Paset 6—Panangikondukta Kadagiti Progresibo a Panagadal iti Biblia
No Agsaludsod ti Estudiante
1 No naipasdeken ti panagadal iti Biblia, gagangay a kasayaatan no naurnos ken agsasaruno ti panangusigyo kadagiti sursuro ti Biblia imbes a laktalaktawanyo dagiti topiko. Tumulong daytoy iti estudiante tapno adda pangibatayanna iti umiso a pannakaammo ken tapno rumang-ay iti naespirituan. (Col. 1:9, 10) Ngem masansan nga agsaludsod dagiti estudiante maipapan iti nadumaduma a topiko bayat ti panagadal. Kasano a tamingen dagitoy?
2 Agbalinka a Mannakaawat: Mabalin a sungbatan a dagus dagiti saludsod a mainaig iti maad-adal a material. No ti saludsod ket mausigto iti sumaganad, mabalin nga umdasen ti basta panangikuna a mapagadalanyonto dayta. Ngem no ti saludsod ket awan pakainaiganna iti maad-adal a material wenno agkasapulan iti panagsukimat tapno maammuan ti umiso a sungbat, nasaysayaat no usigen dayta a banag kalpasan ti panagadal wenno iti sabali a gundaway. Natakuatan dagiti dadduma nga agibumbunannag a ti panangisurat iti saludsod ipasiguradona iti estudiante a masungbatanto ti saludsodna ken makatulong dayta tapno saan a masinga ti panagadal.
3 Kadagiti kangrunaan a publikasiontayo a maus-usar iti panagadal, ababa laeng ti pannakailawlawag dagiti adu a sursuro ti Biblia. Kasanon no marigatan ti estudiante a mangakseptar iti maysa a sursuro wenno mamati pay laeng iti di umiso a sursuro? Mabalin a makagunggona no mangusigkayo iti kanayonan a material a naan-anay a mangilawlawag no ania ti kuna ti Biblia maipapan iti dayta a banag. No saan latta a kombinsido ti estudiante, pagsaritaanyonto dayta iti sabali a gundaway sa ituloyyo pay laeng ti regular a panagadalna. (Juan 16:12) Bayat nga umad-adu ti pannakaammona iti Biblia ken rumangrang-ay iti naespirituan, mabalin a maawatannanto dayta a sursuro ti Biblia.
4 Agbalinka a Naemma: No saanka a sigurado iti sungbat ti maysa a saludsod, saanka a mangted iti personal nga opinion. (2 Tim. 2:15; 1 Ped. 4:11) Ilawlawagmo nga agsukimatkanto pay ket sungbatamto dayta inton agsublika. Mabalin met a gundawayam dayta tapno isurom ti iyad-adalam no kasano ti agsukimat. In-inut nga ipakitam kenkuana no kasano nga usaren dagiti nadumaduma a katulongan iti panagsukimat nga ipapaay ti organisasion ni Jehova. Iti daytoy a pamay-an masungbatannanto dagiti bukodna a saludsod.—Ara. 17:11.