Kaano nga Umay ti Panungpalan? Ti Kuna ni Jesus

PANUNOTEM TI DUA NGA IMBAGA NI JESUS MAIPAPAN ITI PANUNGPALAN:

“Gapuna, agtultuloykayo nga agbantay ta diyo ammo ti aldaw wenno ti oras.”​—MATEO 25:13.

“Agtultuloykayo a nasiput, agtultuloykayo a siririing, ta diyo ammo no kaano ti naikeddeng a tiempo.”​—MARCOS 13:33.

Awan ngarud ti makaammo ditoy daga no kaano ti eksakto a panagpatingga daytoy a sistema ti bambanag. Nupay kasta, adda ‘tiempo nga inkeddeng’ ti Dios​—espesipiko nga “aldaw ken oras”​—nga iyaay ti panungpalan. (Mateo 24:36) Kayatna kadi a sawen dayta a saantayo a pulos maammuan no asidegen ti panungpalan? Saan. Imbaga ni Jesus kadagiti adalanna a siputanda dagiti pasamak a mangipakita nga asidegen ti panungpalan.

TI PAGILASINAN

Dagitoy a pasamak ti pagilasinan “ti panungpalan daytoy a sistema ti bambanag.” Imbaga ni Jesus: “Bumusorto ti nasion iti sabali a nasion ken ti pagarian iti sabali a pagarian, ket addanto met bisin ken ginggined iti nadumaduma a lugar.” (Mateo 24:3, 7) Imbagana pay nga addanto dagiti “makapapatay a saksakit”​—dagiti epidemia. (Lucas 21:11) Makitkitam kadin dagiti pasamak nga impakpakauna ni Jesus?

Dagiti makadadael a gubat, bisin, ginggined, ken agsasaruno a sakit ti mangparparigat kadagiti tattao ita. Kas pagarigan, idi 2004, gapu iti napigsa a ginggined idiay Indian Ocean napasamak ti tsunami a nangpapatay iti agarup 225,000 a tattao. Iti uneg ti tallo a tawen, agarup 6.9 a milion ti natay iti intero a lubong gapu iti COVID-19 a pandemia. Imbaga ni Jesus a dagiti kastoy a pasamak ti mangipakita nga asidegen ti panungpalan daytoy a sistema ti bambanag.

“MAUDI NGA AL-ALDAW”

Deskribiren ti Biblia ti periodo ti tiempo sakbay la unay ti panungpalan kas ti “maudi nga al-aldaw.” (2 Pedro 3:3, 4) Sigun iti 2 Timoteo 3:1-5, nakaro ti panagbaba ti moralidad dagiti tattao iti maudi nga al-aldaw. (Kitaen ti kahon a “Sakbay La Unay ti Panungpalan ti Lubong.”) Adda kadi dagiti makitkitam ita a managimbubukodan, naagum, nauyong, ken saan a naayat? Pammaneknek met dagita a nakaas-asideg unayen ti panungpalan ti lubong.

Kasano kapaut ti maudi nga al-aldaw? Sigun iti Biblia, ‘ababa laeng a tiempo.’ Kalpasanna, dadaelenton ti Dios “dagidiay mangdaddadael iti daga.”​—Apocalipsis 11:15-18, footnote; 12:12.

ASIDEGEN TI PARAISO A DAGA!

Inkeddengen ti Dios ti aldaw ken oras a pagpatinggaenna daytoy agdama a dakes a sistema ti bambanag. (Mateo 24:36) Ngem adda pay kanayonan a naimbag a damag​—‘saan a kayat ti Dios a madadael ti asinoman.’ (2 Pedro 3:9) Ik-ikkanna ti sangatauan iti gundaway a mangaramid iti pagayatanna. Apay? Gapu ta kayatna a makalasattayo iti panungpalan daytoy a lubong ket agbiagtayo iti baro a lubongna, inton agbalinen a paraiso ti daga.

Nangorganisar ti Dios iti sangalubongan a programa a panangisuro tapno matulongan dagiti tattao a mangammo no kasano ti agbalin a paset ti baro a lubong nga iturayan ti Pagarianna. Imbaga ni Jesus a ti naimbag a damag maipapan iti Pagarian ti Dios ket maikasaba “iti intero a daga.” (Mateo 24:14) Binilion nga oras ti inusar dagiti Saksi ni Jehova iti intero a lubong a nangikasaba ken nangisuro kadagiti tattao maipapan iti mensahe ti Biblia a mangted iti namnama. Imbaga ni Jesus a daytoy a trabaho a panangasaba ket maaramid iti intero a daga sakbay a dumteng ti panungpalan.

Dandanin agpatingga ti panagturay ti tao. Ngem ti naimbag a damag ket mabalin a makalasatka iti panungpalan ti lubong ken agbiagka iti Paraiso a daga nga inkari ti Dios. Ilawlawag ti sumaruno nga artikulo no kasanoka a makapagbiag iti dayta a baro a lubong.