Makapnek a Pannakipagna ken Jehova

TI PAMILIAK

Nayanakak idi 1934. Taga-Swizerland dagiti nagannakko ngem immakarda idiay Timmins, maysa nga ili iti Ontario, Canada nga adda dagiti pagminasanna. Idi agarup 1939, nangrugi ni nanangko nga agbasa iti Pagwanawanan ken makigimong kadagiti Saksi ni Jehova. Intugtugotnak ken ti innem a kakabsatko. Idi agangay, nabautisaran ni Nanang kas maysa a Saksi ni Jehova.

Saan a naragsakan ni Tatang iti desision ni Nanang. Ngem ipatpateg ni Nanang ti kinapudno. Determinado met nga agmatalek ken Jehova uray idi naparitanen ti trabaho dagiti Saksi ni Jehova ditoy Canada iti rugrugi ti 1940. Kanayon met a nasayaat ken narespeto ti panangtratona ken Tatang uray no pagsasawan idi ni Tatang. Gapu iti nagsayaat nga ulidanna, natignaykami nga agkakabsat a mangawat iti kinapudno. Ket makaparagsak ta nagbalbaliw met laeng ni Tatang ken simmayaat ti panangtratona iti pamiliami.

NANGRUGIAK ITI AMIN-TIEMPO A PANAGSERBI

Bayat ti kalgaw (summer) ti 1950, immatenderak iti Theocracy’s Increase Assembly iti New York City. Idi nakitak dagiti kakabsat a naggapu iti nagduduma a pagilian ken nangngegko dagiti makaparegta nga interbiu dagiti naggraduar iti Gilead, naparegtaak unay a mangipaay iti ad-adu pay para ken Jehova. Nagbalinak a mas determinado a sumrek iti amin-tiempo a ministerio. Isu nga apaman a nakaawidak, nagaplayak nga agbalin a regular pioneer. Nagsubalit ti sanga nga opisina ti Canada nga ibagbagana a masapul nga agpabautisarak pay. Isu a nagpabautisarak idi Oktubre 1, 1950. Kalpasan laeng ti makabulan, nag-regular pioneer-akon, ket idiay Kapuskasing ti umuna nga asaynmentko. Nakaad-adayo dayta nga ili iti lugarmi.

Idi primavera (spring) ti 1951, ti sanga nga opisina pinaregtana dagiti Saksi a makasao iti French no kayatda ti umakar iti probinsia ti Quebec a French ti pagsasaona. Nagdakkel ti panagkasapulan sadiay. Gapu ta ammok ti agsao iti French ken English, inawatko ti imbitasionda ket nai-assign-ak idiay Rouyn. Awan a pulos ti am-ammok sadiay. Ti laeng adda kaniak ket ti adres nga imbagak itay. Ngem mayat met ti taray ti bambanag. Nagbalinkami a nasayaat nga aggayyem ken Marcel ket natagiragsakko ti agserbi idiay Quebec iti simmaruno nga uppat a tawen, agingga a nagbalinak nga special pioneer.

PANAG-GILEAD KEN DAGITI NAMNAMA A NAITANTAN

Idi addaak idiay Quebec, makaparagsak ta nakaawatak iti imbitasion nga ageskuela iti maika-26 a klase ti Gilead idiay South Lansing, New York. Naggraduarak idi Pebrero 12, 1956. Idiay Ghana,b West Africa ti naited nga asaynmentko. Ngem sakbayak a napan, nagsubliak ditoy Canada iti “sumagmamano a lawas” agingga a naalak ti amin a dokumento a kasapulak a mapan idiay Ghana.

Immabutak iti pito a bulan iti Toronto a nangur-uray kadagiti dokumentok. Iti dayta a tiempo, pinadagusdak ti pamilia Cripps iti balayda. Idiay a naam-ammok ni Sheila, ti balasangda. Natnag ti riknami iti maysa ken maysa. Idi koma ibagak a kayatko isunan a pakasaran, simmangpet metten ti bisak. Nagkararagkami ken Shiela, ket nagdesisionkami a mapanak iti asaynmentko. Nagtulagkami nga agsinnuratkami latta ken kitaenminto no posible a makapagkasarkami iti masanguanan. Saan a nalaka dayta, ngem nabigbigmi idi agangay nga umiso ti desisionmi.

Kalpasan ti makabulan a panagbiahek iti tren, barko, ken eroplano, nakadanonak met laengen idiay Accra, Ghana. Idi addaak idiay, nadutokanak kas manangaywan iti distrito. Karaman iti asaynmentko ti panangbisitak iti intero a Ghana ken kadagiti kaarrubana a lugar kas iti Ivory Coast (Côte d’Ivoire itan) ken ti Togoland (Togo itan). Kaaduanna a maymaysak nga agbibiahe nga us-usarek ti jeep a kukua ti sangay. Nagustuak unay dayta a pribilehiok a mangbisita kadagiti kakabsat!

