Napategka ken Jehova a Diosmo!

1-2. Aniada a situasion ti pakaipaspasanguan ti adu nga adipen ni Jehova, ken ania ti mabalin nga epekto dagita kadakuada?

PANUNOTEM dagitoy a tallo a situasion: Nadayagnos nga adda nakaro a sakit ti maysa nga agtutubo a kabsat a lalaki nga in-inut a mangpakpakapuy kenkuana. Naikkat iti trabaho ti maysa a nagaget a kabsat a lalaki nga agtawen iti nasurok a 50, ket awan ti mabirokanna a trabaho uray kasano ti panangikagumaanna. Bumasbassiten ti maar-aramidan ti maysa a matalek ken nataengan a kabsat a babai iti panagserbina ken Jehova.

² No ti situasionmo ket kas iti maysa kadagiti nailadawan, mabalin a mariknam nga awanen serserbim. Mabalin a mapukaw ti rag-om ken ti panagraemmo iti bagim, ken maapektaran ti relasionmo iti sabsabali.

3. Ania ti panangmatmat ni Satanas ken dagidiay naimpluensiaanna iti biag ti tao?

³ Makita iti daytoy a lubong ti panangmatmat ni Satanas iti biag ti tao. Sipud idi, saanen nga ibilbilang ni Satanas a napateg ti biag dagiti tattao. Awanan asi nga imbagana ken Eva nga agbalin a nawaya no sukirenna ti Dios, uray ammona nga ipapatay ti dusa dayta. Idi pay a konkontrolen ni Satanas ti komersio, politika, ken dagiti relihion daytoy a lubong. Ditay ngarud masdaaw no adu a negosiante, politiko, ken lider ti relihion ti saan a mangresrespeto iti biag ken dignidad ti tao.

4. Ania ti pagsasaritaantayo iti daytoy nga artikulo?

⁴ Nupay kasta, kayat ni Jehova a maammuantayo a napategtayo, ken tulongannatayo no maipasangotayo iti situasion a mariknatayo nga awan serserbitayo. (Sal. 136:23; Roma 12:3) Ilawlawag daytoy nga artikulo no kasano a tulongannatayo ni Jehova kadagitoy a situasion: (1) No adda nakaro a sakittayo, (2) no agproblematayo iti pinansial, ken (3) no mariknatayo a kasla awanen ti maaramidantayo para ken Jehova gapu ta nataengantayon. Ngem ammuentayo nga umuna no apay a makapagtalektayo a napategtayo amin ken Jehova.

NAPATEGTAYO KEN JEHOVA

5. Ania ti pammaneknek a napateg ken Jehova dagiti tattao?

⁵ Uray naaramidtayo iti tapok, adayo a napatpategtayo ngem iti dayta. (Gen. 2:7) Kitaentayo ti sumagmamano a rason no apay a napategtayo ken Jehova. Pinarsuana dagiti tattao nga addaan iti abilidad a mangtulad kadagiti kualidadna. (Gen. 1:27) Gapu iti dayta, pinagbalinnatayo a nangatngato ngem iti dadduma pay a parsuana ditoy daga, ken impaaywanna kadatayo ti daga ken dagiti animal.—Sal. 8:4-8.

6. Ania pay ti pammaneknektayo a napateg ken Jehova dagiti imperpekto a tattao?

⁶ Uray idi nagbasol ni Adan, napateg latta ken Jehova dagiti tattao. Ipatpategnatayo unay isu nga intedna ti dungdungnguenna nga Anak a ni Jesus kas subbot para kadagiti basoltayo. (1 Juan 4:9, 10) Babaen ti subbot, pagungarento ni Jehova dagidiay natay gapu iti basol ni Adan, “agpadpada dagiti nalinteg ken dagiti nakillo.” (Ara. 24:15) Ipakita ti Saona a napategtayo kenkuana nakapuy man ti salun-attayo, agprobproblematayo iti pinansial, wenno nataengantayon.—Ara. 10:34, 35.

7. Ania pay dagiti rason a patientayo a napateg ken Jehova dagiti adipenna?

⁷ Adda pay dagiti rason a patientayo a napategtayo ken Jehova. Inyasidegnatayo kenkuana ken nakitana no kasano nga inawattayo ti naimbag a damag. (Juan 6:44) Idi immasidegtayo kenkuana, immasideg met kadatayo. (Sant. 4:8) Ipakpakitana met a napategtayo kenkuana ta ipapaayannatayo iti panawen ken an-anusannatayo a sursuruan. Ammona ti kinataotayo ita ken ti mabalin a pagbalinantayo. Ken disdisiplinaennatayo ta ay-ayatennatayo. (Prov. 3:11, 12) Nabileg dagita nga ebidensia a napategtayo ken Jehova!

