Nakombinsirko ni Lakayko Uray no ‘Diak Nagsao’

Nayanakak ditoy Romania idi 1952. Bautisado a Saksi idi ni Nanang ngem saan nga aktibo isu a diak napadpadasan ti nakigimgimong. Maysa pay, Komunista idi ti gobierno ti Romania. Gapu iti dayta, naparitan dagiti Saksi nga agimprenta kadagiti publikasion ken mangasaba. Isu nga iti 36 a tawen, diak am-ammo no asino ni Jehova wenno no ania ti isursuro ti Biblia. Ngem idi 1988, idi aggigiankami ken ni lakayko nga István iti siudad ti Satu-Mare, adda napasamak a nangbalbaliw iti biagko.

Ti Inawatko nga Awis

Naminsan, binisitanak ni Nanang. Imbagana: “Mapanko bisitaen ni antim. Kayatmo ti umay? Sa mapantanto ag-shopping kalpasanna.” Gapu ta awan met ti aramidek, simmurotak.

Idi nakadanonkami iti balay ni antik, adda gayam gimong idiay dagiti Saksi ni Jehova. Agarup siam ti nadanonmi nga immatender. Idik la a naammuan nga aktibo ken naregta manen a Saksi ni nanang. Nagustuak la unay dagiti nangngegko iti dayta nga agsapa.

Idi nalpas ti gimong, inasitgannak ti nangidaulo ken nakiam-ammo. “Siak ni János,” imbagana. “Napansinko a dumdumngegka a naimbag. Nagustuam kadi dagiti nangngegmo?” Imbagak nga idi la a nakaatenderak iti kasta a gimong ken kayatkonto manen ti umay. Dinamagna no kayatko ti agadal iti Biblia. Inawatko a dagus dayta nga awis. Nariknak nga inyasidegnak ti Dios kadagitoy a tattao.

Kabigatanna, inyam-ammonak ni János ken ni Ida a nangyadal kaniak iti Biblia. Ngem mabutengak iti agbalin a reaksion ni István no maammuanna a makipagad-adalak iti Biblia kadagiti Saksi ni Jehova. Namin-adu a pinadasko nga ibaga ti maipapan iti dayta, ngem saan a dumdumngeg. Isu nga ammok lattan a saanna a kayat ti ar-aramidek.

Uray no kasta, nagtultuloyak a nagadal iti Biblia ket nabautisaranak idi Agosto 1989. Uppat a bulan kalpasanna, nagpatingga ti Komunista a gobierno ti Romania ken napapatay ti lider dayta a turay.

Kimmaro ti Ibubusor

Nawaywayan dagiti Saksi ni Jehova gapu iti panagpatingga ti Komunista a turay. Napalubosankamin nga aggigimong ken mangasaba iti binalaybalay. Ngem nagresulta dayta kaniak iti nakarkaro nga ibubusor. Imbaga ni István, “Awan ti bibiangko iti patpatiem, basta saanka a mapmapan kadagiti balbalay a mangasaba.”

Siempre, diak sumardeng a mangasaba. (Aramid 4:20) Isu nga inkagumaak ti agbalin a naannad agingga a posible. Ngem naminsan, nakitadak dagiti gagayyem ni István a mangaskasaba iti binalaybalay ket imbagada dayta kenkuana. Idi nakaawidakon, imbugkaw ni lakayko, “Mangibabainka iti pamiliatayo!” Sa intutokna ti kutsilio iti karabukobko ken pinangtaannak a patayennak no diak sumardeng a mangasaba.

Pinadasko a lawlawagan ti panunot ni István, ken impasiguradok nga ay-ayatek isuna. Kimmalma met gapu iti imbagak. Ngem saan a nagbayag dayta. Ngamin, idi saanak a simmurot kenkuana nga umatender iti seremonia ti kasar ti nadekket a kabagianmi, nakapungtot manen. Isu a nagsubli ti nasakit a panagsasaona ken ad-adda pay a kimmaro dayta.

Makapaladingit ta 13 a tawen a masapul nga ibturak ti ibubusor ni István. Kadagita a tiempo, butbutngennak nga idiborsionak. Masansan nga i-lock-na ti ridaw ken saannak a pastreken iti balaymi. Adda met dagiti tiempo nga ibagana kaniak nga iyempakekon dagiti gamitko sa pumanawakon.