No ngudo ti lawas, adda paspasetko kadagiti asamblea sirkito. Awan pay idi dagiti Assembly Hall. Isu a mangar-aramid dagiti kakabsat iti palapala a naaramid iti kawayan ken nalinongan kadagiti bulbulong ti niog tapno saan a mainitan dagiti kakabsat. Gapu ta awan pay idi ti refrigerator kadagiti cafeteria, maiwayway laeng dagiti animal iti asideg sada maparti no kasapulanen a maluto.

Adda dagiti nakakatkatawa a kapadasanmi kadagidiay nga asamblea. Naminsan, agpalpalawag ti maysa met laeng a misionero a ni Herb Jenningsc idi adda nakabulos a baka. Napan ketdin nagtaraytaray iti stage ken iti ayan dagiti agdengdengngeg. Nagsardeng ni Herb nga agsao ket kasla saan nga ammo ti baka ti turturongenna. Ngem imbag laengen ta adda uppat a nababaneg a kakabsat a nangtiliw iti baka ken insublida dayta iti cafeteria. Permi ti katawa dagiti kakabsat nga immatender!

Bayat ti lawas dagiti asamblea, ipabpabuyak ti pelikulatayo a The New World Society in Action kadagiti asideg a purok. Agusarak idi iti projector nga ipaturongko iti puraw a tela a naisab-it iti dua a poste wenno dua a kayo. Nagusgustuan unay dayta dagiti pumurok! Dayta ti umuna a gundaway para iti adu kadakuada a makabuya iti pelikula. Nagpipigsa ti palakpakda kada mabuyada dagiti eksena dagiti mababautisaran a tattao. Nagdakkel ti naitulong dayta a pelikula tapno mabigbig dagiti agbuybuya nga agkaykaysa dagiti kakabsattayo iti intero a lubong.

Kalpasan ti agarup dua a tawen a kaaddak idiay Africa, nakaragragsakak ta makaatenderak iti 1958 nga internasional a kombension idiay New York City. Diak mailadawan ti ragsakko ta makitak manen ni Sheila, a naggapu pay idiay Quebec, a pagserserbianna kas special pioneer. Imbagak nga agkasarkamin ket nagwen. Nagsuratak ken Brother Knorrd ket dinamagko no mabalin nga ag-Gilead met ni Sheila tapno agkaduakami idiay Africa. Immanamong ni Brother Knorr. Idi agangay, nakapan met laeng ni Shiela idiay Ghana. Nagkasarkami idiay Accra idi Oktubre 3, 1959. Talaga a nariknami a binendisionan ni Jehova ti panangyun-unami kenkuana iti biagmi.

PANAGKADUAMI NGA AGSERBI IDIAY CAMEROON

Idi 1961, naibaonkami idiay Cameroon. Nakabis-busy-ak idi ta maysaak kadagiti timmulong a nangipasdek iti baro a sanga nga opisina idiay Cameroon. Kas baro nga adipen ti sangay (branch servant), nagadu ti masapul a sursuruek. Idi 1965, naammuanmi a masikog ni Sheila. Aminek a nagrigat para kadakami a panunoten nga agbalinkamin a nagannak. Ngem idi naisaganamin ti riknami iti responsabilidadmi ken idi agsublikami koman iti Canada, adda makapaladingit a napasamak.

Naalisan ni Shiela. Imbaga ti doktormi a lalaki ti agbalin koma nga anakmi. Nasurok a 50 a tawenen ti napalabas ngem saanmi latta a malipatan dayta. Ngem uray no permi a nalidayankami iti napasamak, nagtalinaedkami latta iti asaynmentmi nga ipatpategmi unay.

Masansan a maidaddadanes dagiti kakabsat idiay Cameroon gapu ta neutralda iti politika. Lallalo pay a kumaro ti situasion kada eleksion ti para presidente. Idi Mayo 13, 1970, napasamak ti pagbutbutnganmi. Naiparit ti trabaho dagiti Saksi ni Jehova sadiay. Ti nagpintas a baro a pasilidad ti sangay a nagyananmi laeng iti lima a bulan ket innalan ti gobierno. Iti laeng uneg ti maysa a lawas, amin a misionero—a pakairamananmi ken Shiela—ket napapanaw iti pagilian. Narigat a panawan dagiti kakabsat ta ay-ayatenmi unay ida ken madanagankami iti mabalin a mapasamak kadakuada.

Innem a bulankami a nagyan iti sanga nga opisina ti France. Idiayko nga intultuloy ti asaynmentko a mangaywan kadagiti kasapulan dagiti kakabsat idiay Cameroon. Iti Disiembre dayta a tawen, naibaonkami iti sangay iti Nigeria nga isu idin ti mangas-asikaso iti trabaho idiay Cameroon. Sibabara nga inawatdakami dagiti kakabsat iti Nigeria ket natagiragsakmi ti agserbi sadiay iti sumagmamano a tawen.

