Maysakayo a “Bubuyaen iti Teatro”!
1 Insurat ni apostol Pablo: “Nagbalinkami a bubuyaen iti teatro iti lubong, ken kadagiti anghel, ken kadagiti tattao.” (1 Cor. 4:9) Ania ti kaipapanan daytoy, ken ania koma ti epektona iti ministeriotayo ita?
2 Para iti maysa a taga Corinto, ti sasao a “bubuyaen iti teatro” nalabit ipalagipna ti ngudo ti salisal dagiti Romano a gladiador. Agparada dagiti nakondenar a tattao iti imatang ti rinibu nga agbuybuya sakbay nga awanan asi a mapapatayda. Mainaig iti dayta, adu a tattao ken anghel ti nakaimatang kadagiti rigat a sinagaba dagiti Kristiano idi umuna a siglo gapu iti panangikasabada iti Pagarian. (Heb. 10:32, 33) Naapektaran ti adu idi makitada ti kinamatalek dagitoy. Kasta met ti epekto ti panagibturtayo kadagiti moderno-aldaw nga agbuybuya. Siasino dagiti mangbuybuya kadatayo?
3 Ti Lubong ken ti Tattao: No dadduma ipablaak ti media dagiti damag maipapan kadagiti trabaho ti ili ni Jehova. Nupay apresiarentayo dagiti pudno ken awan idumdumana a damag maipapan iti trabahotayo, namnamaentay met a pasaray adda dagiti pammadakes nga iwaras dagiti bumusbusor kadatayo. Kaskasdi, itultuloytayo nga irekomenda ti bagbagitayo kas ministro ti Dios iti laksid ti “dakes a damag ken nasayaat a damag.” (2 Cor. 6:4, 8) No kadagidiay agpalpaliiw a nasingpet ti panagpuspusoda, nalawag kadakuada a datayo dagiti pudno nga adalan ni Jesu-Kristo.
4 Dagiti Anghel: Palpaliiwendatayo met dagiti espiritu a parsua. Agbuybuya ti Diablo ken dagiti demoniona—ngem buyogen ti “dakkel nga unget,” nga ipamuspusanda a pasardengen “ti trabaho a panangsaksi ken Jesus.” (Apoc. 12:9, 12, 17) Buybuyaen ken pagrag-oan dagiti matalek nga anghel ti Dios no adda maysa a managbasol nga agbabawi. (Luc. 15:10) Mapabilegtayo koma a makaammo nga iti imatang dagiti anghel, ti ministeriotayo ti kaganatan ken makagunggona unay a trabaho a maar-aramid ditoy daga ita!—Apoc. 14:6, 7.
5 No maipasangokayo iti ibubusor wenno ipapanyo nga awan serserbina ti ministerioyo, laglagipenyo a dakayo ti sentro ti atension dagiti adda idiay langit ken ditoy daga. Adu ti ipanayag ti matalek a panagibturyo. Inton agangay, ti ‘pannakirupakyo iti nasayaat a dangadang ti pammati’ tulongannakayo a ‘mangpetpet a sititibker iti agnanayon a biag.’—1 Tim. 6:12.