Filipos 4:8—“Aniaman a Bambanag a Pudno, . . . Itultuloyyo nga Utoben Dagitoy a Banag”

“Kamaudiananna kakabsat, aniaman a bambanag a pudno, aniaman a bambanag a napateg, aniaman a bambanag a nalinteg, aniaman a bambanag a nadalus, aniaman a bambanag a maay-ayat, aniaman a bambanag a nasayaat ti pakasarsaritaanda, aniaman a bambanag a naimbag, ken aniaman a bambanag a maidaydayaw, itultuloyyo nga utoben dagitoy a banag.”—Filipos 4:8, Baro a Lubong a Patarus.

“Kamaudiananna, kakabsatko, panunotenyo laeng dagiti bambanag a naimbag ken maikari a raemen: dagiti napudno, natakneng, nalinteg, nadalus, napintas, ken nadayaw.”—Filipos 4:8, Ti Baro a Naimbag a Damag Biblia.

Kaipapanan ti Filipos 4:8

Interesado ti Dios iti pampanunoten dagiti tattao, nangruna ta mabalin a ti pampanunotentayo ti aramidentayo. (Salmo 19:14; Marcos 7:20-23) Isu a dagiti tattao a kayatda a paragsaken ti Dios saanda a panunoten dagiti ibilangna a dakes no di ket panunotenda ti bambanag a pakaragsakanna.

Dakamaten daytoy a bersikulo ti walo a naimbag a bambanag a masapul nga ‘itultuloy nga utoben’ dagiti Kristiano, kayatna a sawen, iyugalida a panunoten dagita.

• “Pudno.” Deskribiren daytoy a sao ti bambanag a nalinteg ken mapagtalkan, kas iti impormasion a masarakan iti Sao ti Dios, ti Biblia.—1 Timoteo 6:20.

• “Napateg.” Tumukoy daytoy a sao iti nakaim-importante a bambanag, imbes a dagiti babassit wenno awan patpategna a bambanag. Pabilgen dagita ti determinasion ti maysa a Kristiano nga agaramid iti umiso.—Tito 2:6-8.

• “Nalinteg.” Tumukoy daytoy a sao kadagiti plano ken ar-aramid a maitunos iti estandarte ti Dios no ania ti umiso imbes a base iti limitado a sirib ti tao.—Proverbio 3:5, 6; 14:12.

• “Nadalus.” Tumukoy daytoy a sao iti pampanunot ken motibo a nadalus ken nasantuan, saan laeng nga iti seksual a bambanag, no di ket iti amin a banag.—2 Corinto 11:3.

• “Maay-ayat.” Tumukoy daytoy a sao iti bambanag a makaay-ayo a mangtignay iti maysa nga agayat imbes a manggura wenno makiriri.—1 Pedro 4:8.

• “Nasayaat ti pakasarsaritaanda.” Tumukoy daytoy a sasao iti bambanag a mangnayon iti nasayaat a reputasion ti maysa a tao ken aprobaran dagidiay mangresrespeto iti Dios.—Proverbio 22:1.

• “Naimbag.” Tumukoy daytoy a sao iti bambanag a nangato ti moralidadda sigun iti estandarte ti Dios. Awan ti makunam a negatibo maipapan kadagita wenno awan ti pakababalawanda.—2 Pedro 1:5, 9.

• “Maidaydayaw.” Tumukoy daytoy iti bambanag a makomendaran, nangruna iti sanguanan ti Dios. Ramanenna met dagiti agkakaimbag nga inaramid ti Dios a nagsayaat a pagpanunotan dagiti tattao.—Salmo 78:4.

Konteksto ti Filipos 4:8

Nakabalud ni apostol Pablo iti maysa a balay idiay Roma idi nagsurat kadagiti Kristiano idiay Filipos. Nupay kasta, deskribiren dagiti komentarista ti Biblia ti suratna kas “surat ti rag-o” gapu ta naragsak dayta ken naglaon iti adu a sasao maipapan iti ayat ken kinadungngo.—Filipos 1:3, 4, 7, 8, 18; 3:1; 4:1, 4, 10.

Ay-ayaten ni Pablo dagiti naespirituan a kakabsatna idiay Filipos, ken kayatna a maaddaanda met iti rag-o ken talna nga adda kenkuana. (Filipos 2:17, 18) Isu nga iti maudi a paset ti suratna, pinaregtana a maaddaanda iti naragsak a kababalin, agbalinda a nainkalintegan, kanayon nga agtalekda iti Dios babaen ti kararag, ken ipokusda ti pampanunotda iti bambanag a mangipaay iti natalna a panunot kasta met iti natalna a relasion iti Dios.—Filipos 4:4-9.

Buyaem daytoy ababa a video tapno makitam ti pakabuklan ti libro a Filipos.