Matulongannak Kadi ti Biblia a Maaddaan iti Naragsak a Pamilia?

Sungbat ti Biblia

Wen. Dagitoy ti sumagmamano a nagsasayaat a balakad a naibasar iti Biblia a nakatulongen iti adu a lallaki ken babbai a maaddaan iti naragsak a pamilia:

1. Pagbalinem a legal ti panagasawam. Ti tungpal-biag a tulagan ti legal a panagasawa ti pundasion ti naragsak a pamilia.​—Mateo 19:4-6.

2. Ipakitam ti ayat ken panagraemmo. Kaipapananna a tratuen ti asawam iti wagas a kayatmo a pannakatrato.​—Mateo 7:12; Efeso 5:25, 33.

3. Liklikam dagiti makapasakit a sasao. Nadungngo latta ti pannakisaritam iti asawam uray makapasakit ti ibagana wenno aramidenna. (Efeso 4:31, 32) Kas kuna ti Biblia iti Proverbio 15:1: “Ti maysa a sungbat, no naalumamay, pagbaw-ingenna ti pungtot, ngem ti sao a makapasakit parnuayenna ti unget.”

4. Agmatalek iti maysa ken maysa. Ti laeng asawayo ti pakidennaanyo ken pangipakitaanyo iti dungngo. (Mateo 5:28) Kuna ti Biblia: “Ti panagasawa nadayaw koma iti tengnga dagiti isuamin, ket ti pagiddaan ti agassawa awan koma ti tulawna.”—Hebreo 13:4.

5. Sanayem dagiti annakmo iti naayat a pamay-an. Dikay agbalin a napanuynoy ken nauyong.​—Proverbio 29:15; Colosas 3:21.