8. Kasano a makatulong ti sasao iti Salmo 18:27-29 tapno agbalintayo a positibo uray adda dagiti problematayo?

⁸ Adda dagiti nangibilang ken Ari David nga awan serserbina, ngem ammona nga ay-ayaten ken supsuportaran ni Jehova. Nakatulong dayta tapno agtalinaed a positibo ti panangmatmatna iti situasionna. (2 Sam. 16:5-7) No malidlidaytayo wenno adda problematayo, matulongannatayo ni Jehova nga agbalin a positibo ken mapagballigiantayo ti aniaman a problema. (Basaen ti Salmo 18:27-29.) No ni Jehova ti tumulong kadatayo, awan ti makapasardeng kadatayo a siraragsak nga agserbi kenkuana. (Roma 8:31) Pagsasaritaantayo ita ti tallo nga espesipiko a situasion a nangnangruna a laglagipentayo nga ay-ayatennatayo ni Jehova ken napategtayo kenkuana.

NO ADDA NAKARO A SAKITTAYO

9. Ania ti mabalin nga epekto ti nakaro a sakit iti panagkitatayo iti bagitayo?

⁹ No adda nakaro a sakittayo, mabalin a malidayantayo ket mariknatayo nga awanen serserbitayo. Mabalin a mabaintayo no makita ti dadduma dagiti limitasiontayo wenno no masapul nga agdependetayo iti tulong ti sabsabali. Uray no saan nga ammo ti dadduma nga adda sakittayo, mabalin a makariknatayo iti bain gapu ta limitadon ti maaramidantayo. Kadagiti kasta a makapaupay a situasion, mapabilegnatayo ni Jehova. Kasano?

10. Sigun iti Proverbio 12:25, ania ti makatulong no agsakittayo?

¹⁰ No agsakittayo, mapabilegnatayo ti “naimbag a sao.” (Basaen ti Proverbio 12:25.) Iti Biblia, impaisurat ni Jehova ti adu a naimbag a sasao a mangipalagip a napategtayo uray adda sakittayo. (Sal. 31:19; 41:3) No basaentayo dagita a sasao ken uray ulit-ulitentayo a basaen, tulongannatayo ni Jehova a manglaban iti negatibo nga emosion nga epekto ti nakaro a sakittayo.

11. Kasano a narikna ti maysa a kabsat a lalaki ti ayat ni Jehova?

¹¹ Kitaentayo ti kapadasan ni Jorge. Agtutubo pay ngem adda nakaro a sakitna nga in-inut a mangpakpakapuy kenkuana isu a mariknana nga awanen ti serserbina. “Diak ekspektaren ti epekto kaniak ti sakitko wenno ti bain a marikriknak ta kitkitaendak dagiti tattao gapu iti sakitko,” kuna ni Jorge. “Kimmaro ti sakitko ket pinampanunotko ti epekto dayta iti biagko. Permi ti lidayko ket nagpakaasiak ken Jehova a tulongannak.” Kasano a tinulongan ni Jehova? “Gapu ta marigatanak nga agpokus iti basbasaek, pinaregtadak a mangbasa iti sumagmamano a bersikulo iti Salmo a mangipakita iti pannakaseknan ni Jehova kadagiti adipenna. Ulit-ulitek a basaen dagita a bersikulo iti inaldaw ket naliwliwa ken naparegtaak. Idi kuan, nadlaw ti dadduma a kanayonakon a nakaisem. Imbagada pay a naparegtada iti kinapositibok. Nabigbigko a sinungbatan ni Jehova dagiti kararagko! Tinulongannak a mangbalbaliw iti panagkitak iti bagik. Agpokpokusak itan iti ibagbaga ti Saona maipapan iti panangmatmatna kaniak uray adda nakaro a sakitko.”

12. No adda nakaro a sakitmo, ania ti aramidem tapno mariknam ti tulong ni Jehova?

¹² No adda nakaro a sakitmo, laglagipem nga ammo ni Jehova ti mapaspasaram. Ipakaasim a tulongannaka tapno agbalin a positibo ti panangkitam iti situasionmo. Sa birokem iti Biblia dagiti naimbag a sasao nga impaisurat ni Jehova para kenka. Agpokuska kadagiti bersikulo a mangipakita a nakapatpateg ken Jehova dagiti adipenna. No aramidem dayta, makitamto a naimbag ni Jehova iti amin a matalek nga agserserbi kenkuana.—Sal. 84:11.

NO AGPROBLEMATAYO ITI PINANSIAL

13. Ania ti mabalin a marikna ti ulo ti pamilia no maikkat iti trabaho?

¹³ Kayat ti amin nga ulo ti pamilia nga ipaay ti kasapulan ti pamiliada. Ngem ipapantayon a naikkat ti maysa a kabsat a lalaki iti trabahona uray awan ti naaramidna a kamali. Ikagkagumaanna ti agbirok iti sabali a trabaho ngem awan ti mabirokanna. Gapu iti dayta, mabalin a mariknana nga awan serserbina. Kasano a makatulong kenkuana ti panagpokusna kadagiti kari ni Jehova?

14. Ania dagiti rason a tungpalen ni Jehova dagiti karina?

¹⁴ Kanayon a tungpalen ni Jehova dagiti karina. (Jos. 21:45; 23:14) Adda dagiti rason no apay nga aramidenna dayta. Umuna, maapektaran ngamin ti nagan, wenno reputasionna. Inkari ni Jehova nga aywananna dagiti matalek nga adipenna, ket ammona a masapul a tungpalenna dayta a kari. (Sal. 31:1-3) Kasta met, ammo ni Jehova a malidayan ken maupaytayo no saannatayo nga aywanan kas miembro ti pamiliana. Ikarkarina nga ipaayna ti material ken naespirituan a kasapulantayo, ket awan ti makalapped kenkuana a mangtungpal iti dayta a kari!—Mat. 6:30-33; 24:45.

