Iplanoyo Itan ti Ag-auxiliary Pioneer!
1. Apay a nasken nga addaantayo kadagiti kalat para iti umay a tawen?
1 No kayattayo ti rumang-ay iti naespirituan, nasken nga addaantayo kadagiti kalat. Ania dagiti kalatyo para iti umay a tawen? Nagsayaat a kalat ti panag-auxiliary pioneer. Yantangay daytoy a makaparagsak nga aktibidad gagangay a kasapulanna ti nasakbay a panagplano, itan ti nasayaat a tiempo tapno irugitayo dayta. Apay a dimo aramiden a kalat ti panag-auxiliary pioneer?
2. Apay a nasayaat no aramidentayo a kalat ti panag-auxiliary pioneer?
2 Ti panag-auxiliary pioneer ti mangted kadatayo iti gundaway nga agserbi “nga ad-adda pay a naan-anay” iti nailangitan nga Amatayo babaen ti panangbusbostayo iti ad-adu a tiempo iti ministerio. (1 Tes. 4:1) Bayat nga utobentayo dagiti amin nga inaramid ni Jehova agpaay kadatayo, gutugotennatayo ti pusotayo a ‘mangidaton iti Dios iti sakripisio ti panagdaydayaw.’ (Heb. 13:15; 1 Juan 4:9, 10) Siempre, ti panag-auxiliary pioneer ket agkalikagum iti panangisakripisio iti tiempo ken pigsa. Ammo ni Jehova ti kasasaad ken sakripisio ti tunggal maysa kadatayo tapno makapagserbitayo kenkuana. (Heb. 6:10) Mangyeg iti dakkel a rag-o ti pannakaammotayo a makaay-ayo ken Jehova ti napinget a panagtrabahotayo.—1 Cron. 29:9; Isa. 65:14.
3, 4. Kasano a magunggonaantayo iti panag-auxiliary pioneer?
3 Dagiti Gunggona: Nalaklaka ken ad-adda a makaparagsak ti maysa a banag no aramidem dayta a naynay. No ad-adu a tiempo ti busbosem iti ministerio, ad-adda nga agbalinka a kalmado no addakan iti ridaw. Lumaingka a mangirugi kadagiti saritaan ken mangusar iti Bibliam. Natibtibker ti pammatim no masansan nga isarsaritam dayta. Adu nga awanan iti iyad-adalan iti Biblia ti nakasarak iti iyadalan bayat ti panag-auxiliary pioneer-da.
4 No saantayo a rumangrang-ay iti naespirituan, mabalin a ti panag-auxiliary pioneer ti makatulong kadatayo nga agregta. Maysa a dati a regular pioneer ti nangikeddeng nga ag-auxiliary pioneer iti maysa a bulan gapu ta nadlawna a ti sekular a trabahona ti ad-adda nga ipangpangrunana. Kinunana: “Diak makappapati no kasano a bimmilegak iti naespirituan kabayatan dayta a bulan! Nangaramidak kadagiti urnos tapno makapagtultuloyak kas auxiliary pioneer, a nagbanag iti panagbalinko manen a regular pioneer.”
5. Kasano a madaerantayo ti sumagmamano a gagangay a lapped iti panag-auxiliary pioneer?
5 Panangdaer Kadagiti Lapped: Adda dagidiay agkedked nga ag-auxiliary pioneer gapu ta iti panagriknada ket saanda a nalaing a mangasaba. No daytoy ti mangigawgawid kenka, laglagipem a matulongannaka ni Jehova. Nupay ‘naullayat ti ngiwat ken dila’ ni Moises, isu ket inusar ni Jehova a mangibanag iti pagayatanna. (Ex. 4:10-12) No agsagsagabaka kadagiti parikut iti salun-at wenno no okupadoka, saanmo a laksiden a dagus ti panag-auxiliary pioneer. Nalaka laeng nga abuten ti makalikaguman nga oras. Tapno maalam ti 50 nga oras iti maysa a bulan, mangbusboska iti awan pay dua nga oras iti inaldaw. Makapag-auxiliary pioneer-ka no adda nasayaat nga eskediulmo. No okupado ti eskediulmo, baka mabalin nga aramidemto iti sabali a bulan dagiti saan a napateg nga aktibidadmo. Dadduma nga addaan iti amin-tiempo a trabaho naiwayaanda ti ag-auxiliary pioneer babaen ti panagbakasionda iti maysa wenno dua nga aldaw laeng.—Col. 4:5.
