Saludsod

◼ Maitutop kadi ti agibaratilio wenno mangyurnos kadagiti dadduma pay a pasken tapno adda maurnong a pondo para iti kongregasion?

Gagangay a mangigakgakat dagiti relihioso nga organisasion kadagiti pasken a pangurnongan kadagiti pondo, kas kadagiti padaya, panaglako, wenno piesta. Nupay ipapan dagiti dadduma a nasayaat met ti panggep dagitoy, katupag dayta ti panagur-or ket saan a kayat dagiti Saksi ni Jehova ti maaddaan iti pondo iti kasta a wagas.

No maipapan iti panagkedkedtayo a mangtulad kadagiti simbaan ken iti di panagur-or kadagiti pondo, kastoy ti kuna ti maikadua a ruar ti Watch Tower, idi Agosto 1879: “Patien ti ‘Zion’s Watch Tower’ a ni JEHOVA ti tumulong kenkuana isu a pulos a saan a dumawat wenno umararaw iti tulong dagiti tattao. No Daydiay nagkuna: ‘Amin a balitok ken pirak kadagiti bambantay kukuak,’ ket isardengnan ti mangted kadagiti kasapulan a pondo, maawatanmi a panawenen tapno isardengmi ti agipablaak.”

Itultuloytayo a suroten ti Nainkasuratan a prinsipio: “Tunggal maysa aramidenna koma kas iti inkeddengna iti pusona, saan nga iti nadagsen a rikna wenno mapilpilit, ta ti Dios ayatenna ti naragsak a manangited.” (2 Cor. 9:7) Iti Kingdom Hall, adda dagiti kahon a pagitinnagan iti kontribusion ti siasinoman a mayat nga agdonasion. (2 Ar. 12:9) Saan a maur-or dagiti kontribusion; saanda met a maited gapu ta adda kasukatna.