“Ipatpategko Itan ti Ministerio!”

NAPUKAWKO TI RAG-OK

Makapaliday ta idi tin-edyerakon, bimmaaw ti ayatko ken Jehova. Kasla maaramid dagiti kaeskuelaak ti amin a kayatda isu a panagriknak ket maikapkapisak. Para kaniak, istrikto unay dagiti nagannakko ken dagiti Nakristianuan a pagalagadan. Kasla nagrigat met nga aramiden dagiti naespirituan nga aktibidad. Mamatiak met ketdi nga adda ni Jehova, ngem saanak unayen a nasinged kenkuana.

Nupay kasta, inkagumaak ti saan nga agbalin a di aktibo babaen ti paspasaray panagserbik ken Jehova. No mangasabaak, diak pulos nakasagana, isu a marigatanak a mangirugi wenno mangituloy iti saritaan. Gapu iti dayta, saan a nabunga ti ministeriok ken saanak a naragsak, isu nga ad-adda a nagbalinak a negatibo. Isaludsodko no kua idi iti bagik, ‘Kasano ngata a makapangasabada iti kada lawas ken iti kada bulan uray nakarigrigat?’

Idi 17 ti tawenko, kayatkon ti pumanaw iti poder dagiti nagannakko. Isu a nagempakeak, pimmanawak idiay balay, ken immakarak idiay Australia. Nalidayan dagiti nagannakko idi pimmanawak. Madanaganda ngem impagarupda nga itultuloyko met laeng ti naespirituan a rutinak.

Idiay Australia, ad-adda pay a kimmapuy ti espiritualidadko. Manmanoakon a makigimong. Nakigayyemak kadagiti agtutubo a kas kaniak a kontenton a makigimong no dadduma sa mapankami iti nightclub tapno agiinum ken agsasala. No lagipek ti napalabas, aminek nga arigna adda iti kinapudno ti maysa a sakak sa adda iti lubong ti sabali, ngem talaga a saanak idi naragsak.

DI NINAMNAMA NGEM NAPATEG A LEKSION

Agarup dua a tawen kalpasanna, naam-ammok ti maysa a kabsat a babai a dina ammo a natulongannak a mangpanunot no ania a direksion ti pagturturongan idi ti biagko. Limakami a babbalasang nga aggigian idi iti maysa a balay. Inawismi ti manangaywan iti sirkito ken ti asawana a ni Tamara nga agdagus iti balaymi iti makalawas. Bayat nga okupado ni lakayna iti bambanag a para iti kongregasion, siraragsak a nakiinnestoria ni Tamara kadakami. Nagustuak dayta. Nakanaknakem ken nalaka a kasarsarita. Diak impagpagarup a naragsak gayam ti makikadua iti tao a naespirituan ti panagpampanunotna.

Nakagangganaygay ni Tamara. Bilibak iti ayatna iti kinapudno ken iti ministerio. Maragsakan unay a mangipaay iti kasayaatanna ken Jehova, idinto ta saanak a naragsak iti paspasaray a panagserbik kenkuana. Dakkel ti impluensia kaniak ti kinapositibo ken pudpudno a kinaragsakna. Gapu iti ulidanna, nalagipko ti maysa a napateg a kinapudno a masarakan iti Biblia: Kayat ni Jehova nga agserbitay kenkuana a ‘siraragsak ken agkantatayo a siraragsak.’​—Sal. 100:2.

NAPASUBLIK TI PANANGIPATEGKO ITI MINISTERIOK

Kayatko a marikna ti ragsak a marikrikna ni Tamara, ngem adu ti masapul a balbaliwak. Saan a kaskarina dayta, ngem in-inut a nagbalbaliwak. Rinugiak ti agsagana para iti ministerio, ken pasaray ag-auxiliary pioneer-ak. Nakatulong dayta tapno maksayan ti nerbiosko ken ad-adda a pumigsa ti pakinakemko. Ad-addan a magustuak ti ministerio gapu iti masansan a panangusarko iti Biblia. Di nagbayag, binulanen nga ag-auxiliary pioneer-ak.

Idi agangay, nakigayyemak kadagidiay nagduduma ti edadda, naregta iti kinapudno, ken magusgustuanda ti agserbi ken Jehova. Gapu iti nasayaat nga ulidanda, pinanunotko manen dagiti prioridadko ken nangaramidak iti nasayaat a naespirituan a rutina. Magusgustuak manen ti ministerio, isu nga idi agangay, nagaplayak kas regular pioneer. Iti damo a gundaway kalpasan ti adu a tawen, naragsakakon ken natalgeden ti riknak iti kongregasion.

NAKASARAKAK ITI PERMANENTE A PARTNER ITI KINAPAYUNIR

Makatawen kalpasanna, naam-ammok ti nasingpet ken napudno a lalaki a ni Alex. Ipatpategna ni Jehova ken ti ministerio. Agserserbi idi kas ministerial nga adipen ken innem a tawenen a payunir. Napadasanna metten ti nagserbi iti lugar nga agkasapulan iti ad-adu nga agibumbunannag idiay Malawi. Nakaduana sadiay dagiti mapagwadan a misionero. Pinaregtada nga iyun-unana dagiti interes ti Pagarian.