Ania ti timmulong kaniak a mangibtur kadagita a nagrigat a situasion? Inkararag ken indawatko ken Jehova a tulongannak nga agtalinaed a kalmado, ket talaga a nariknak a tinulongannak. (Salmo 55:22) Nagdakkel met a tulong ti kongregasion. Pinaregtadak dagiti panglakayen ken dadduma nga eksperiensiado a sister a saanak a sumuksuko iti panagserbik iti Dios. Impalagipda ti ibagbaga ti Biblia maipapan kadagiti assawa a babbai a nakakombinsir kadagiti assawada uray no ‘dida nagsao’ ta nagtalinaedda a natibker ken matalek ken Jehova. (1 Pedro 3:1) Pimmayso dayta kaniak idi agangay.

Nagbalbaliw ti Amin

Idi 2001, na-stroke ni István isu a saan a makapagna. Makabulan a naospital ken sumagmamano a lawas pay a dimmalan iti rehabilitation tapno makarekober. Kadagita a tiempo, diak pimmampanaw iti abayna. Siak ti mangpakpakan, kasarsaritak isuna, ket siniguradok nga adda ti amin a kasapulanna.

Immay dakami met binisita dagiti kakabsat iti kongregasion. Narikna a mismo ni István ti ayat ken panangipateg dagiti kakabsat. Adu ti nagpresenta nga isudan ti mangaramid kadagiti trabaho iti balaymi. Ken kanayon a nakasagana dagiti panglakayen a mangparegta ken mangtulong kadakami.

Natukay ti rikna ni István gapu iti panangbisita dagiti kakabsat, ken mababainen gapu iti madi a panangtratona idi kaniak. Napansinna met nga awan man la kadagiti gagayyemna ti bimmisita kenkuana. Isu nga idi rimmuaren iti ospital, imbagana, “kayatko ti agadal iti Biblia ken agbalin a Saksi ni Jehova.” Diak idi malapdan ti agsangit gapu iti ragsak!

Idi Mayo 2005, nabautisaran ni István. Gapu ta saan a makapagna, in-wheelchair dagiti kakabsat nga impan iti igid ti pagbautisaranna, inin-innayadda a binagkat nga impan iti danum sada binautisaran. Nagbalin ni István a naregta a manangaskasaba. Nagadu dagiti nagpintas a kapadasanmi a nagkadua a nangaskasaba. Nagmayat dayta a rikna! Agasem—ti lalaki a dati a mangbusbusor kaniak a mangikasaba iti kinapudno a linaon ti Sao ti Dios ket kaduakon a naragsak a mangipakpakaammo iti naimbag a damag kadagiti tattao!

In-inut nga immuneg ti panagayat ni István ken Jehova ken us-usarenna ti tiempona nga agadal ken agikabesa kadagiti bersikulo ti Biblia. No kasarsaritana dagiti kakabsat iti kongregasion, kaykayatna nga ibaga dagita a bersikulo tapno maparegtana ida.

Kimmaro a kimmaro ti kondision ni István. Kalpasan ti agsasaruno a pannaka-stroke-na, saanen a makasao ken idi agangay naidaliten iti pagiddaanna. Ngem kimmapuy kadi ti pammatina ken Jehova gapu iti situasionna? Saan a pulos! Intultuloyna latta ti nagbasbasa ken nagad-adal agingga nga ipalubos ti kasasaadna. No bisitaen dagiti kakabsat, agusar iti gadyet tapno makisarita kadakuada ken mapabilegna ti pammatida. Imbaga ti maysa a brother: “Kaykayatko a bisitaen ni István ta kada agawidak, mariknak a nabang-aran ken napabilegak.”

Makapaladingit ta natay ni István idi Disiembre 2015. Nagkaro idi ti ladingitko gapu iti ipapatayna. Ngem uray no kasta, natalged ti riknak. Ngamin, nabayagen a gayyem isuna ni Jehova sakbay pay a natay. Ket dayta ti maysa a pakaragsakak unay. Agpada nga adda iti memoria ni Jehova da István ken nanangko. Il-iliwek a sabaten ken arakupen manen ida iti nalinteg a baro a lubong ni Jehova.

Nasurok a 35 a tawenen ti napalabas sipud idi binisitami ken nanang ni antik. Diak pulos malipatan dayta. Nasurok a 70 ti tawenkon ken agserserbiak pay laeng kas regular pioneer. Dayta ti kasayaatan a pamay-an a mapanunotko a maipakitak nga agyamyamanak ken Jehova gapu iti amin nga inaramidna para kaniak. (Salmo 116:12) Tinulongannak nga agtalinaed a matalek ken kalmado idi naipasangoak iti ibubusor. Ket nasursurok iti dayta nga ibubusor a posible nga agbalbaliw ti situasion. Uray no diak pulos ninamnama, nakombinsirko ni lakayko uray no diak nagsao.