Tulongam Dagiti Iyad-adalam iti Biblia nga Agdesision nga Agserbi ken Jehova

1-2. (a) Apay a saan a makapagdesision ti dadduma a mayad-adalan iti Biblia nga agserbi ken Jehova? (b) Ania ti usigentayo iti daytoy nga artikulo?

ADDA kadi dagiti pagdandanagam isu a marigatanka idi nga agdesision nga agbalin a maysa kadagiti Saksi ni Jehova? Baka mabutengka idi amangan no guraendaka dagiti katrabahuam, gagayyem, wenno kapamiliam. Wenno baka nariknam a marigatanka a mangsurot kadagiti pagalagadan ti Dios. No kasta idi ti nariknam, maawatam ngarud no apay a ti dadduma a mayad-adalan ket saan met a makapagdesision nga agserbi ken Jehova.

² Ammo ni Jesus a dagiti kasta a pakadanagan ket mabalin a makalapped iti panagrang-ay iti naespirituan. (Mat. 13:​20-22) Ngem tinulonganna latta dagidiay saan a dagus a nakapagdesision nga agbalin a pasurotna. Insurona kadagiti adalanna no kasanoda a tulongan dagiti saan a makapagdesision tapno (1) maammuanda dagiti makalapped iti panagrang-ayda, (2) mapaunegda ti ayatda ken Jehova, (3) mabaliwanda dagiti prioridadda, ken (4) mapagballigianda dagiti pakarigatanda. Kasanotayo a mayaplikar ti imbaga ni Jesus kadagiti adalanna no us-usarentayo ti libro nga Agbiagka a Naragsak iti Agnanayon! a mangtulong iti iyad-adalantayo iti Biblia nga agdesision nga agserbi ken Jehova?

TULONGAM TI IYAD-ADALAM A MANGAMMMO KADAGITI MAKALAPPED ITI PANAGRANG-AYNA

3. Ania ti mabalin a nakalapped ken Nicodemo nga agbalin nga adalan ni Jesus?

³ Ni Nicodemo ket maysa a prominente a lider dagiti Judio. Ngem narigatan nga agbalin a maysa kadagiti pasurot ni Jesus. Agarup innem a bulan pay laeng a mangaskasaba ni Jesus ngem naawatanen ni Nicodemo a ni Jesus ket imbaon ti Dios. (Juan 3:​1, 2) Nupay kasta, sililimed a mapan ni Nicodemo a makisarita ken Jesus iti rabii. Apay? Ngamin, ‘mabuteng kadagiti Judio.’ (Juan 7:13; 12:42) Mabalin a napanunotna a mapukawna ti posision ken ti dadduma a kinabaknangna no agbalin nga adalan ni Jesus.a

4. Kasano a tinulongan ni Jesus ni Nicodemo tapno maawatanna no ania ti kayat ti Dios nga aramidenna?

⁴ Kabesado ni Nicodemo ti Linteg. Ngem kasapulanna ti tulong tapno maawatanna no ania ti kayat ni Jehova nga aramidenna. Kasano a tinulongan ni Jesus? Nakasagana ni Jesus a makisarita ken Nicodemo uray rabiin. Nalawag met nga imbaga ni Jesus ken Nicodemo dagiti masapul nga aramidenna tapno agbalin nga adalan: pagbabawyanna dagiti basolna, agpabautisar iti danum, ken ipakitana ti pammatina iti Anak ti Dios.—Juan 3:​5, 14-21.

5. Kasanotayo a matulongan ti iyad-adalantayo tapno mailasinna no ania ti manglaplapped kenkuana a rumang-ay?

⁵ Uray adun ti ammo ti mayad-adalan maipapan iti Biblia, mabalin a kasapulanna latta ti tulong tapno mailasinna ti manglaplapped kenkuana a rumang-ay. Kas pagarigan, baka gapu iti trabaho wenno ibubusor ti pamiliana, saan a makapagdesision nga agserbi ken Jehova. Mangiwayaka ngarud iti tiempo a makisarita iti iyad-adalam. Mabalinmo nga awisen nga agmerienda wenno agpasiar biit. Iti kasta, nalaglag-an ti riknana a mangibaga kadagiti problemana. Paregtaem ti iyad-adalam a mangaramid kadagiti kasapulan a panagbalbaliw, saan a tapno maparagsaknaka, no di ket tapno maipakitana nga ay-ayatenna ni Jehova.