Idi 2003, nagkasarkami ken Alex ket sipud idin, intultuloymi ti agserbi iti amin-tiempo a ministerio. Adu ti nagsayaat a nasursuromi, ket binendisionannakami ni Jehova iti adu a pamay-an.

AD-ADU PAY A BENDISION

Idi 2009, naawiskami nga agserbi kas misionero idiay Timor-Leste, maysa a bassit a pagilian iti arkipelago ti Indonesia. Naklaat ken nagagarankami ngem medio nagnerbioskami met. Lima a bulan kalpasanna, simmangpetkami iti kabeserana a Dili.

Naiduma unay ti kasasaad iti Timor-Leste ngem iti naggapuanmi. Masapul a makibagaykami iti baro a kultura, lengguahe, taraon, ken kasasaad ti panagbiag. Iti ministerio, masansan a makitami dagiti tattao a nakapobpobre, saan unay a nakaadal, ken mairurrurumen. Nakitami met ti adu a tattao a nakapasar iti pisikal ken emosional a problema gapu iti gubat ken kinaranggas.a

Nagmayat ti mangasaba! Kas pagarigan, naam-ammok ti 13-ti-tawenna a balasitang nga agnagan Maria.b Naliday ta sumagmamano a tawenen a natay ni nanangna, ken manmano a makitana ni tatangna. Kas iti adu nga ubbing a kaedadna, awan idi ti direksion ti biag ni Maria. Malagipko nga adda idi tiempo a nagsangsangit bayat nga imbagana kaniak ti marikriknana. Nupay kasta, diak maaw-awatan ti ibagbagana. Ngamin, saanak pay idi a nasayud iti lengguahena. Nagkararagak ken Jehova. Kiniddawko a tulongannak a mangparegta ken Maria. Kalpasanna, imbasaak kadagiti makapabileg a teksto. Iti simmaruno a sumagmamano a tawen, nakitak a binalbaliwan ti kinapudno ti kababalin ni Maria, uray ti itsura ken ti biagna. Nagpabautisar, ket ita, adda metten dagiti iyad-adalanna iti Biblia. Addan dakkel a naespirituan a pamilia ni Maria ken mariknanan a maay-ayat.

Bembendisionan ni Jehova ti trabaho iti Timor-Leste. Nupay kaaduan nga agibumbunannag ket nabautisaran iti napalabas a 10 pay la a tawen, adun ti agserserbi kas payunir, ministerial nga adipen, wenno panglakayen. Agtrabtrabaho met ti dadduma iti remote translation office ken tumultulong iti pannakapataud ti naespirituan a taraon kadagiti lengguahe iti daytoy a pagilian. Maragsakanak unay a dumngeg iti panagkantada kadagiti gimong, makakita iti isemda, ken mangpaliiw iti naespirituan nga irarang-ayda.

AWAN TI MAPANUNOTKO A NARAGRAGSAK PAY A BIAG

Ti biagmi iti Timor-Leste ket naiduma unay iti biagmi idiay Australia, ngem awan ti mapanunotko a naragragsak pay ngem iti dayta. No dadduma, agbiahekami iti bassit a bus a napno iti pasahero, daing, ken nagadu a nateng manipud iti palengke. Adda met dagiti aldaw a mangyadalkami iti Biblia iti napudot ken nadagaang a kalapaw a daga ti suelona sa tumanaray dagiti manok. Ngem nupay kasta ti situasion, naragsakak latta!

No lagipek ti napalabas, agyamanak ta inaramid dagiti nagannakko ti amin a kabaelanda tapno isuroda kaniak dagiti dalan ni Jehova ken tinulongandak, uray idi tin-edyerak a saanak unay a naregta. Pimmayso kaniak ti Proverbio 22:6. Dakami ken Alex ket ipagpannakkel da Mama ken Papa; maragsakanda a makakita nga agserserbikami ken Jehova. Sipud idi 2016, agserserbikamin iti trabaho iti sirkito iti teritoria ti sangay iti Australasia.

Diak pulos impagarup a ti dati a saanko nga ipatpateg a trabaho a panangasaba ket ipatpategko unayen ita! Naamirisko nga aniaman ti mapasamak iti biagtayo, pudpudno laeng a narag-otayo no naimpusuan nga agserbitayo iti Dios. Wen, ti napalabas a 18 a tawen a panagserbik ken Jehova a kaduak ni Alex ti kararagsakan a tawtawen iti biagko. Maawatak itan ti kinapudno ti imbaga ni salmista a David ken Jehova: “Agrag-onto ti amin nga agkamang kenka; dinto agsardeng ti panagriawda gapu iti ragsak. . . . Dagiti mangipatpateg iti naganmo ket makipagrag-onto kenka.”​—Sal. 5:11.