Tultulongannaka ni Jehova nga Agballigi

1-2. (a) Apay a ditay masdaaw no makapasartayo kadagiti suot? (b) Ania ti usigentayo iti daytoy nga artikulo?

KAS ad-adipen ni Jehova, ditayon masdaaw no mapasarantayo dagiti suot. Ammotayo daytoy nga ibagbaga ti Biblia: “Masapul a sumrektayo iti Pagarian ti Dios babaen ti adu a rigat.” (Ara. 14:22) Ammotayo met a ti dadduma a problematayo ket sa la interamente a masolbar inton addatayon iti baro a lubong ti Dios, a sadiay “awanton ni patay. Awanto metten ti panagladingit wenno panagsangit wenno ut-ot.”—Apoc. 21:4.

² Saannatayo nga ilisi ni Jehova kadagiti suot. Ngem tulongannatayo a mangibtur kadagita. Kitaentayo ti imbaga ni apostol Pablo kadagiti Kristiano nga agnanaed idiay Roma. Umuna, dinakamatna ti dadduma a suot a pakaipaspasanguanna ken dagiti kakabsat. Kalpasanna, insuratna: “Mapagballigiantayo amin dagita a banag iti tulong daydiay mangay-ayat kadatayo.” (Roma 8:35-37) Kaipapanan dayta a matulongannaka ni Jehova nga agballigi bayat nga ib-ibturam ti maysa a suot. Kitaentayo no kasano a tinulongan ni Jehova ni Jose nga agballigi ken no kasano a matulongannaka.

NO BIGLA NGA AGBALIW DAGITI KASASAAD

3. Ania ti bigla a napasamak iti biag ni Jose?

³ Impakita ni patriarka Jacob nga ay-ayatenna unay ti anakna a ni Jose. (Gen. 37:3, 4) Gapu iti dayta, inapalan dagiti manongna. Idi nakakitada iti oportunidad, inlakoda ni Jose iti maysa a grupo dagiti komersiante a Midianita. Ni Jose ket impan dagita a komersiante idiay Egipto a ginasut a kilometro ti kaadayona. Idiay a nailako manen. Iti dayta a gundaway, nailako ken Potifar a panguluen dagiti guardia ni Faraon. Nagbiit a nagbalbaliw ti biag ni Jose. Ti dati a madungdungngo iti denna ni amana ket nagbalinen a nanumo nga adipen ti maysa nga Egipcio!—Gen. 39:1.

4. Kasano a mabalin a mapasarantayo ti kas iti nakaipasanguan ni Jose?

⁴ Kuna ti Biblia a “dumteng ti dakes . . . iti tunggal maysa.” (Ecl. 9:11, Ti Baro a Naimbag a Damag Biblia) No dadduma, mapasarantayo dagiti rigat a “gagangay kadagiti tattao”—kayatna a sawen, dagiti suot a mapaspasaran ti amin a tattao. (1 Cor. 10:13) Wenno mabalin nga agsagabatayo gapu laeng ta adalannatayo ni Jesus. Kas pagarigan, baka mauy-uyaw, mabusbusor, wenno maidadanestayo pay ketdi gapu iti pammatitayo. (2 Tim. 3:12) Aniaman a suot ti pakaipasanguam, mapagballiginaka ni Jehova. Kasano nga inaramidna dayta ken Jose?

5. Ania ti konklusion ni Potifar maipapan iti panagballigi ni Jose? (Genesis 39:2-6)

⁵ Basaen ti Genesis 39:2-6. Nadlaw ni Potifar a ni Jose ket naabilidad unay ken nagaget nga agtutubo. Ammona met ti rason. Nakita ni Potifar a ni Jose ket “tultulongan ni Jehova nga agballigi iti amin nga aramidenna.”b Idi agangay, ti Egipcio pinagbalinna ni Jose a personal a katulonganna. Intalekna pay ken Jose ti balayna ken ti amin a kukuana. Ti resultana? Bimmaknang ni Potifar.

