Biskuit Para Kadagiti Aso
“IDI rugrugi ti 2014, ipaspasiarko ti dua a babassit nga asok a terrier iti sentro ti negosio iti siudadmi,” insurat ni Nick, a taga-Oregon, U.S.A. “Gagangay nga adda dagiti Saksi iti sentro ti siudad a nakatakder iti abay dagiti cart a pagidispleyan kadagiti publikasionda. Desente ti panagbadbadoda, ken is-isemanda ti amin nga aglabas.
“Nasingpet dagiti Saksi, saan laeng a kadagiti tattao, no di ket uray kadagiti asok. Maysa nga aldaw, ni Elaine, a nakatakder iti abay ti cart, sinubuanna iti biskuit dagiti asok. Manipud idin, kada maasitganmi ti cart, kayat dagiti asok ti mapan a dagus kadagiti Saksi tapno makakaanda iti biskuit.
“Limmabas ti sumagmamano a bulan. Magusgustuan dagiti asok dagiti biskuit a maisubo kadakuada, ken maragragsakanak met a makiinnestoria biit kadagiti Saksi. Ngem diak kayat ti makiinnestoria iti nabayag ta nasurok a 70 idin ti tawenko, ken awan unay ti ammok iti patpatien dagiti Saksi. Dismayadoak ngaminen iti adu a relihion nga agkunkuna a Kristianoda. Para kaniak, nasaysayaat laengen nga adalek ti Biblia a sisiak.
“Kadagidi a tiempo, makitkitak met ti dadduma a Saksi iti nadumaduma a paset ti siudad, a nakatakder iti abay dagiti cart-da. Mannakigayyemda met. Kanayon nga usarenda ti Biblia a mangsungbat kadagiti saludsodko, isu a dimmakkel ti panagtalekko kadakuada.
“Naminsan, dinamag ni Elaine, ‘Mamatika kadi a dagiti animal ket regalo ti Dios?’ Insungbatko, ‘Wen, a!’ Idi kuan, imbasa ni Elaine kaniak ti Isaias 11:6-9. Gapu iti dayta, nagbalbaliw ti kapanunotak, ngem diak pay latta kayat ti umawat kadagiti publikasionda.
“Kadagiti simmaruno nga aldaw, magusgustuakon ti ababa ngem makapainteres a panagtutungtongmi iti agassawa a da Elaine ken Brent. Insingasingda a basaek ti Mateo agingga iti Aramid tapno maawatak no kasano ti agbalin a pudno a Kristiano. Inaramidko dayta. Di nagbayag, nagpayadalakon iti Biblia kada Brent ken Elaine idi katengngaan ti 2016.
“Padpadaanak idin ti linawas a panagadalko iti Biblia ken dagiti gimong iti Kingdom Hall. Maragsakanak unay ta naammuak ti talaga nga isursuro ti Biblia. Nasurok la bassit a makatawen, nagpabautisarakon kas maysa a Saksi. Ita, 79 ti tawenkon, ket agyamyamanak unay ta nabirokakon ti pudno a relihion. Binendisionannak ni Jehova ta impalubosna nga agbalinak a paset ti sangalubongan a pamilia nga agdaydayaw kenkuana.”