6. Kasanom a matulongan ti iyad-adalam tapno pumigsa ti pakinakemna nga agdesision nga agserbi ken Jehova? (1 Corinto 16:13)

⁶ No kombinsido ti iyad-adalam a tulongan isuna ni Jehova a mangaramid iti umiso, bumileg ti pakinakemna a mangyaplikar kadagiti maad-adalna. (Basaen ti 1 Corinto 16:13.) Ti papelmo kas mangyad-adal iti Biblia ket kas iti titser iti eskuelaan. Idi ages-eskuelaka pay, ania a klase ti titser ti kaykayatmo unay? Posible a daydiay nakaan-anus a timmulong kenka tapno maaddaanka iti kompiansa iti kayam nga aramiden. Kasta met laeng ti nalaing a mangyad-adal iti Biblia. Saanna laeng a basta isuro no ania ti kayat ti Dios nga aramidentayo. Ipasiguradona met iti iyad-adalanna a tulongan isuna ni Jehova tapno makaaramid kadagiti kasapulan a panagbalbaliw iti biagna. Kasanom a maaramid dayta?

TULONGAM TI IYAD-ADALAM A MANGPAUNEG ITI AYATNA KEN JEHOVA

7. Kasano a tinulongan ni Jesus dagiti dimngeg kenkuana tapno mapaunegda ti ayatda ken Jehova?

⁷ Ammo ni Jesus a matignay dagiti adalanna a mangyaplikar kadagiti nasursuroda no ay-ayatenda ti Dios. Masansan nga adda dagiti insurona a makatulong kadagiti adalanna tapno mapaunegda ti ayatda iti nailangitan nga Amada. Kas pagarigan, inyarigna ni Jehova iti maysa nga ama a mangmangted iti nagsasayaat a sagut kadagiti annakna. (Mat. 7:​9-11) Baka saan a nadungngo ti ama ti dadduma a dumdumngeg idi ken Jesus. Imadyinem ti nariknada iti imbaga ni Jesus nga ilustrasion maipapan iti naasi nga ama a nangsabat iti anakna a nagsubli kalpasan ti adu a dakes nga inaramidna iti biagna. Naawatanda a talaga a naasi ni Jehova kadagiti tattao.—Luc. 15:​20-24.

8. Kasanom a matulongan ti iyad-adalam a mangpauneg iti ayatna ken Jehova?

⁸ Matulongam met ti iyad-adalam a mangpauneg iti ayatna ken Jehova. Kasano? Isurom kenkuana dagiti nagpipintas a kualidad ti Dios. Kada agadalkayo, tulongam a mangtarus no kasano nga ipakita dagiti maad-adalna nga ay-ayatennatayo ni Jehova. No pagsarsaritaanyo ti maipapan iti subbot, ipaawatmo kenkuana nga impaay ni Jehova dayta saan laeng a gapu ta ay-ayatenna ti amin a tattao, no di ket gapu ta ay-ayaten met isuna ni Jehova. (Roma 5:8; 1 Juan 4:10) No maawatanna a kasta unay ti panagayat ni Jehova kenkuana, umuneg nga umuneg ti ayatna ken Jehova.—Gal. 2:20.

9. Ania ti nakatulong ken Michael nga agbalbaliw?

⁹ Kitaentayo ti kapadasan ni Michael a taga-Indonesia. Naammuanna ti kinapudno bayat a dumakdakkel, ngem saan a nabautisaran. Idi agtawen iti 18, nagabrod tapno agtrabaho kas drayber ti trak. Idi agangay, nangasawa idiay Indonesia. Ngem nagabrod manen iti sabali a pagilian nga adayo iti pamiliana. Kabayatanna, nangrugin a makipagadal iti Biblia ti asawana ken ti anakda ket iyap-aplikardan dagiti maad-adalda. Idi natay ti Nanang ni Michael, nagawid tapno aywananna ni tatangna. Immanamong met a makipagadal manen iti Biblia. Idi ad-adalendan ti seksion nga “Ammuem ti Ad-adu Pay” iti leksion 27 ti libro nga Agbiagka a Naragsak iti Agnanayon!, natukay unay ti rikna ni Michael. Idi pinampanunotna ti narikna ni Jehova idi nakitana nga agrigrigat ti Anakna, nakasangit ni Michael. Permi ti yamanna iti subbot isu a natignay nga agbalbaliw. Ket idi agangay, nagpabautisar.