6. Ania ti mabalin a narikna ni Jose iti situasionna?

⁶ Imadyinem ti marikrikna idi ni Jose. Ania ti kayatna la unayen a mapasamak? Kayatna kadi a pansinen ken gunggonaan ni Potifar? Posible a ti talaga a kayatna ket ti mawayawayaanen tapno makasublin iti denna ni amana. Ngamin, nagadu nga agpayso ti pribilehio ni Jose iti balay ni Potifar. Ngem maysa latta isuna nga adipen nga agserserbi iti amo a saan nga agdaydayaw ken Jehova. Ni Potifar ket saan a tinignay ni Jehova a mangwayawaya ken Jose. Ken dandani idin a kumaro pay ti situasion ni Jose.

NO KUMARO TI SITUASION

7. Kasano a kimmaro ti situasion ni Jose? (Genesis 39:14, 15)

⁷ Sigun iti Genesis kapitulo 39, ti asawa ni Potifar ket nagkursonada ken Jose ken namin-adu a ginargarina a makidenna kenkuana. Ngem kada allukoyenna, saan a kinayat ni Jose. Isu nga idi agangay, nakapungtot unay ket inakusaranna ni Jose iti gandat a panangrames. (Basaen ti Genesis 39:14, 15.) Idi naammuan dayta ni Potifar, impaipisokna ni Jose iti pagbaludan, a nagyananna iti sumagmamano a tawen. (Gen. 39:19, 20) Ania ti itsura ti pagbaludan? Ti Hebreo a sao nga inusar ni Jose para iti “pagbaludan” mabalin a kaipapananna ti “pagurnongan iti danum” wenno “abut.” Nakasipsipnget ngarud ti aglawlawna isu a nariknana nga awanen ti namnamana. (Gen. 40:15; ftn.) Ibaga pay ti Biblia nga adda idi tiempo a nakadenaan dagiti saka ni Jose ken nakawaran iti landok ti tengngedna. (Sal. 105:17, 18) Kimmaro ti situasion ni Jose. Ti dati a talken nga adipen ket nagbalinen a kakaasi a balud.

8. Uray kumaro ti maysa a suot, ania ti masiguradotayo?

⁸ Napadasam kadin ti maysa a narigat a situasion a kimmaro pay ketdi iti laksid dagiti napasnek a kararagmo? Mabalin a mapasamak dayta. Saannatayo nga ilisi ni Jehova kadagiti suot iti lubong nga iturturayan ni Satanas. (1 Juan 5:19) Ngem daytoy ti masiguradom: Makitkita ken ammo la unay ni Jehova ti mapaspasaram ken ipatpategnaka. (Mat. 10:29-31; 1 Ped. 5:6, 7) Kasta met nga inkarina: “Saankanto a pulos panawan ken saankanto a pulos baybay-an.” (Heb. 13:5) Matulongannaka ni Jehova nga agibtur uray no kasla awanen ti namnama ti situasionmo. Kitaentayo no kasano a napasamak dayta ken Jose.

9. Ania ti mangipakita nga adda ni Jehova ken Jose bayat a nakabalud? (Genesis 39:21-23)

⁹ Basaen ti Genesis 39:21-23. Pinagballigi ni Jehova ni Jose uray iti narigat a situasionna bayat a nakabalud. Kasano? Idi agangay, kas idi ken Potifar, naala met ni Jose ti panagtalek ken respeto ti panguluen nga opisial. Di nagbayag, ti panguluen nga opisial impabiangna ken Jose ti panangidaulo iti amin a balud. Kinapudnona, kuna ti Biblia a “saan a nakibiang ti panguluen nga opisial ti pagbaludan iti aniaman a naitalek ken Jose.” Addan nasayaat a trabaho a kanayon nga asikasuen ni Jose. Karkarna la ketdi dayta! Kasano koma a dayta a trabaho ket maitalek iti balud a naakusar iti gandat a panangrames iti asawa ti opisial ti palasio? Adda laeng maymaysa a rason. Kas iti kuna ti Genesis 39:23, “Adda ni Jehova [ken Jose] ken pagbalballigien ni Jehova ti aniaman nga aramidenna.”

