Ad-adda a Panangipaganetget iti Biblia!
1. Idi damo, nadisenio Ti Pagwanawanan nga agpaay a nangnangruna kadagiti siasino, ket agpaay kadagiti siasino ti The Golden Age?
1 Idi Oktubre 1, 1919, naipablaak ti kaunaan a ruar ti magasin a The Golden Age. Napaneknekan a nagsayaat dayta nga alikamen iti trabaho a panangasaba. Apay? Agsipud ta nairanta a nangnangruna nga agpaay iti publiko. Saan a kasta Ti Pagwanawanan, nga iti adu a tawen ket naibilang kas maysa a magasin a nangnangruna nga agpaay iti “bassit nga ipastoran.” (Luc. 12:32) Dagiti agibumbunannag iti Pagarian nagagaranda unay iti baro a publikasion ta iti adu a tawen, ad-adu pay ketdin nga amang ti naipaima a The Golden Age ngem iti Pagwanawanan.
2. Ania ita ti nagan ti The Golden Age, ket ania ti panggepna sipud idi nangrugi?
2 Naipablaak ti magasin a The Golden Age tapno maisuro kadagiti tattao a ti talaga a solusion kadagiti parikut ti sangatauan ket ti Milenio a Panagturay ni Kristo, a talaga a mangirugi iti nabalitokan a panawen agpaay iti sangatauan. Kadagiti simmaruno a dekada, adu ti nabalbaliwan iti The Golden Age tapno maibagay iti nadumaduma a kasasaad ti tiempotayo. Idi 1937, nasukatan ti naganna iti Consolation. Idi 1946, nagbalin dayta nga Agriingkayo!, ti ammotayo ita a naganna.
3. Ti Agriingkayo! ket nabileg nga alikamen iti pannakatungpal ti ania a padto?
3 Sipud idi nangrugi, nagadu ti naitulong dayta a magasin iti maar-aramid a dakkel a panangsaksi sipud idi 1919. (Mat. 24:14) Nupay kasta, gapu iti kinaganat ti tiempotayo, agparang a nainsiriban ti mangaramid kadagiti kanayonan a panagbalbaliw iti Agriingkayo!
4. (a) Ania ti rumbeng nga aramiden ti maysa a tao tapno maitalimeng iti “aldaw ti unget ni Jehova”? (b) Sigun iti Apocalipsis 14:6, 7, ania ti iyaw-awis ti “anghel nga agtaytayab iti nagtangatangan” nga aramiden ti amin?
4 Magusgustuan ti minilion a tattao ti agbasa iti Agriingkayo! agsipud ta makaay-ayo ti panangsaklawna iti nagadu ken nadumaduma a di narelihiosuan a topiko. Di pagduaduaan a kaaduan kadagiti tumabtabuno iti Memorial iti kada tawen ket regular nga agbasbasa iti Agriingkayo! Nupay kasta, no adda siasinoman a mayat a maitalimeng iti “aldaw ti unget ni Jehova,” kasapulanna ti tulong a mangaramid iti ad-adu pay ngem iti basta regular a panagbasa kadagiti publikasiontayo.—Sof. 2:3; Apoc. 14:6, 7.
5. (a) Mangrugi iti Agriingkayo! nga Enero 2006, ania ti ad-adda a maipaganetget? (b) Ania ti mabalin a pakatignayanto nga aramiden ti adu, ket kas kaitungpalan ti ania a padto?
5 Gapuna, mangrugi inton Enero 2006, ti Agriingkayo! ad-adda nga ipaganetgetnanton ti Pagarian ti Dios. Ad-adda a direkta ti panangparegtananto kadagiti agbasbasa tapno kitaenda iti Biblia dagiti solusion kadagiti parikutda ken ad-adda nga itampokna ti panangilawlawag ti Biblia kadagiti agdama a pasamak. Iti kasta, dagiti agbasbasa nalawlawagto ti pannakaawatda kadagiti agdama a pasamak ken nalabit matignayda iti mabasada tapno agadalda iti ad-adu maipapan ken Jehova.—Zac. 8:23.
6, 7. (a) Kasanonto a madisenio ti Agriingkayo! tapno matulongan ti adu a mangyaplikar iti 1 Tesalonica 2:13? (b) Kasanonto ti kasansan ti pannakaipablaak ti Agriingkayo!, ket kasano kaadu a pagsasao ti maapektaran iti panagbalbaliw?
6 Agtultuloyto ti Agriingkayo! a mangitampok kadagiti topiko a paginteresan ti kaaduan a tattao. Nupay kasta, ti Biblia ti ad-addanto a maipaganetget. (1 Tes. 2:13) Yantangay aglaon Ti Pagwanawanan kadagiti nauuneg nga impormasion a naibasar iti Biblia ken ad-adu a Nainkasuratan a material ti maitampok iti Agriingkayo!, agparang a saanen a masapul a maitultuloy a maipablaak ti Agriingkayo! iti mamindua iti kada bulan. Gapuna, mangrugi iti Enero 2006 a ruarna, maipablaakton ti Agriingkayo! kas binulan a magasin. Agresultanto dayta iti adu a panangpasimple iti pannakaisagana, pannakaipatarus, ken pannakaipatulod dagiti literaturatayo.
7 Daytoy a panagbalbaliw apektarannanto ti agarup 40 a porsiento kadagiti pagsasao a nakaipablaakan ti Agriingkayo! Iti kaaduan a pagsasao, ti Agriingkayo! ket binulanen wenno mamimpat iti kada tawen a maipablaak. Awanto ti mabalbaliwan iti pannakaipablaak Ti Pagwanawanan.
8. Kasano ti mabalin a panangipaima dagiti agibumbunannag iti Agriingkayo! agraman Ti Pagwanawanan?
8 Dagiti agibumbunannag mabalin nga itukonda ti binulan nga Agriingkayo! a kadua ti aniaman a Ti Pagwanawanan iti dayta a bulan. Dagidiay mangipaima iti Agriingkayo! mabalindanton nga usaren ti isu met la a ruar iti intero a bulan a saanen a masapul a baliwanda ti presentasionda iti ngalay iti bulan a kas iti agdama.
9. Ania ti agtultuloyto a maitulong ti Agriingkayo!?
9 Sipud iti damo a pannakaipablaakna idi 1919, ti magasin a nagsasaruno a napanaganan iti The Golden Age, Consolation, ken Agriingkayo! itan ket dakkel ti naitulongna iti trabaho a panangasaba. Ikarkararagtayo nga itultuloy koma a bendisionan ni Jehova ti pannakaipaima ti magasin a nabaliwanton ti linaonna ken makatulongto koma dayta iti ad-adu pay a tattao manipud iti “amin a nasion ken kadagiti tribu ken kadagiti ili ken kadagiti pagsasao” nga agpannuray iti Pagarian ti Dios kas ti kakaisuna a namnamada.—Apoc. 7:9.