Luktam ti Isipmo no Agad-adalka

Sakbay nga agadaltayo, mabalin nga isaludsodtayo iti bagitayo, ‘Ania ngata ti masursurok ditoy?’ Nupay kasta, masapul nga agannadtayo a ditay ipalubos a dagiti ekspektarentayo ti arigna mangbulsek kadatayo iti kayat ni Jehova nga isuro kadatayo. Kasanotayo a pagtalinaeden a silulukat ti isiptayo no agad-adaltayo?

Ikararagmo ti sirib. Kiddawem ken Jehova a tulongannaka a mangtarus no ania dagiti kayatna nga isuro kenka ita. (Sant. 1:5) Saanka koma a makontento kadagiti datin nga ammom.—Prov. 3:​5, 6.

Bigbigem ti naisangsangayan a bileg ti Biblia. “Ti sao ti Dios ket nabiag.” (Heb. 4:12) No kasta, kada agbasatayo iti Biblia, adda baro a maisurona kadatayo ken matulongannatayo iti nadumaduma a pamay-an. Ngem mapasamak laeng dayta no bigbigentayo a masapul nga ammuentayo ti kayat ni Jehova nga isuro kadatayo.

Apresiarentayo ti amin nga idasdasar ni Jehova iti lamisaanna. Ti naespirituan a taraon nga ipapaayna ket kas iti “selebrasion ti naiimas a putahe.” (Isa. 25:6) Saanmo a liklikan dagiti “putahe” wenno dagiti naespirituan a taraon nga iti panagkunam ket saanmo a magustuan. Iti kasta, ipalpalubosmo a tulongannaka ti Dios tapno agbalinka a nasaysayaat a tao ken talaga a magustuamton ti agadal!