15. (a) Ania ti problema a nakaipasanguan dagiti Kristiano idi umuna a siglo? (b) Ania ti ipasigurado kadatayo ti Salmo 37:18, 19?

¹⁵ No laglagipentayo no apay a tungtungpalen ni Jehova dagiti karina, makapagtalektayo a tulongannatayo a mangsango kadagiti problematayo iti pinansial. Kitaentayo ti napasamak kadagiti Kristiano idi umuna a siglo. Idi nakaro ti pannakaidadanes ti kongregasion idiay Jerusalem, “naiwarawara ti amin . . . malaksid kadagiti apostol.” (Ara. 8:1) Panunotenyo ti nakaro nga epekto dayta kadakuada iti pinansial! Posible a napukawda ti balay ken trabahoda. Ngem saan ida a binaybay-an ni Jehova ken saanda met a napukaw ti rag-oda. (Ara. 8:4; Heb. 13:5, 6; Sant. 1:2, 3) Tinulongan ni Jehova dagita a matalek a Kristiano, ket tulongannatayo met.—Basaen ti Salmo 37:18, 19.

NO LIMITADON TI MAARAMIDANTAYO GAPU ITI KINANATAENGAN

16. Kaano a mabalin a mariknatayo a kasla saanen a napateg ken Jehova ti panagserbitayo?

¹⁶ Bayat a tumataengantayo, mabalin a mariknatayo a bassiten ti maipaaytayo ken Jehova. Mabalin a kasta met ti narikna ni Ari David bayat a lumaklakay. (Sal. 71:9) Kasano a matulongannatayo ni Jehova?

17. Ania ti maadaltayo iti kapadasan ti maysa a kabsat a babai nga agnagan Jheri?

¹⁷ Usigentayo ti kapadasan ti kabsat nga agnagan Jheri. Naawis nga umatender iti maintenance training iti Kingdom Hall, ngem saanna a kayat ti mapan. Kunana: “Baketakon ken baloak. Awan ti aniaman a paglaingak a mausar ni Jehova. Awanen serserbik.” Iti rabii sakbay ti training, sipapasnek a nagkararag ken Jehova. Idi nakasangpet iti Kingdom Hall kabigatanna, pampanunotenna latta no talaga a masapul nga adda isuna sadiay. Bayat ti programa, impaganetget ti maysa kadagiti ispiker a ti kapatgan a paglaingantayo ket ti kinatuloktayo nga agpaisuro ken Jehova. Kuna ni Jheri: “Napanunotko, ‘Adda kaniak dayta!’ Nakasangitak ta nabigbigko a sinungbatan ni Jehova ti kararagko. Impasiguradona nga adda napateg a banag a maipaayko ken kayatnak nga isuro!” Malagip ni Jheri: “Sakbay ti training, agnernerbios, maup-upay, ken nalidayak. Ngem kalpasan ti training, addan kompiansak iti bagik, naparegtaak, ken mariknakon a napategak!”

18. Kasano nga ipakita ti Biblia a napateg latta ken Jehova ti panagserbitayo uray nataengantayon?

¹⁸ Uray nataengantayon, masiguradotayo nga adda latta pangusaran ni Jehova kadatayo. (Sal. 92:12-15) Insuro ni Jesus nga uray mariknatayo a limitadon ti abilidadtayo wenno bassiten ti maar-aramidantayo, napateg ken Jehova ti aniaman a maaramidantayo nga agserbi kenkuana. (Luc. 21:2-4) Agpokuska ngarud iti maaramidam. Kas pagarigan, mabalinmo nga ikasaba ti maipapan ken Jehova, ikararagan dagiti kakabsat, ken pabilgen ida nga agtalinaed a matalek. Ibilbilangnaka ni Jehova kas katrabahuanna, saan a gapu iti maar-aramidam, no di ket gapu iti kinatulokmo nga agtulnog kenkuana.—1 Cor. 3:5-9.

19. Ania ti pammaregta kadatayo ti Roma 8:38, 39?

¹⁹ Anian a yamantayo ta ni Jehova ti pagserserbiantayo, ti Dios a talaga a mangipatpateg kadagiti agserserbi kenkuana! Pinarsuanatayo tapno aramidentayo ti pagayatanna, ket ti pudno a panagdaydayaw ti mangparagsak iti biagtayo. (Apoc. 4:11) Uray no ibilangnatayo ti lubong kas awan serserbina, saannatayo nga ibain ni Jehova. (Heb. 11:16, 38) No maupaytayo gapu iti nakaro a sakit, problema iti pinansial, wenno kinanataengan, laglagipentayo nga awan ti makaisina kadatayo iti ayat ti nailangitan nga Amatayo.—Basaen ti Roma 8:38, 39.