TULONGAM TI IYAD-ADALAM A MANGYUN-UNA KEN JEHOVA

10. Kasano a tinulongan ni Jesus dagiti nagkauna nga adalanna a mangyun-una ken Jehova? (Lucas 5:​5-11) (Kitaen met ti ladawan.)

¹⁰ Dagus a nabigbig dagiti nagkauna nga adalan a ni Jesus ti naikari a Mesias. Ngem kasapulanda ti tulong tapno mayun-unada ti ministerioda. Medio nabayag idin nga adalan da Pedro ken Andres idi inawis ida ni Jesus a makikadua kenkuana iti ministerio iti amin a tiempo. (Mat. 4:​18, 19) Narang-ay idi ti negosioda a panagkalap a kasosioda da Santiago ken Juan. (Mar. 1:​16-20) Idi a da Pedro ken Andres “pinanawanda dagiti iketda,” posible a siniguradoda a masuportaranda latta ti pamiliada iti material bayat a makikadkaduada ken Jesus. Ania ti nangtignay kadakuada a mangyun-una ken Jehova? Ibaga kadatayo ti salaysay ni Lucas ti maipapan iti milagro nga inaramid ni Jesus a nangpabileg iti panagtalekda nga ipaay ni Jehova dagiti kasapulanda.—Basaen ti Lucas 5:​5-11.

11. Kasanotayo nga usaren dagiti bukodtayo a kapadasan a mangpabileg iti pammati ti iyad-adalantayo?

¹¹ Saantayo a makaaramid kadagiti milagro a kas kadagiti inaramid ni Jesus. Ngem makairanudtayo kadagiti kapadasan no kasano a tinulongan ni Jehova dagiti mangyun-una kenkuana iti biagda. Kas pagarigan, malagipmo pay no kasano a tinulongannaka ni Jehova idi mangrugikan nga umatender kadagiti gimong? Mabalin a nakisaritaka iti boss-mo ket inlawlawagmo no apay a saanka a mabalin nga ag-overtime kadagiti aldaw ti gimong. Bayat nga iyes-estoriam dagiti kapadasam iti iyad-adalam, ilawlawagmo no kasano a bimmileg ti pammatim idi makitkitam a tultulongannaka ni Jehova iti desisionmo a mangyun-una kenkuana iti biagmo.

12. (a) Ania ti pagsayaatanna no agduduma a kakabsat ti ikuyogtayo a mangyadal? (b) Kasanom nga usaren a sieepektibo dagiti video a mangisuro iti iyad-adalam? Mangted iti pagarigan.

¹² Magunggonaan met ti iyad-adalam no mangngegna dagiti panagbalbaliw nga inaramid ti dadduma a kakabsat tapno mayun-unada ni Jehova. Awisem dagiti kakabsat a nagduduma ti edad, kapadasan, wenno kasasaadda iti biag a makikadua kenka a mangyadal iti Biblia. Ipayestoriam no kasanoda a naammuan ti kinapudno ken no ania dagiti inaramidda tapno maipangpangrunada ti panagserbida ken Jehova. Buyaenyo met dagiti video iti “Ammuem ti Ad-adu Pay” wenno iti seksion nga “Agdiskobreka Pay” ti libro nga Agbiagka a Naragsak iti Agnanayon! Kas pagarigan, no ad-adalenyo ti leksion 37, tulongam a mangtarus kadagiti prinsipio iti video nga Ipaay ni Jehova Dagiti Kasapulantayo.

ISUROM ITI IYAD-ADALAM DAGITI ARAMIDENNA NO ADDA IBUBUSOR

13. Ania ti inaramid ni Jesus tapno masaganaan dagiti adalanna ti ibubusor?

¹³ Namin-adu nga imbaga ni Jesus a maipasango dagiti pasurotna iti ibubusor ti dadduma ken uray dagiti kakabagianda. (Mat. 5:11; 10:​22, 36) Idi asidegen nga agpatingga ti ministerio ni Jesus, pinakdaaranna dagiti adalanna a mabalin a mapapatayda gapu iti panagdaydayawda ken Jehova. (Mat. 24:9; Juan 15:20; 16:2) Imparegtana nga agannadda iti ministerioda. Binalakadanna ida a saanda a makiriri kadagiti bumusbusor ken agannadda tapno maitultuloyda ti mangasaba.