MAYSA A NARIGAT A DESISION

Idi 1973, adda nagrigat a desision a masapul nga aramidenmi. Adda dagiti nakaro a sakit ni Shiela nga ib-ibturanna. Idi addakami iti kombension idiay New York, permi ti anug-ogna ken imbagana kaniak: “Diak kayan! Nabambannogakon. Agkarasakitak metten.” Nasuroken a 14 a tawen a nagkaduakami nga agserbi idiay West Africa. Ipagpannakkelko unay ti kinamatalekna. Ngem masapul nga adda dagiti panagbalbaliw nga aramidenmi. Nagsaritaanmi ti situasionmi. Ket kalpasan ti napasnek ken napaut a panagkararagmi, nagdesisionkami nga agsubli ditoy Canada tapno mas maaywanan ti salun-atna. Ti panangpanawmi iti asaynmentmi kas misionero ken ti amin-tiempo a panagserbimi ti karirigatan pay laeng a desision nga inaramidmi.

Idi addakamin ditoy Canada, innalanak iti trabaho ti nabayagen a gayyemko nga aglaklako iti lugan iti maysa nga ili iti makin-amianan a paset ti Toronto. Nagabangkami iti apartment. Gimmatangkami met kadagiti segunda mano a gamit iti balay. Isu a nakaakarkami nga awan a pulos ti utangmi. Kayatmi ngamin ti agbiag a simple ken mangnamnamakami a maysa nga aldaw, makapagsublikami manen iti amin-tiempo a panagserbi. Nasdaawkami ta nasapsapa pay ngem iti ninamnamami a napasamak dayta.

Nagboluntarioak kada Sabado iti pannakaibangon ti baro nga Assembly Hall iti Norval, Ontario. Idi agangay, nadutokanak kas Assembly Hall overseer. Sumaysayaat met idin ti salun-at ni Sheila ken mariknami a kayanan ti baro nga asaynmentmi. Isu nga immakarkami iti apartment iti Assembly Hall idi Hunio 1974. Maragragsakankami ta nakapagsublikami manen iti amin-tiempo a serbisio!

Imbag laengen ta nagtultuloy a simmayaat ti salun-at ni Shiela. Dua a tawen kalpasanna, inawatmi ti asaynment nga agserbi iti sirkito. Nagserbikami iti sirkito ti Manitoba a probinsia ti Canada a pagaammo a nakalamlamiis no tiempo ti lam-ek (winter). Ngem okey laeng ta nakabarbara ti nariknami nga ayat dagiti kakabsat sadiay. Nasursuromi a saan a napateg no sadino ti pagserserbianmi. Ti napateg ket itultuloymi ti agserbi ken Jehova sadinoman ti ayanmi.

NAKASURSUROAK ITI NAPATEG A LEKSION

Kalpasan ti sumagmamano a tawen a panagserbimi iti sirkito, naawiskami nga agserbi ditoy Bethel ti Canada idi 1978. Di nagbayag, adda nasakit ngem importante a leksion a nasursurok. Naikkannak iti asaynment nga agpalawag iti French iti maysa ket kagudua nga oras bayat ti special meeting idiay Montreal. Makapaladingit ta saan a nagustuan dagiti agdengdengngeg ti palawagko. Binalakadannak ti maysa a brother manipud iti Service Department maipapan iti dayta. Idi pay la koma a nabigbigko a saanak met a talaga a kasdiay kalaing nga agpalawag. Ngem saan a nasayaat ti panagsaadna kaniak ti balakadna. Saan a nasayaat ti panagsaritami ken nasuronak ta impagarupko nga istrikto unay isuna ken dinak man la kinomendaran. Nagkamaliak ta hinusgarak isuna ken ti pamay-anna a nangbalakad kaniak.

Kalpasan ti sumagmamano nga aldaw, kinasaritanak ti maysa a miembro ti Komite ti Sangay maipapan iti napasamak. Inaminko a saan a nasayaat ti panagsaadna kaniak ti balakad ket nagpadispensarak. Kalpasanna, kinasaritak ti brother a nangbalakad kaniak. Siaasi a pinakawannak. Nasursurok iti dayta a kapadasan a nagpateg ti kinapakumbaba, ket diakto pulos malipatan dayta. (Prov. 16:18) Namin-adu nga inkararagko dayta ken Jehova. Determinadoak itan a nikaanoman, saankon a tagidaksen ti aniaman a balakad a maawatko.

Nasurok a 40 a tawenen nga agserserbiak ditoy Bethel ti Canada. Ket sipud idi 1985, pribilehiok ti agserbi kas kameng ti Komite ti Sangay. Idi Pebrero 2021, naginanan ken patay ti ipatpategko a ni Sheila. Mail-iliwak unayen kenkuana. Malaksid iti dayta, adda metten dagiti sakitko. Ngem gapu ta nagtalinaedak nga okupado iti panagserbi ken Jehova, naragsakak ta “saan[ko] a mapupuotan ti panaglabas dagiti aldaw.” (Ecl. 5:20) Uray no adda dagiti problema a napasarak, awan kadagita ti makaartap iti rag-o a marikriknak gapu ta inyun-unak ni Jehova iti biagko ken nagserbiak iti amin a tiempo iti 70 a tawen. Talaga a nagbalin a makapnek ti biagko. Ikarkararagko nga itultuloy met koma dagiti agtutubo nga iyun-una ni Jehova iti biagda, ta kombinsidoak a posible laeng a matagiragsakda ti makapnek ken naragsak a biag no agserbida ken Jehova.