6. Apay a makagunggona no ikararagmo ti panag-auxiliary pioneer-mo?
6 No Kasano nga Aramiden Dayta: No saanmo a masigurado no makapag-auxiliary-ka, agkararagka iti Dios maipapan iti tarigagaymo. (Roma 12:11, 12) Kiddawem ken Jehova a bendisionanna dagiti panagreggetmo a mangpalawa iti ministeriom. Matulongannaka a mangaramid kadagiti nainsiriban a desision no kasano a baliwam ti eskediulmo. (Sant. 1:5) No awan ti tarigagaymo nga agpayunir, kiddawem ken Jehova a tulongannaka a maaddaan iti rag-o iti trabaho a panangasaba. (Luc. 10:1, 17) No iti panagriknam ket saanmo a kabaelan, dumawatka iti bileg ken Jehova.—Ara. 4:29.
7. Kasano a ti panangyaplikar iti Proverbio 15:22 matulonganna ti maysa a miembro ti pamilia nga ag-auxiliary pioneer?
7 Mabalin a pagsasaritaan ti intero a pamilia ti kalat a panag-auxiliary pioneer. (Prov. 15:22) Nalabit makapag-auxiliary pioneer ti maysa a miembro ti pamilia no suportaran ti dadduma a kameng ti sangakabbalayan. Kas pagarigan, mabalin nga agsisinnublat dagiti kameng ti pamilia a mangkadua iti auxiliary pioneer a mangasaba iti rabii wenno kadagiti ngudo ti lawas. Mabalin met a tulonganda ti auxiliary pioneer a mangobra kadagiti trabaho a gagangay nga ar-aramidenna. Malaksid iti dayta, mabalinmo nga ibaga ti tarigagaymo nga agpayunir kadagiti dadduma iti kongregasion, nangnangruna dagidiay addaan iti kasasaad a kas kenka. Nalabit daytoy ti ad-adda a mangpagagar kenka ken ad-adu ti mangsuporta kenka.
8. Ania dagiti bulan a mabalinmo a pagpilian para iti panag-auxiliary pioneer?
8 Kitaem ti kalendario iti 2007 ket ikeddengmo no kaanoka a makapag-auxiliary pioneer. No agtartrabahoka iti amin-tiempo wenno ages-eskuelaka, baka kayatmo nga ikabilangan dagiti bulan nga addaan iti lima a Sabado, lima a Domingo, wenno addaan iti piesta opisial. Lima ti Sabado ti Marso ken Hunio, ken lima met ti Domingo ti Abril ken Hulio. Ti Setiembre ken Disiembre ket addaan iti lima a ngudo ti lawas. Nalabit kayatmo met nga ikabilangan dagiti bulan nga addaan iti nasayaat a paniempo. Mabalin a kayatmo met ti agpayunir bayat ti bulan nga ibibisita ti manangaywan iti sirkito iti kongregasionyo. Apaman a naikeddengmon no ania dagiti bulan ti panag-auxiliary pioneer-mo, rugiamon nga isurat ti eskediul a makatulong kenka a mangragpat iti 50 nga oras.
9. Ania ti mabalintayo nga aramiden no saan a posible ti panag-auxiliary pioneer?
9 Kalpasan ti ‘panangpattapattam a naimbag iti magastos,’ nalabit a saan a posible a makapag-auxiliary pioneer-ka kadagiti sumaganad a bulbulan. (Luc. 14:28) Nupay kasta, mataginayonmo latta ti espiritu ti kinapayunir. Itultuloymo nga aramiden ti amin a kabaelam iti ministerio, nga agtalekka a maay-ayo ni Jehova no itedmo kenkuana ti kasayaatan a panagserbim. (Luc. 21:1-4) Baka agbaliwto ti kasasaadmo, ket makapag-auxiliary pioneer-kanto met laeng iti masanguanan. Kabayatanna, suportaran ken paregtaem dagidiay nakailatang iti tiempo a mangtagiragsak iti daytoy a benneg ti panagserbi. Mabalinmo met a baliwan ti eskediulmo tapno makaduam ida iti ministerio iti dadduma pay nga aldaw bayat ti lawas.
10 Naganetget dagiti adipen ni Jehova. Adda trabaho nga itungpaltayo—ti panangikasaba iti naimbag a damag. Biag ti nakatayá, ken bassiten ti nabati a tiempo. (1 Cor. 7:29-31) Ti ayattayo iti Dios ken kadagiti kaarrubatayo ti mangtignay koma kadatayo a mangaramid iti amin a kabaelantayo iti ministerio iti daytoy a tawen. Makapag-auxiliary pioneer-ka no pagreggetam ken no addaanka iti nasayaat a plano.
10. Apay a rumbeng a naganetgettayo?