Eclesiastes 3:11—“Isu Inaramidna ti Tunggal Banag a Naimnas iti Pannawenna”

“Inaramidna a napintas ti amin a banag iti umiso a tiempo. Inkabilna pay iti pusoda ti kinaagnanayon; ngem saanto a pulos matarusan ti sangatauan ti aramid ti pudno a Dios manipud rugi agingga iti ngudona.”—Eclesiastes 3:11, Baro a Lubong a Patarus.

“Isu inaramidna ti tunggal banag a naimnas iti pannawenna: casta met nga isu insaadna ti kinaagnanayon idiay pusoda, nupay casta ti tao, dina matontonan ti aramid nga inaramid ti Dios nanipud idi punganay agingga iti panungpalan.”—Eclesiastes 3:11, Ti Biblia.

Kaipapanan ti Eclesiastes 3:11

“Inaramidna a napintas ti amin a banag iti umiso a tiempo.” Ti Hebreo a sao ditoy a naipatarus a “napintas” ket saan laeng a tumukoy iti pisikal wenno makinruar a kinapintas. Mabalin met nga ipatarus dayta kas “naurnos,” “umiso,” wenno “maitutop.” (Eclesiastes 3:11, footnote) Dagiti napintas nga aramid ti Dios saanna laeng a ramanen ti amin a banag a pinarsuana no di pay ket ti amin nga ar-aramidenna tapno matungpal ti pagayatanna.—Daniel 2:21; 2 Pedro 3:8; Apocalipsis 4:11.

“Inkabilna pay iti pusoda ti kinaagnanayon.” Pinarsua ti Dios dagiti tattao tapno agbiag nga agnanayon. (Salmo 37:29) Dayta ti rason nga inkabilna daytoy a tarigagay iti pusoda. Ngem nagsukir iti Dios ti immuna a pagassawaan a da Adan ken Eva isu a natayda ket kasta met ti mapasamak kadagiti annakda. (Genesis 3:17-19; Roma 5:12) Nupay kasta, inkari ti Dios a ‘pennekenna ti tarigagay ti amin a sibibiag a banag,’ a pakairamanan ti tarigagay ti tao nga agbiag iti agnanayon. (Salmo 145:16) Ilawlawag ti Biblia no kasano nga inaramid ni Jehova a posible a maaddaan manen dagiti tattao iti namnama nga agbiag nga agnanayon.—Roma 6:23.

“Saanto a pulos matarusan ti sangatauan ti aramid ti pudno a Dios manipud rugi agingga iti ngudona.” Nakaun-uneg ken nakalawlawa ti sirib ti Dios ta ibaga ti Biblia a “saan a matunton” dayta. (Roma 11:33) Ngem kayat ti Dios nga ipakaammo ti panggepna kadagidiay mayat a mangparagsak kenkuana.—Amos 3:7.

Konteksto ti Eclesiastes 3:11

Ti libro nga Eclesiastes ket insurat ni Ari Solomon ti nagkauna nga Israel, maysa a lalaki a pagaammo gapu iti sirib nga inted ti Dios kenkuana. Naglaon dayta iti praktikal a balakad no ania a talaga dagiti napateg iti biag ken no ania dagiti awan serserbina. (Eclesiastes 1:2, 3; 2:1, 17; 7:1; 12:1, 13) Iti kapitulo 3, inladawan ni Solomon ti dadduma a bambanag a gagangay iti biag. Nadakamat ti adu a nadumaduma nga aktibidad wenno trabaho. (Eclesiastes 3:1-8, 10) Inikkan ti Dios dagiti tattao iti wayawaya nga agpili no ania kadagitoy nga aktibidad ti aramidenda ken no kaano nga aramidenda dagita. (Deuteronomio 30:19, 20; Josue 24:15) Inlawlawag ni Solomon a no itunos dagiti tattao ti aramidda iti panggep ti Dios ken respetuenda ti inkeddengna a “tiempo”—ti pagorasanna—talaga a matagiragsakda dagiti resulta ti panagtrabahoda. Awagan daytoy ni Solomon iti “sagut ti Dios.”—Eclesiastes 3:1, 12, 13.

Buyaem daytoy ababa a video tapno makitam ti pakabuklan ti libro nga Eclesiastes.