Kasano Kapateg ti Nakristianuan a Timpuyog?
1 “Awan ti tao a makapagmaymaysa.” Dayta a sasao ti maysa a mannaniw idi maika-17 a siglo ket panangulit laeng iti kinuna ti Biblia maipapan iti maysa a napateg a kasapulan ti tao—pannakitimpuyog. (Prov. 18:1) Punnuan ti Nakristianuan a timpuyogtayo dayta a banag. Kadagiti ania a makagunggona a wagas?
2 Iti Ministerio: Ti maysa kadagiti kangrunaan a gunggona nga itdenna isu ti pammabileg ken suporta nga ipaay kadatayo dagiti kakabsat iti tay-ak ti panangasaba. Imbaon ni Jesus a mangasaba dagiti adalanna a “sagdudua.” (Mar. 6:7; Luc. 10:1) Maitunos iti daytoy a padron, mapasarantayo ti kinapudno ti Eclesiastes 4:9, 10 no makikaduatayo kadagiti kakabsat a mangasaba. No adda kaduatayo, tumured ken mapabaro ti regtatayo babaen ti pammati, kinatulnog, ken ayat nga adda kadakuada.
3 Agpaay iti Personal a Tulong: Ti panagkakabsattayo ket gubuayan met ti pammaregta ken panangiwanwan no kasano a madaeran dagiti pakarigatan ken masaranget dagiti sulisog. Mabalin a dagiti Kristiano a kakabsat ipalagipda kadatayo dagiti kasuratan a tumutop iti kasasaadtayo. Mabalin pay ketdi nga ikararagandatayo, a kas iti ar-aramidentayo kadakuada. (2 Cor. 1:11) Sigurado a mapabileg ken magutugottayo nga agaramid iti naimbag gapu iti nasayaat nga ulidanda.
4 Kadagiti Gimong: Matagiragsaktayo ti bendision nga itden ti Nakristianuan a timpuyog no regular a tumabunotayo kadagiti gimong ti kongregasion. (Heb. 10:24, 25) Aglaplapusanan ti programa iti naespirituan nga instruksion, ket mataginayon ti kinasingedtayo kadagiti kapammatian no addatayo kadagiti gimong. Kadagitoy a panagtataripnong a mangngegtayo ti panangyebkas dagiti kakabsat iti pammatida, iti man plataporma wenno kas agdengdengngeg. (Roma 1:12) Ad-adda a lumagda ti singgalut ti timpuyogtayo no aglalangentayo sakbay ken kalpasan dagiti gimong. Mangted dayta kadatayo iti gundaway a mangisalaysay kadagiti makapabileg-pammati a kapadasantayo. Maparang-ay ti personalidadtayo no siwayawaya a makilangentayo kadagidiay mangipatpateg ken Jehova, iti Saona, iti trabahona, ken iti ilina.—Fil. 2:1, 2.
5 Kasapulantayo dagiti Kristiano a kakabsat. No awanda, ad-adda a narigat ti magna iti nailet a dalan nga agturong iti biag. Ngem gapu iti ayat ken pammaregtada, makapagtultuloytayo nga agturong iti nalinteg a baro a lubong ni Jehova.—Mat. 7:14.