket siguraduenyo nga ‘agtigtignay kadakayo’ ti maadalyo. (1 Tes. 2:13) Bayat nga iyaplikaryo dagiti nasayaat a punto a maadalyo iti kada gimong, ad-adda a sumingedkayo ken Jehova a Dios. Agbalin a napaypayso kadakayo, ket masagrapyo ti naindaklan a rag-o ken pannakapnek bayat nga ‘agtultuloykayo a magna iti kinapudno,’ a tagikuaenyo dayta.—3 Juan 4.
11 Dakayo a kakabsat nga agtutubo, no agsaganakayo a regular kadagiti gimong, makipasetkayo kadagita, ken iyaplikaryo dagiti maadalyo, matagiragsakyo a naan-anay dagiti gimong. Maigiddato iti dayta, magun-odyo amin a pagimbagan nga ipaayda. Mapabileg ti pammatiyo, kasta met ti determinasionyo nga agtalinaed a napudno iti nailangitan nga Amayo, ni Jehova.—Sal. 145:18.