14. Kasanotayo a matulongan ti iyad-adalantayo tapno masaganaanna ti ibubusor? (2 Timoteo 3:12)

¹⁴ Kasanotayo a matulongan ti iyad-adalantayo tapno masaganaanna ti ibubusor? Ilawlawagmo kenkuana dagiti mabalin nga ibaga dagiti katrabahuan, gagayyem, ken kakabagianna. (Basaen ti 2 Timoteo 3:12.) Mabalin a pagaangawan ti dadduma a katrabahuanna gapu ta agbibiag maitunos kadagiti isursuro ti Biblia. Baka uyawen met dagiti kapamiliana ti patpatienna a naibatay iti Biblia. No nasaksakbay a tulongantayo dagiti iyad-adalantayo nga agsagana iti ibubusor, nalaklakadanto a sanguen dayta inton mapasamaken.

15. Ania ti makatulong iti mayad-adalan iti Biblia tapno mapagballigianna ti ibubusor ti pamiliana?

¹⁵ No ti iyad-adalam ket busbusoren dagiti kapamiliana, tulongam a mangpanunot iti rason no apay a kagurgurada dagiti Saksi ni Jehova. Mabalin nga ipapanda nga al-allilawentayo isuna, wenno ipagarupda a dakestayo a tattao. Uray ni Jesus ket binusor dagiti kapamiliana ken imbagada a nadadaelen ti panunotna. (Mar. 3:21; Juan 7:5) Paregtaem ti iyad-adalam nga agbalin latta a naanus ken nataktika iti pannakisaritana iti dadduma, agraman kadagiti kapamiliana.

16. Kasanotayo a matulongan ti iyad-adalantayo iti Biblia tapno sitataktika a mairanudna ti patpatienna?

¹⁶ Saan a gapu ta interesado dagiti kabagian ti mayad-adalan ket mammaminsan nga ilawlawagnan dagiti nasursurona iti Biblia. No ngamin kasta ti aramidenna, mabalin a magabsuonanda iti nagadu nga impormasion isu a maumadanton. Paregtaem ngarud ti iyad-adalam a mangiranud iti patpatienna iti simple a pamay-an. Iti kasta, mabalin a kayatdanto manen nga ammuen ti ad-adu pay maipapan iti Biblia. (Col. 4:6) Mabalin met nga iyawis ti iyad-adalam kadagiti kapamiliana a luktanda ti jw.org tapno maammuanda ti ad-adu pay maipapan kadatayo iti aniaman nga oras a kayatda.

17. Kasanom a matulongan ti iyad-adalam a mangsungbat kadagiti di umiso a kapanunotan ti dadduma maipapan kadagiti Saksi ni Jehova? (Kitaen met ti ladawan.)

¹⁷ Mabalinmo nga usaren ti serye iti jw.org a “Masansan a Maisalsaludsod” tapno matulongam dagiti iyad-adalam a mangisagana iti simple a sungbat kadagiti posible nga isaludsod dagiti kapamilia wenno katrabahuanna. (2 Tim. 2:​24, 25) Iti ngudo ti tunggal leksion, repasuenyo a dua ti seksion a “Kuna ti Dadduma” iti libro nga Agbiagka a Naragsak iti Agnanayon! Paregtaem ti iyad-adalam a praktisenna dagiti isungbatna. Mangtedka kadagiti kasapulan a suhestion tapno nasaysayaat ti panangilawlawagna kadagiti patpatienna. No agpraktiskayo a dua, nalaklakananto nga idepensa ti patpatienna iti dadduma.

