Dakayo a Nagannak—Sanayenyo Dagiti Annakyo a Mangasaba
1 Naparaburan dagiti kongregasiontayo iti adu nga ubbing nga addaan iti napasnek a tarigagay nga agserbi iti Dios. (Ecl. 12:1) Karamanda kadagiti inawis ni Jehova a mangidayaw kenkuana. (Sal. 148:12-14) No kasta, ti inaldaw a panangsanay dagiti nagannak kadagiti annakda nasken nga iramanna ti panangisuro no kasano nga ikasaba ti Pagarian.—Deut. 6:6, 7.
2 In-inut a Sanayen Dagiti Ubbing: Maikari dagiti ubbing a masanay a kumuyog kadagiti dadakkelda iti ministerio iti nasapa nga edad. Sakbay a mangasaba, isaganayo dagiti annakyo a makiraman iti presentasion. Ikeddengyo a nasakbay no ania ti namnamaenyo nga aramidenda iti tay-ak. Dagiti naganus pay nga ubbing ti mabalin a mangipaima kadagiti tract ken polieto ken mangawis kadagiti tattao iti Kingdom Hall. Mabalin a mangibasa iti teksto dagidiay nasayuden nga agbasa. Mabalinda ti mangitukon kadagiti magasin babaen ti ababa a presentasion. Bayat nga umad-adu ti kapadasanda, sanayenyo ida a mangusar iti Biblia no mangaskasabada. Adu nga agtutubo ti nakairugi iti rutinada iti magasin ken regular a mangar-aramidda iti panagsarungkar. Ad-adda a pagsayaatan ti ubing ti pannakipagtrabaho iti maysa nga adulto imbes nga iti padana nga ubing. Mabalin nga ilawlawag ti adulto a masansanay ti ubing iti ministerio.
3 Maysa nga ubing pay a babai ti nagpatulong kadagiti panglakayen tapno makualipikar nga agbalin kas agibumbunannag iti Pagarian. Nupay lima laeng ti tawenna idi ken dina ammo ti agbasa, epektibo ti panangiparangna iti mensahe. Inkabesana ti pakasarakan kadagiti teksto, luktanna dagita, ipabasana kadagiti bumalay, sana ilawlawag.
4 Babaen ti ulidan dagiti nagannak, nasken met a maisuro kadagiti ubbing a napateg ti maaddaan iti nasayaat nga eskediul ti pannakiraman a regular iti ministerio. Masapul a mangyurnos dagiti nagannak iti permanente a linawas nga eskediul a mangasaba ket salimetmetanda dayta, tapno ammo dagiti ubbing no ania a paset ti lawas ti nairanta a pannakiraman iti panangasaba.
5 No masanay dagiti ubbing a mangtagiragsak iti ministerio iti nasapa nga edad, matignaydanto a gumaw-at iti dakdakkel a pribilehio iti masanguanan, nalabit uray ti panagserbi kas payunir. (1 Cor. 15:58) Nasken a paregtaentay amin dagiti kakaduatayo nga ubbing a rumang-ay kas agdaydayaw ken ni Jehova.