10. Ilawlawag no apay a mabalin a saan a narikna ni Jose nga agbalballigi iti aniaman nga aramidenna.

¹⁰ Panunotem manen ti marikrikna idi ni Jose iti situasionna. Idi naibalud gapu iti di umiso nga akusasion, panagkunam, nariknana ngata nga agbalballigi iti aniaman nga aramidenna? Ania ti kayat la unayen ni Jose a mapasamak? Kayatna kadi a paboran isuna ti panguluen nga opisial ti pagbaludan? Posible a ti talaga a kayat ni Jose ket maabsuelto ken mawayawayaanen. Impakaasina pay ketdi iti maysa a padana a balud a dandani idin mawayawayaan nga isarsaritananto isuna ken Faraon tapno makaruar iti daydiay a makapadepres a pagbaludan. (Gen. 40:14) Ngem saan a dagus nga insarsarita dayta a lalaki ken Faraon ti maipapan ken Jose. Kas resultana, dua pay a tawen a nagtalinaed ni Jose iti pagbaludan. (Gen. 40:23; 41:1, 14) Kaskasdi nga intultuloy ni Jehova a pagballigien ni Jose. Kasano?

11. Ania nga espesial nga abilidad ti inted ni Jehova ken Jose, ken kasano a nakatulong dayta tapno maibanag ti panggep ni Jehova?

¹¹ Bayat a nakabalud ni Jose, pinagtagtagainep ni Jehova ti ari ti Egipto iti dua a makaburibor a tagtagainep. Kayat la unay a maammuan ni Faraon ti kaipapanan dagita. Idi naammuan ti ari nga adda abilidad ni Jose a mangilawlawag kadagiti tagtagainep, pinaayabanna. Iti tulong ni Jehova, nailawlawag ni Jose dagiti tagtagainep. Bimmilib met ni Faraon iti praktikal nga imbalakad ni Jose. Nakita ni Faraon nga adda ni Jehova iti agtutubo a ni Jose isu nga inapointaranna kas ti administrador iti taraon para iti intero nga Egipto. (Gen. 41:38, 41-44) Idi agangay, adda nakaro a bisin iti intero nga Egipto ken uray iti Canaan nga ayan ti pamilia ni Jose. Kabaelan itan ni Jose a salbaren ti pamiliana ken isalakan ti pamilia a pagtaudan ti Mesias.

12. Kadagiti ania a pamay-an a pinagballigi ni Jehova ni Jose?

¹² Panunotem dagiti karkarna a pasamak iti biag ni Jose. Asino ti nangtignay ken Potifar tapno mapansinna ti maysa la nga adipen a ni Jose? Asino ti nangtignay iti panguluen nga opisial ti pagbaludan tapno paboranna ni Jose a kakaasi a balud? Asino ti namagtagtagainep ken Faraon isu a naburiboran ken asino ti nangted ken Jose iti abilidad a mangilawlawag kadagita? Asino ti adda iti likudan ti desision tapno maapointaran ni Jose kas ti administrador iti taraon idiay Egipto? (Gen. 45:5) Nalawag a ni Jehova ti namagballigi iti amin nga inaramid ni Jose. Nupay naulpit idi ti plano dagiti manong ni Jose, pinagbalin dayta ni Jehova a maysa a pamay-an tapno maitungpalna ti pagayatanna.

NO KASANO A PAGBALLIGIENNAKA NI JEHOVA

13. Konkontrolen kadi ni Jehova ti tunggal situasion a pakaipaspasanguantayo? Ilawlawag.

¹³ Ania ti masursurotayo iti salaysay maipapan ken Jose? Konkontrolen kadi ni Jehova ti tunggal situasion a pakaipaspasanguantayo? Imanmaniobrana kadi ti tunggal pasamak iti biagtayo, isu nga adda nasayaat a rason nga ipalpalubosna ti amin a dakes a mapaspasamak? Saan, saan a kasta ti isursuro ti Biblia. (Ecl. 8:9; 9:11) Ngem daytoy ti ammotayo: No maipasangotayo iti suot, ammo ken makitkita dayta ni Jehova ken dengdenggenna dagiti panagpatulongtayo. (Sal. 34:15; 55:22; Isa. 59:1) Napatpateg pay ngem iti dayta, matulongannatayo ni Jehova tapno sibaballigi a maibturantayo dagiti pakarigatan. Kasano?