18. Kasanom a maparegta ti iyad-adalam tapno makikadua kadatayo iti trabaho a panangasaba? (Mateo 10:27)

¹⁸ Imbilin ni Jesus kadagiti adalanna nga ipakaammoda ti naimbag a damag iti publiko. (Basaen ti Mateo 10:27.) No nasapsapa a rugian ti iyad-adalam nga iranud ti patpatienna, nasapsapa met a masursurona ti agpannuray ken Jehova. Kasano a matulongam ti iyad-adalam a mangragpat iti dayta a kalat? No adda mayanunsio a kampania iti panangasaba iti kongregasionyo, paregtaem ti iyad-adalam a mangpanunot no kasano a makualipikar kas agibumbunannag. Ibagam kenkuana a nalaklaka ti mangasaba kadagiti kasta nga urnos ti panangasaba. Dakkel met ti maitulong kenkuana no rugiannan ti agpaset iti gimong iti tengnga ti lawas. Bayat a makipaspaset iti dayta, maparang-ayna ti abilidadna a mangilawlawag kadagiti patpatienna.

AGTALEKKA ITI IYAD-ADALAM

19. Kasano nga impakita ni Jesus nga agtaltalek kadagiti adalanna, ken kasanotayo a matulad isuna?

¹⁹ Sakbay a nagsubli ni Jesus idiay langit, imbagana kadagiti adalanna a makapagkakaduadanto manen. Saanda a naawatan a ti tuktukoyen ni Jesus ket ti panagkakaduadanto idiay langit. Saan idi a naawatan dagiti adalanna ti amin nga imbagana. Ngem sigurado ni Jesus a kayat dagiti adalanna a paragsaken ni Jehova. (Juan 14:​1-5, 8) Ammona a tiempo ti kasapulan tapno maawatanda dagiti imbagana kas iti panagyanda idiay langit. (Juan 16:12) Matuladtayo ni Jesus no ipakitatayo nga agtalektayo a kayat ti iyad-adalantayo a paragsaken ni Jehova.

20. Kasano nga impakita ti maysa a sister a taga-Malawi nga agtaltalek iti iyad-adalanna?

²⁰ Agtalektayo a kayat nga aramiden ti iyad-adalantayo no ania ti umiso. Kas pagarigan, kitaentayo ti kapadasan ti sister a ni Chifundo a taga-Malawi. Rinugianna nga inyadal ti libro nga Agbiagka a Naragsak iti Agnanayon! iti maysa a Katoliko nga agtutubo a babai nga agnagan iti Alinafe. Idi naadaldan ti leksion 14, dinamag ni Chifundo ken Alinafe no ania ti makunana maipapan iti panangusar kadagiti imahen iti panagdaydayaw iti Dios. Nakasuron ni Alinafe ket imbagana, “Siak ti agdesision no agusarak iti rebulto wenno saan!” Impagarup ni Chifundo no saanen a kayat ni Alinafe ti agpayadal iti Biblia. Ngem intultuloyna latta nga inyadalan. Agtalek ngamin a maawatanto met la ni Alinafe a saan nga umiso ti panangusar kadagiti imahen. Sumagmamano a bulan kalpasanna, insaludsod ni Chifundo ken Alinafe ti saludsod iti leksion 34: “Ania dagiti nakitamon a naitulong kenka ti panagadalmo iti Biblia ken ti panangam-ammom iti pudno a Dios a ni Jehova?” Inyestoria ni Chifundo ti insungbat ni Alinafe: “Nagmayat dagiti imbagana. Ti maysa ket saan nga ar-aramiden dagiti Saksi dagiti iparparit ti Biblia.” Di nagbayag, insardengen ni Alinafe ti agusar kadagiti imahen, ket idi agangay, nakualipikar nga agpabautisar.

21. Kasanotayo a matulongan ti iyad-adalantayo tapno makapagdesision nga agserbi ken Jehova?

²¹ Nupay ni Jehova ti ‘mangpadpadakkel,’ adda maitulongtayo iti irarang-ay ti iyad-adalantayo. (1 Cor. 3:7) Saantayo la nga isuro kenkuana no ania ti kayat ti Dios nga aramidenna. Tulongantayo met a mangpauneg iti ayatna ken Jehova. Paregtaentayo pay nga ipakitana ti ayatna babaen ti panangyun-unana ken Jehova iti biagna. Isurotayo met kenkuana no kasano ti agtalek ken Jehova no maipasango kadagiti problema. No iyebkas ken ipakitatayo ti panagtalektayo kenkuana, matulongantayo a mangpabileg iti determinasionna nga agbiag maitunos kadagiti pagalagadan ni Jehova ken agserbi kenkuana.