14. Kasano a tultulongannatayo ni Jehova kadagiti tiempo ti rigat?

¹⁴ Ti maysa a pamay-an a tultulongannatayo ni Jehova ket liwliwaen ken paregtaennatayo. Masansan nga aramidenna dayta iti eksakto unay a tiempo. (2 Cor. 1:3, 4) Dayta ti napadasan ti brother a taga-Turkmenistan a ni Eziz, a nasentensiaan a maibalud iti dua a tawen gapu iti pammatina. “Iti agsapa sakbay ti pannakabistak,” imbagana, “impabasa kaniak ti maysa a kabsat ti Isaias 30:15, a kunana: ‘Napigsakayo no agtalinaedkayo a kalmado ken no agtalekkayo.’ Nakatulong ti panangpampanunotko iti daytoy a teksto bayat ti pannakaibaludko.” Adda kadi met malagipmo a tiempo iti biagmo a liniwliwa ken pinaregtanaka ni Jehova iti oras a kasapulam unay dayta?

15-16. Ania dagiti masursurom iti kapadasan ni Tori?

¹⁵ Masansan a satayo la maamiris a tinulongannatayo gayam ni Jehova a mangibtur iti suot inton nalpasen dayta. Kasta ti napaneknekan ti sister a ni Tori. Innem a tawen a nagsagaba iti kanser ti anakna a ni Mason agingga a natay. Natural laeng a permi idi ti ladingit ni Tori. Imbagana, “Kas maysa nga ina, awanen ti mapanunotko a nasasaem pay ngem iti nariknak.” Innayonna, “Siguradok nga umanamong ti dadduma a nagannak a nasaksakit no makitkitam nga agrigrigat ti anakmo ngem no sika a mismo ti makapasar iti dayta.”

¹⁶ Uray no naldaang unay idi ni Tori bayat a makitkitana a marigrigatan unay ti anakna, pinanunotna idi agangay dagiti pamay-an a tinulongan isuna ni Jehova a mangibtur iti dayta. “No lagipek ti napasamak,” imbagana, “nakitak ti ima ken ti kinadungngo ni Jehova bayat ti panagsakit ti anakko. Kas pagarigan, uray no sobra idi ti kapsut ni Mason gapu iti sakitna isu a dina kaya ti sumango kadagiti bisita, nagbiahe latta dagiti kakabsat iti dua nga oras tapno makapanda idiay ospital. Kanayon latta nga adda bisita idiay waiting room—a nakasagana ken situtulok a tumulong. Impaayda met dagiti material a kasapulanmi. Uray kadagiti karirigatan a tiempo, saankami a pulos a nagkurang iti aniaman.” Impaay ni Jehova ken Tori dagiti kasapulanna tapno makapagibtur, ket kasta met laeng ti inaramidna ken Mason.—Kitaen ti kahon nga “Impaay ni Jehova ti Eksakto a Kasapulanmi.”

BILANGEM DAGITI BENDISIONMO

17-18. Ania ti makatulong tapno makita ken maapresiartayo ti tulong ni Jehova bayat a mapaspasarantayo ti maysa a suot? (Salmo 40:5)

¹⁷ Basaen ti Salmo 40:5. Ti kalat ti maysa nga umuuli iti bantay ket makadanon iti tuktok. Ngem adda dagiti pagsardenganna iti rutana tapno ma-enjoy-na ti napintas a buya ti aglawlaw. Iti umasping a pamay-an, regular nga iwayaam nga isardeng pay laeng dagiti ar-aramidem tapno panunotem no kasano a tultulongannaka ni Jehova nga agballigi bayat nga adda pakarigatan nga ib-ibturam. Kalpasan ti agmalem, isaludsodmo iti bagim: ‘Iti ania a pamay-an a nakitak ti bendision ni Jehova ita? Nupay adda pay laeng mapaspasarak a suot, kasano a tultulongannak ni Jehova nga agibtur?’ Kitaem ti uray maysa laeng a bendision ni Jehova kenka tapno agballigika.

¹⁸ Wen, baka ikarkararagmo nga agpatingga koman ti pakasuotam. Natural ken rumbeng laeng dayta. (Fil. 4:6) Ngem masapul met a nasiputtayo kadagiti bendision a maaw-awattayo ita. Ngamin, ikarkari ni Jehova a pabilgen ken tulongannatayo nga agibtur. Kanayon ngarud nga agyamanka ken Jehova gapu ta tultulongannaka. Iti kasta, nalawag a makitam a tultulongannaka ni Jehova nga agballigi iti suot a kas iti inaramidna idi ken Jose.—Gen. 41:51, 52.